Lesson 318 - Junior

Memory Verse

IKỌ IBUOT: “Tiñ enyin ke owo eke ọfọnde ama, nyuñ se edinen owo: koro (eti) utit anade ọnọ owo emem” (Psalm 37:37).

Notes

Ikot Elijah

Ekekot Elijah ete edidi anditiñ ntiñ-nnim ikọ Abasi ke ini esit mme owo ke Israel ama ọkọwọñọre ọkpọñ Abasi mme ete mmọ anyan usuñ. Edidem mmọ, Ahab, ama ọkọdọ ñwan okpono ndem ndien idiọk Jezebel emi ama onuk enye esin ke ukpono mme abasi mmọ. Nte edu uwem owo edide, mme owo eketiene ada-usuñ mmọ, esit kpukpru owo ke Israel ama akabare ọdiọk.

Nnyin ikopke ñkpọ ibaña uwem Elijah ye ubon esie. Enye akabiat akamba ubak ini uyen esie ke akai ikọt. Enye ekedi ọkpọsọñ owo uko emi efehede Abasi ikpọñ-ikpọñ.

Elijah ama enyene ọkpọsọñ utom ndinam, ndien enye ama onyuñ ekem ye ọkpọsọñ utom oro. Elijah ekenyene ndida ofuri ini uwem esie nnam Israel efiọk ete ke Abasi kiet odu. Abasi oro akanamde mmọ edi idut ke ini Enye ọkọnọde Moses Ibet ke obot Sinai. Utom esie ikedighe mmem-mem koro mme owo imaha nte etiñde ñkpọ ebaña mme idiọk-ñkpọ mmọ mme ndisian mmọ ke abaña ubiere-ikpe. Mmọ ikamaha ndikpañ utọñ nnọ enye. Enye ekenyene ndika ñketiñ nnọ edidem ye mme owo nte ke edu uwem mmọ ye usuñ nte mmọ ekponode Abasi ifọnke; ndien owo baba kiet ikamaha enye ke oro.

Elijah ikesiwakke ndiduk ke mme obio. Ke ini enye odukde, ekesika ndinọ etop ubiere-ikpe Abasi. Ndien enye eyesọsọp afiak ọnyọñ ke akai ikọt. Ndusuk owo ekenim ke akpanikọ ete ke edi Spirit Abasi ekesimen enye aka mme ebiet (I Ndidem 18:12), onyuñ odip enye ke ini mme asua edomode ndiwot enye.

Mme Ubiere-ikpe

Mme edinam Elijah ema ekpon enyuñ eye ndise. Enye ama ekeme ndida ke iso mme owo ntiñ ikọ ye uko: “Ma uwem Jehovah Abasi Israel, emi ndade Enye ke iso, mbara ye edim ididuhe ke mme isua emi, ke mitoho ke uyo mi” (I Ndidem 17:1). Emi ekedi ubierikpe emi okosimde Israel ke ntak mfiak-edem, ñko okonyuñ edi idiọñọ ndiyarade ñwut mme owo ke ini ñkpọ-ntibe emi nte ke Abasi emi ekemede ndibọrọ akam odu ke Israel. Mme owo ema ebọ ufen unana-mmọñ ke isua ita ye ọfiọñ itiokiet. Mmọ ikamaha se Elijah akanamde ke ubiere-ikpe emi (I Ndidem 18:17).

Ke ikañ ama ọkọsuhọre edita uwa emi Elijah akawade ke Obot Carmel, enye ama owot mme anditiñ ntiñ-nnim ikọ Baal 450. Elijah ama enem Abasi esit ke ndinam uyo Abasi, edi edidem añwan ama ọñwọñọ ete mbemiso eyo okut iyenam enye etie nte kiet ke otu mme anditiñ ntiñ-nnim ikọ emi ekekpañade. Elijah ama odibe man anyaña uwem esie.

Ke ini efen Elijah ama okot ikañ oto ke Heaven edisobo udim mbon ekọñ aba ye duop ke itie iba emi ekenyuñ edide ndimum enye. Abasi ọkọnọ Elijah odudu emi ndida nam utom edisioño mme okpono ndem ke Israel.

