Lesson 324 - Junior
Memory Verse
IKỌ IBUOT: “Mbufo kpukpru enyene esit kiet, ekop mbọm ye kiet eken, etie ima-ima nte nditọ-ete, enyene mfefere esit, enyuñ esuhọre idem” (I Peter 3:8).Notes
Akwa Obio
Obio Antioch ekedi akwa obio ye obio inyene, ñko ekedi ata idiọk obio. Ediwak owo do ekekpono ndem utu ke ndikpono Abasi. Kpasuk ke obio emi Abasi ama okut mme owo emi edibọde erinyaña edieke mmọ ekpefiọkde Eti-mbuk, ntre ke Enye ọdọñ Paul ye Barnabas eka ekekwọrọ ikọ Abasi enọ mmọ. Ke isua 42 tọñọ nte Christ akakpa ema ebọp ufọk Abasi do, ndien eketọñọ ndidiọñọ mme anditiene Jesus nte Christian ke obio Antioch.
Ufọk Abasi ke Antioch ama enyene ñkọri ke spirit, ndien ediwak Mmọ-oko (Gentile) ema edi edikpono ata Abasi, enyuñ enim ete ke Jesus ekedi Eyen Abasi. Mmọ ema ebọ erinyaña ukpọñ, ema enam mmọ esana enyuñ ebọ uduọk-mmọñ Edisana Spirit. Do ke mme Mbet ekenam utom ndinọ Eti-mbuk aka idut mbon Rome.
Etiñ Ntiñ-nnim Ikọ Ebaña Akañ
Mme anditiñ ntiñ-nnim ikọ ema eto Jerusalem edi ndise ufọk Abasi emi odude ke Antioch, ke otu mmọ, kiet ama odu emi eketiñde abaña akañ emi edidide etiene ererimbot. Ukeme ndifiọk mbaña se iditibede oto Abasi, ndien mme anditiene-Christ ema enim mbuk oro ke akpanikọ enyuñ etọñọ nditim idem mbeñe mkpọsọñ ini ke iso. Edi mme anditiene-Christ ke Jerusalem ikenyeneke baba ñkpọ ndomo kiet ndinam mbaña akañ. Mmọ ema ekut akwa ukọbọ oto ke mbuọtidem mmọ ke Jesus, ndien ema ebọ ediwak mmọ se ekenyenede ndida ndu uwem. Mmọ-oko (Gentile) emi ekedide mme anditiene-Christ ke Antioch ema edu ke eti idaha, ndien ke ndo-ndo oro ema ewut mme ufan mmọ emi ekedude ke unana, ima mmọ ke ndinọ uñwam esọk mmọ.
Mme enọ emi eketode ufọk Abasi ke Antioch ema eñwam ke ndida otu mbuot ufọk Abasi Mmọ-oko (Gentile) ndian ke inem ebuana ye otu ufọk Abasi mme Jew. Barnabas ye Paul ekedi mmọ emi ekemekde ndida mme enọ oro mfiak ñka Jerusalem.
Ndisin Inyene ye Odudu
Kiet ke otu mme ada-usuñ ke ufọk Abasi Antioch emi okodude ye Paul ye Barnabas ekedi eyen eka Herod, andikara emi ọkọdiọkde eti-eti ye mme anditiene-Christ. Manaen ama enyene udọñ, nte Moses ndisin okure ye kpukpru inyene ye odudu, akabare emek ndibiom ukut, mfina ye ukọbọ emi mme anditiene-Christ ke ini oro ekenyenede ndibiom akan “ndida inemesit idiọk-ñkpọ ke ekpri ini.” Abasi ama ọdiọñ Manaen onyuñ anam enye enyene odudu ke utom Ọbọñ. Ke akpanikọ, utọ owo emi ndidu ke ufọk Abasi, emi ini kiet ko ekenyenede odudu ke ererimbot ama ọnọ mbon efen udọñ ndiduk ke ufọk Abasi.
Mme Ikọ Edisana Spirit
Nte mme ada-usuñ emi eketrede udia enyuñ ebọñde akam, man utom Abasi aka iso osim ediwak owo, Edisana Spirit ama ọdọhọ ete, “Edianare Barnabas ye Saul enọ mi, man mmọ enam utom oro ñkokotde mmọ nnọ” (Tutu ke ini emi ekekot Paul Apostle, Saul). Ini ama edikem ndien mmọ ndinam se ekebemde iso ekot mmọ ete edinam. Ke ini edikabare esit Saul, Abasi ama ọdọñ Ananias ebine enye ndinam enye ọfiọk ete ke emek enye nte ñkpọ-utom ndikwọrọ ikọ mbaña Jesus nnọ Mmọ-oko (Gentile). Etie nte ke Barnabas ama ebem iso enyene ifiọk ete ke eyedọñ enye aka etiene Mmọ-oko (Gentile).
Man utom Abasi okut unen, ikot utom oro enyene nditọ Heaven. Ke ifet enye emi, Edisana Spirit owut Idemesie ukem ye Abasi ke nditiñ ikọ ye odudu nnọ mme owo emi ke abaña ndinam utom Ọbọñ. Enye onyuñ owut idaha Esie ke ini Ikọ Abasi ọdọhọde ete Spirit eketiñ.
Utom emi Paul ye Barnabas ekenamde ke Antioch ekedi ke otu Mmọ-oko (Gentile), edi idaha emi iñwañ utom mmọ ọkọdọdiọñ atara. Ediwak Mmọ-oko (Gentile) efen ema edu ke idut emi ekekande ekuk emi ekeyomde ndifiọk mbaña Jesus. Paul ye Barnabas ema esuhọ ye utom emi mmọ ekenamde tutu edọhọ mmọ ekpọñ eka iso. Abasi ama ọdiọñ utom mmọ, ediwak owo ema enyene erinyaña. Edi idaha emi, Edisana Spirit ọnọ uyo ete eka.
