Lesson 322 - Junior
Memory Verse
IKỌ IBUOT: “O isọñ kufehe,mbufo edara enyuñ ebre: koro Jehovah anamde ikpọ ñkpọ” (Joel 2:21).Notes
Ikọ Ndọñ-esit
“O isọñ, kufehe, mbufo edara enyuñ ebre: koro Jehovah anamde ikpọ ñkpọ” (Joel 2:21). Nso ikọ ndọñ-esit edi emi ọnọ Israel mbon ntimere esit! Kere se emi ọkọwọrọde ọnọ mbon ntañ-mfep emi ekekutde ukut oto ke mme idiọk-ñkpọ mmọ. Idaha oro ke mmọ ekekop ntiñ-nnim ikọ Joel ke abaña ubiere-ikpe emi akanade osim mmọ, ikọ emi ekenamde mmọ eduọk ofuri idorenyin. Idaha emi, ke ufọt ekim, ikọ idorenyin edi: “O isọñ, kufehe, mbufo edara enyuñ ebre.”
Ubiere-ikpe emi Joel eketiñde abaña ikenyeneke Israel ikpọñ. Enye ama etiñ ñko abaña “usen Jehovah” emi edidade itie ke ini Akwa Ukut. Enye edidi “usen obubit enyọñ, kpa ata idiọk enyọñ eti eti,... oruk oro akananam iduhe totoko idinyuñ itieneke enye idi, tutu osim isua ediwak emana.” Isọñ enyek ke iso mmọ, enyọñ enyuñ etimere: utin ye ọfiọñ ebire, ntantafiọñ enyuñ enime uyama mmọ. Ndien Jehovah ebem mbon-ekọñ esie iso ñko osioro uyo: koro nna-ekọñ esie okponde eti-eti: Koro enye edide ọkpọsọñ, anam uyo esie: koro usen Jehovah okponde onyuñ enyenede ndik eti-eti: ndien anie ekeme ndiyọ enye?” (Joel 2:2, 10, 11).
Edieke oro ekpedide kpukpru se ibetde owo ke ini iso, nte emi ikpedighe ñkpọ ndik? Edi Abasi ọkọdọhọ Joel ewet mme ikọ oro man oto do Israel ekpefiọk ete ke mmimọ idi mme idiọk owo, ye se ididide ufen mmọ edieke mmọ midikabakere esit ifiak itiene Abasi.
Idorenyin
Akanam Abasi ikpọñke owo nte anana idorenyin. Enye ama etiñ ọnọ nditọ Israel usuñ nte mmọ ekpebọhọde mme ubierikpe oro: “Mbufo efiak etiene mi ke ofuri esit mbufo, ye ke utre-udia, ye ke ntua-eyet, ye ke eseme: ndien mbufo ewai esit mbufo, ekuwai edisine-ñkpọ mbufo, enyuñ efiak edem etiene Jehovah Abasi mbufo: koro enye enyenede mfọn ye mbọm, isọpke iyaresit, onyuñ awak ima, onyuñ atua mkpọfiọk ke idiọk-ñkpọ” (Joel 2:12, 13). Ke mme ikọ oro enye ekekpep kpukpru owo ke kpukpru emana nte ke mmọ ekpenyene ndikabare esit nnyuñ mfuhọ mbaña mme idiọk-ñkpọ mmọ man ekpenyaña mmọ.
Ñko, Abasi ọdọhọ ete: “Mbufo edi ndien, nnyin ikpe ikọ: mme idiọk ido mbufo ekpetie nte iduot, eyefia nte snow; ekpeyibe nte crimson, eyekabare nte idet erọñ” (Isaiah 1:18). Ke ntre ifọnke baba owo kiet ọbọ ufen akwa ukut. Kpukpru nnyin imekeme ndibọ erinyaña edieke nnyin ikabarede esit inyuñ ikpọñde mme idiọk-ñkpọ nnyin ndien iyak Jesus edi Andinyaña nnyin.
Utebe-ikpe edi kaña ntọñọ edidiọñ emi nnyin ibọde ke ini nnyin itienede Abasi. Udiana edi edinam-asana, emi ewuberede oruñ idiọk-ñkpọ esio. Nnyin ibọ enọ emi oto ke edibọñ akam ye ediyak uwem nnyin ntọtuñọ-ntọtuñọ nnọ Ọbọñ.