Suñ-suñ Ekpri Uyo

Usen kiet Abasi ama owut Elijah ete ke ido ukpono Imọ ke Israel idighe ikañ ye ubiere-ikpe ikpọñ. Elijah okoduñ ke aba itiat ikpọñ ndidibe mbọhọ idiọk edidem añwan. Enye ekekere ete ke utom imọ itimke isaña ọfọn. Mme owo ekesuk ekpokpono ndem okposuk edi nte enye okodomode ndiwọñọre mmọ nnọ Abasi. Enye ekekere ete ke imọ ikpọñ ke ofuri Israel ima Abasi.

Abasi ama ọdọhọ Elijah ọwọrọ aka ọkọdọk obot koro Imọ imọñọ isaña ibe. Ọkpọsọñ oyobio edi, onyuñ okpok mme itiak, edi Abasi iduhe ke oyobio. Efen ekedi unyek-isọñ. Ekeme ndidi ke Elijah ama ekere abaña ọkpọsọñ unyek-isọñ emi ekenyeñede Obot Sinai ke ini Abasi ọkọnọde Moses mbet. Ke ini enye emi, Abasi ikoduhe ke unyek-isọñ mme ke ikañ emi eketienede. Ndien Elijah okop suñ-suñ ekpri uyo, uyo ima, eke mbọm ye mfọn-ido. Emi ekedi uyo Abasi emi etiñde ndisọñọ enyene-mbuọtidem anditiñ ntiñ-nnim ikọ emi idem. Okposuk edi nte Elijah mikekwe, utom Abasi okosuk akaka iso suñ-suñ. Owo 7000 ke Israel ikọtọñọke edọñ inọ Baal ikonyuñ itimke enye inua.

Andida Itie Elijah

Utom emi Elijah ọkọtọñọde ama ọsọñọ ada ke ubọk owo emi akadade itie esie, oro ekedi Elisha. Nso uto ekọm ke Israel ekpenọ ke utọ ñwa-idem emi Elijah akanamde ke ndinyime ndidi ñkpọ uñwam nnọ Abasi, okposuk edi nte ọkọwọrọde mfina ye uwem unana-inem ọnọ enye! Abasi enyene mkpọsọñ utom ọnọ owo ndinam, ana odu owo emi onyimede ndiñwana mkpọsọñ iso ekọñ oro man oto do etọ akpanikọ Abasi ke esit mme owo.

Mbemiso Elijah okure utom esie, Abasi ama ọdọñ enye ekeyet Elisha aran onim nte isuñ-utom Abasi emi editienede enye ke edem. Elisha ekedi ata isio-isio owo. Enye ye ufọk esie, ekedu uwem uyuhọ ye uforo nte ọtọ iñwañ. Edi ọtọñọde ke usen oro Elijah asañade ebe onyuñ otopde ekura esie ofuk enye, emi ọwọrọde ete ke enye okoyom Elisha edi “eyen” esie mme andida itie esie. Elisha ọtọñọ ndinam mbeñidem ndisaña ke uduak Abasi.

Ekedi ọkpọsọñ ñkpọ ọnọ Elisha ndikpọñ ufọk ye utom esie, edi enye ọkọbọ ikot emi otode Heaven, utom Ọbọñ onyuñ akabare edi ñkpọ eke okponde akan ọnọ enye. Ke ñkpọ nte isua ifañ, enye ama asaña ye Elijah onyuñ ebet enye, ekpep ñkpọ oto akwa owo Abasi emi man ekpedi uñwam ọnọ enye ke ini enye edikamade akamba utom emi Elijah ọkọtọñọde.

Elisha ama ebeñe udeme spirit iba emi okodude ye Elijah. Ke ntak mbuọtidem, ema enọ ebene esie. Ke esede mme utibe-ñkpọ emi ewetde ke ikọ Abasi, Elisha ama anam mme utibe-ñkpọ emi ewakde utim ikaba nte se Elijah akanamde.

Edomo Utom Elijah ye eke Elisha

Utom Elisha ekenyene ndinyene akamba ukpuhọre ye eke Elijah. Elijah ama abiat akamba ubak ini esie ikpọñ ke akai ikọt, odibe ke abaña mme owo ye ukara, edi owut idem ke ini ke ini man etiñ uyo Abasi. Elisha ama esiduñ ke mme ikpọ obio ye mme owo (2 Ndidem 4:8), edidem ama onyuñ otim ọdioñọ enye, onyuñ ama enye (2 Ndidem 4:13).