Ọyọhọ ita edi uduọk-mmọñ Edisana Spirit. Emi edi se anditiñ ntiñ-nnim ikọ Joel eketiñde abaña ke ini enye ọdọhọde ete: “Mbufo nditọ Zion ebre ndien mbre, enyuñ edara Jehovah Abasi mbufo: koro enye ọnọde mbufo akpa edim nte enende, onyuñ anam akpa edim ye akpatre edep ọnọ mbufo, kpa nte eke akpa” (Joel 2:23).
Ini Edisana Spirit
Kpukpru emi ekedi ntiñ-nnim ikọ ndinyan ubọk ñwut ini emi edinọde Edisana Spirit, ini emi Edisana Spirit edikotde, edinyuñ etimde Ñwan-ndọ Christ idem ibeñe edidi Jesus. Apostle Peter ama ọdọhọ ete ke mme anditiñ ntiñ-nnim ikọ ema ebem iso etiñ ebaña eti ini emi ediñwañade Edisana Spirit eduọk, kpa idem mme angel ema eduñọre enyuñ eyom ndifiọk mbaña enye (I Peter 1:10-12).
Ekediọñọ akpa ini ke mbuk eset emi otode Edisana Ñwed Abasi nte “ini emi ekebemde ukwọ iso.” Eyo mme ikpọ ete ọkọtọñọ ke Noah okosim ini emi Nditọ Israel ekade ekeduñ ke Canaan. Ke oro ebede, edisim ini mme ebierikpe, ndien edisim ini mme anditiñ ntiñ-nnim ikọ. Ke oro ebede ini emi Joel eketiñde abaña nte ini “akpa edim” ama edi. Oro ọkọtọñọ ke Usen Pentecost, ini emi Edisana Spirit ọkọsuhọrede edidoro owo 120 oro ke ubet enyọñ.
Jesus ọkọdọhọ ete: “Mbufo eyebọ odudu, ke Edisana Spirit ama edidoro mbufo ke idem: Mbufo eyenyuñ edi mme ntiense Mi..... tutu osim utit ererimbot” (Utom Mme Apostle 1:8). Oro ekedi ntak emi ekenọde Edisana Spirit: man ọnọ nditọ Abasi odudu onyuñ etie ntiense man oto do ekpekọ ediwak ukpọñ enọ Obio Ubọñ Abasi.
Mme owo ema ebọ uduọk-mmọñ Edisana Spirit ke mme isua emi eketienede Usen Pentecost edem. Nte ededi, akwa ukọbọ ama adaha ada etiene edikwọrọ Eti-mbuk, ndien ke akpatre ediwak mme owo emi ekekwọrọde Eti-mbuk enyuñ edude edisana uwem ema efeñe eyom ebiet udibe. Akayak esisit Ufọk Abasi ndikpa. Mbon Rome ema ebiat Jerusalem enyuñ esuan mme Jew edọñ ke ofuri ererimbot. Emi ekedi ubak ubierikpe emi Joel ekebemde iso etiñ abaña. Edisana Obio ama akabare ana ndon; edim ikedepke, ema enyuñ ekpi mme eto eduọk. Se ikedide ediye isọñ mme iñwañ mfri ini kiet ko ama akabare edi akpa-utatan. Edi idighe utit mbuk emi abañade idut Israel ekedi oro.
Ukperedem Idim
Joel ama etiñ abaña ini efen emi edidide ke iso, emi ediọñọde nte ini “ukperedem edim.” “Enye… onyuñ anam akpa edim ye akpatre edep ọnọ mbufo, kpa nte eke akpa.” Ini enọ Edisana Spirit ikekureke mbemiso akpa mme isuñ-utom ye mme Mbet ekpaña. James, kiet ke otu Mbet emi okodude ke uwem ke ini akpa edim oro ama etiñ abaña ini efen ke ini enye ọdọhọde ete: “Sese, ọtọ-iñwañ etie ebet eti mbuñwum isọñ, onyuñ eme anyan ime, tutu enye okut akpa ye ukperedem edim” (James 5:7).
Mbuñwum isọñ emi enye eketiñde abaña edi Ñwan-ndọ Christ emi etimde idem ebeñe edidi Ọbọñ. Ufọk Abasi ama ọbọ Akpa Edim tọñọ ke Pentecost: edi Jesus idighe kaña ndida Ñwan-ndọ Esie. Ini efen ama odu emi akanade eñwaña Edisana Spirit uwak-uwak ndien ini oro, ke ema eketim Ñwan-ndọ idem, Jesus eyedi. Oro otim ada nnyin edisim eyo nnyin.
Nnyin isaña didie ifiọk ite ke Joel eketiñ abaña Uduọk-mmọñ Edisana Spirit ke ini enye etiñde abaña akpa ye ukperedem edim? Peter ama anam añwaña ke Usen Pentecost ke emi enye etiñde ete: “Edi emi edi se prophet Joel eketiñde, ete, Abasi ọdọhọ ete. Ama ekem ke ukperedem ini. Nyeñwaña Spirit mi ndori kpukpru obukidem” (Utom Mme Apostle 2:16, 17), ndien enye aka iso etiñ abaña utom emi mme Anditiene-Christ emi ekebọde odudu oro edinamde inọ Ọbọñ.
Edim ke Palestine
Ke Palestine ama akana ndon ke ediwak isua, edim ama ọtọñọ ndifiak ndep, isọñ onyuñ ọtọñọ ndisioño mfri. Emi ekedi ke ñkpọ nte ñtọñọ ọyọhọ isua 2000 ke ini emi akpa-utatan ọkọtọñọde ndisehe, enyuñ etọñọde nsit-nsit ndifuñ isọñ okpon akan tutu edisim mfin emi etọde ndusuk mfri emi efọnde ekan ke ererimbot ke Edisana Isọñ emi.
Joel ama ọñwọñọ ete: “Ndien ibokpot eyeyọhọ ke ọtọ-ubek, wine ye aran eyenyuñ eyọhọ ke abañ eduọhọ. Ndien nyenọ mbufo usiene mme isua oro ñkukunkpọyọriyo ye ñkuku ye itut ye idiañ eketade, akwa udim mi emi ñkọdọñde ekọñ ke ọtọ mbufo. Ndien mbufo eyedia eyuhọ, enyuñ etoro enyiñ Jehovah Abasi mbufo, emi akanamde mme utibe-ñkpọ ye mbufo: ndien ikọt mi idikwe but ke nsinsi” (Joel 2:24-26).
Mme Jew ekut ukut ke isua 1,900 ke ofuri ererimbot, edi Abasi ke ọnọnọ mmọ efiak enyọñ obio emana mmọ ke emi. Mmọ enyọñ ye unana edinim ke akpanikọ, edi ini eyedi emi mmọ edinyimede Jesus nte Messiah mmọ. Kpukpru mme edidiọñ emi mme anditiñ ntiñ-nnim ikọ eketiñde ebaña ke ini tọsin isua ukara Christ eyedep ndien ọduọhọ mmọ emi enimde ke akpanikọ enyuñ enyimede Jesus.
Akwa Edim
Ñkpọ efen emi okponde akan mme edidiọñ eke ikpọhidem, ama etibe ke edim ama ọkọtọñọ edidep ke Palestine. Akwa edim Edisana Spirit oro ke ini Ukperedem Edim ama ọwọrọ osu kpa nte Abasi ọkọdọhọde ete eyedi ntre. Emi ekedi kpa ke akpa ọfiọñ nte odude ke ñwed usen ọfiọñ eke edu ukpono mme Jew nte Joel ekewetde. Ibat-ibat owo ke ediwak isua oro ema ebo uduọk-mmọñ Edisana Spirit, edi ekemum ñtọñọ akwa edim emi enim enọ ọyọhọ ọfiọñ inañ ke isua 1906.
Ke ini oro akwa ọbiọñ eke spirit ama ọdọñ mme ufọk Abasi ye mme anditiene-Christ ke ofuri ererimbot. Akwa edidemere ama odu ke eyo Luther, ke eyo Wesley ye ke idak edikwọrọ mbon Abasi nte Charles Finney, Charles Spurgeon, Jonathan Edwards, ye D.L. Moody. Ekem akwa Edidemere ke Welsh emi Edisana Spirit akadade mme tọsin esin ke Obio Ubọñ Abasi edidi.
Ke obio Los Angeles, California, mme owo ke ediwak ufọk Abasi ekebọñ akam eyom edidemere. Ñka mkparawa mme anam mbubehe idem mmọ ema enim mbono akam okoneyo. Mme owo eboho ndinim mbono akam ke etehe ufọk owo. Kpukpru owo ekenyene udọñ ndibọ akwa edim Spirit Abasi eke akande se mmọ ekediọñọde. Mbuk emi owo emi okodude ke mbono Edidemere ke Welsh ama esin ntọtuñọ udọñ ke esit mmọ.