Ke etiñde ebaña Elijah, ediwak utom esie ekedi mkpọsọñ utom ubiere-ikpe, edi Elisha akasaña anam utom mfọn ye mbọm, kpa mme ñkpọ emi ekpenamde mme owo ema enye. Akpa utom Elijah ekedi ndidọhọ ete ke akañ eyedu: edi Elisha akanam mmọñ emi ibọk mkpa okodude akabare ọfọn. Eda mme utibe-ñkpọ Elisha ekedomo ye eke Christ ke ini emi Enye akasañade ye mme owo, ọkọk mbon udọñọ, añwam mbon mmem-idem, anam udia ọtọt ọnọ mbon ọbiọñ onyuñ ọnọ uñwam ke ediwak idaha.

Ini Mbọm

Mme ini ubiere-ikpe edu, ndien Abasi ada mme anditiñ ntiñ-nnim ikọ Esie ndikwọrọ mmọ: edi Jesus ke ini Enye okodude ke isọñ ọkọdọhọ: “Enye ọmọdọñ Mi, ete, ñkwọrọ uwọrọ-ufin nnọ mbuot ekọñ, Nnyuñ ñkwọrọ edikut usuñ nnọ mme nnan, Nnyuñ nsana mmọ emi efikde nyak” (Luke 4:18).

Ini kiet emi ndusuk mbon Samaria ekenọde Jesus usọñenyin, mbet Esie ema ebup ete; “Ọbọñ, nte omonyime nnyin ikot ikañ oto ke enyọñ ọsuhọre edita mmọ? (Luke 9:54). Jesus asua ọnọ mmọ ke ndidọhọ ete: “Eyen owo ikedihe ndibiat uwem owo, edi ndinyaña mmọ”( Luke 9:56). Ini ubiere-ikpe ikedighe kaña.

Ekeda nti edinam ediọñọ ekese utom Elisha, ndinam aran ọtọt ke ekpeme man udia odu ọnọ ebekpa ye nditọ esie ndidia ndu uwem (2 Ndidem 4:1-7); ndikọk mmọñ emi ọkọdiọkde ke Jericho (2 Ndidem 2:21); ndinọ ufọk-ñwed mme anditiñ ntiñ-nnim ikọ Abasi udia ke ini akañ (2 Ndidem 4:42-44); ndinam eyen ebekpa eset ke mkpa (2 Ndidem 4:35); ndinọ udim ekọñ Israel ye Judah emi ekedude ke nsat-itọñ mmọñ (2 Ndidem 3:16, 17). Ini kiet, ke ini enye okomumde ofuri udim ekọñ Syria, enye ọnọ mmọ udia ye mmọñ onyuñ ọno mmọ efiak enyọñ ufọk. Ke idem ini enye ama akakpa, odudu okosuk ododu ke mme ọkpọ esie emi akanamde;okpo owo ekọñ emi eketopde edori ke enye ọtọñọ ntak odu uwem (2 Ndidem 13:21).

Oro ekedi uwem mkpọsọñ owo Abasi iba emi, mmọ enam utom ke nsio nsio usuñ, edi enam uduak Abasi ke ibuot ofuri idut Israel.

Questions

MME MBUME

1. 1 Nso ke nnyin idiọñọ ibaña editọñọ ye edu uwem Elijah?

2. 2 Didie ke editọño ye edu uwem Elijah ekenyene ukpuhọre?

3. 3 Ñwak-ñkan utibe-ñkpọ Elijah ekedi oruk ewe?

4. 4 Ke didie ke mme utibe-ñkpọ Elisha ebiet eke Christ?

5. 5 Ewe ekedi akpa utibe-ñkpọ Elijah?

6. 6 Ewe ekedi akpa utibe-ñkpọ Elisha ke enye ama ekebe Inyañ Jordan?

7. 7 Nso ikanam Elijah anam oruk utom oro enye akanamde?

8. 8 Da mme utibe-ñkpọ eke Elisha domo ye eke Elija.

9. 9 Nso ikedi akpatre ebeñe emi Elisha ekebeñede Elijah?

10. 10 Nso ikedi akpatre utibe-ñkpọ emi ekebatde enọ Elisha?