Ke otu mmọ oro ekenyenede udọñ ndinyene odudu Abasi ke uwem mmọ ekedi enye emi ọkọtọñọde utom Apostolic Faith ke Portland Oregon, Mma Florence L. Crawford. Enye akamana ke ufọk eke mikọfiọkke Abasi, edi ke ñkpọ nte isua 15 mbemiso Ukperedem Edim edidep, enye ama okop nte Abasi etiñde-ikọ ọnọ enye ke ufọk unek ete, “Eyen nọ mi esit fo.” Ñwan mbọhiduñ emi enye ọkọdiọñọde nte ata anditiene-Christ ama añwam enye ndibọñ akam ndinyuñ mfiọk nte ke efen ke mme idiọk-ñkpọ imọ.
Ukpuhọre emi obufa uwem esie akadade edi ekedi se ofuri ererimbot edifiọkde ebaña ke ini iso. Mme edinam esie ema ekpuhọre ekpọñ mme edinam ediyom inemesit ererimbot eduk ke ediyak idem esie ndinam ñkpọ ñwam mbon efen. Enye ekesidada udia ye ọfọñ ọsọk mme ubuene. Enye ama adiana ye mbon efen anam utom ndibọp ufọk nnọ mme anana ukeme nditọ iren ye iban. Utom esie ke ufọk-ñkpọkọbi, ndidomo ndida idorenyin nsọk mbon-ñkpọkọbi, ekedi utom ima ọnọ nditọ emi ekeyomde uñwam.
Enye ama okop abaña edinam-asana, edi okposuk edi oro ọkọdọñde ukpọñ esie ndinyene, enye ikekwe owo emi ekekemede nditiñ nnọ enye usuñ emi enye edidiọñọde ete ke enam imọ isana. Usen kiet, ufan kiet eketiñ ọnọ enye abaña mbono emi ekesuk enimde ke efak obio emi mmọ mikesiwakke ndika. Enye ama onim ke akpanikọ ete, nte ededi ke mme owo do enyene se enye okokopde biọñ abaña. Ke akpa mbono emi enye okodukde, ọkwọrọ-ikọ ama adaha ada onyuñ etiñ ete, “Mmonim ke akpanikọ nte ke owo odu mi emi oyomde enam enye asana.” Enye ama ọbọ enọ oro ke okoneyo oro.
Ekedi ke otu mbon nsuk idem oro ke Efak Bonnir Brae ke Los Angeles, ke edim Edisana Spirit ọkọtọñọ. Akwa odudu ama ọsuhọre edidoro mme owo ke idem. Ntre nte etop edidep Ukperedem Edim emi akasuanade ke Los Angeles, mme etop ema eto India ye mme idut Scandinavia edi ete ke odudu oro ke ededep ke mme itie oro ñko. Edim spirit emi ama edep ke mme itie efen ke ererimbot. Ini Ukperedem Edim ama edi, ndien esit mmọ emi ekenyenede udọñ enọ odudu emi otode Abasi ema edara.
James ama ọdọhọ ete ke Ọtọ-iñwañ (Ọbọñ) ama eme anyan ime etie ebet eti mbuñwum isọñ “tutu enye okut akpa ye ukperedem edim.” Idaha emi Ukperedem Edim oro ama edi, emi ekenyenede nditim Ñwan-ndọ Christ idem mbeñe eridi Esie.
Mfin emi “ufọk Abasi eke mmọ emi edide ikpan” (Mme Hebrew 12:23), mmọ emi enimde Ikọ Abasi ke akpanikọ enyuñ ebọde mme enọ emi Abasi enyenede ndinọ mmọ ke ebebet eridi Ọbọñ ini ekededi. Mmọ kebet ndikop: “Eyak nnyin idara inyuñ idat esit, inyuñ inọ Enye ubọñ; Koro ekem ini ndọ Eyenerọñ, Ñwan Esie otim idem ebeñe Enye” (Eriyarare 19:7).
Questions
MME MBUME1 Joel eketiñ ọnọ nditọ Israel abaña nso enyene-ndik ubierikpe?
2 Nso idorenyin ke enye ọkọnọ mmọ?
3 Siak mme akpan enọ mfọn ita eke owo Abasi.
4 “Akpa edim spirit” ọkọwọrọ nso?
5 Nso ini ke enye ekedi?
6 Nso ikedi ndusuk ubierikpe emi okosimde Israel ke ndo-ndo oro Christ ọkọnyọñde aka Heaven?
7 Nso eñwọñọ ke Abasi akanam ọnọ isọñ Palestine abaña ini iso?
8 Ini ewe ke Ukperedem Edim ọkọtọñọ ndidep? Ke mmọñ?
9 Nte mme Jew ke enam ntiñ-nnim ikọ osu mfin?
10 Nso ke “ufọk Abasi eke mmọ emi edide ikpan” etie ebet?