Mbiowo ke ufọk Abasi ke Antioch ema esobo idem ke ndibọñ akam ye Paul ye Barnabas, enyuñ edori mmọ ubọk ke edisọñọ idaha mmọ ke abaña utom emi mmọ enyenede ndinam. Ufọk Abasi ema eñwam utom mme ọkwọrọ-ikọ emi ke akam ye odudu, edi ikot ekebem iso oto Heaven edi. Jesus ama ọdọhọ ete: “Idighe mbufo ekemek Mi, edi Ami ñkemek mbufo nnyuñ nnim nte mbufo eka ekeñwum mfri, mfri mbufo okponyuñ osuk odu: man Ete ọkpọnọ mbufo ñkpo ekededi eke edibeñede Enye ke enyiñ Mi” (John 15:16).
Ediwat ñka Cyprus
Ikot Edisana Spirit ama ada mmọ ebe inyañ. Paul ye Barnabas ema esaña ye akparawa ọkwọrọ-ikọ kiet emi ekekerede John Mark. Mme ọkwọrọ-ikọ ita emi ema eka anyan usuñ ekpọñ ufọk, ko ke isuo Cyprus.
Okposuk edi emi ekedide isañ ukwọrọ-ikọ Abasi nnọ Mmọ-oko (Gentile), kpukpru ini ekenyene ndibem iso nsobo idem ke Itie ukpono mme Jew. Mme Jew ema esuk ekere ete ke mmọ enyene mfọn ke iso Abasi ekan mmọ efen, ntre ke ekenọ mmọ akpa ifet ndinyime mme ukpep-ñkpọ emi abañade Jesus. Edieke mmọ ekebọde, mmọ eyesọp enyene idara ebuana nditọ Abasi ye Mmọ-oko (Gentile) emi enyenede erinyaña; edi edieke mmọ edisinde, idinyeneke ntak ndinọ mfaña. Ema enọ mmọ ofuri ifet.
Edisobo ye Abia-idiọñ
Ke isañ emi mme ọkwọrọ-ikọ emi ekesañade ke Cyprus, mmọ ema ekesobo ye abia-idiọñ me okut-ñkukut. Mbon isuo oro ema esinim ediwak ikpikpru ñkpọ ke akpanikọ ntre ke mmọ ekekpañ utọñ enọ enye ke ini enye eketiñde mme mbuk esie ọnọ mmọ. Kpa owo Rome emi akakarade isuo oro ama ayak idem esie ọnọ ndikop utom ndioi odudu emi enye akadade odudu satan anam. Edi ke andikara oro, emi ekekerede Sergius Paulus, okokopde abaña Paul ye Barnabas, esit esie ama emenere. Esit esie ama anam akpanikọ. Enye akakpañ utọñ ọnọ abia-idiọñ oro koro enye mikọfiọkke se ikọfọnde ikan oro. Ke ini enye ọkọfiọkke ete ke mme ọkwọrọ-ikọ oro ekekama Ikọ Abasi, ñko ke mmọ ekekwọrọ akpanikọ, enye ama oyom ndikop nto mmọ.
Elymas abia-idiọñ oro, ikoyomke ufan esie emi ekenyenede odudu ọkpọñ imọ. Enye ama ọfiọk ete ebuana ikoduhe ke ukpep-ñkpọ esie emi ekedide eke andidiọk ye eke Paul ye Barnabas. Edieke Sergius Paulus edikabarede edi anditiene-Christ, ufan mmọ eyetre. Abia-idiọñ oro ama ọtọñọ ndiñwana ye edikwọrọ akpanikọ.
Ini ekededi eke ekwọrọde Ikọ Abasi ke Spirit, satan enyene ndiñwana ndibiọñọ mmọ emi ekpañde utọñ. Ke ini owo oyomde ndidi anditiene-Christ, mme owo esidu ekpere emi esidọhọde ete, “Afo udukemeke ndinem obukidem esit edieke afo edide owo Abasi.” Midighe ntre, satan eyetiñ ke suñ-suñ uyo “Ọmọfiọk ete afo uyomke ndinam mme nsana-nyak oro.” “Afo udukemeke ndidu uwem owo Abasi ọkpọtọtọñọ.” “Uwem owo Abasi ọsọsọñ.”
Kpukpru emi edi nsu andidiọk. Baba owo kiet ikopke inem uwem nte anditiene-Christ. Jesus ọkọdọhọ mme anditiene Enye ete “Mma ntiñ mme ñkpọ emi nnọ mbufo, man idaresit Mi odu ke mbufo, idaresit mbufo onyuñ ọyọhọ” (John 15:11). Isaiah, Anditiñ ntiñ-nnim ikọ ama etiñ ñko ete: “Ndien mbufo eyekoi mmọñ ke idaresit ke mme obube mmọñ erinyaña” (Isaiah 12:3).
Edisana Eti-mbuk
Ukpep-ñkpọ Elymas ekeme ndidi se edade edomo ye nsu-nsu ido ukpono emi eyọhọde ye nsio-nsio ndiọi edinam. Ndusuk owo ekeme ndikabare mforo idat oto ke ido nte ebrede ikwọ me nte emiade ubọk, enyuñ eda ete ke oto Spirit Abasi. Ndusuk owo enam se mmọ ekotde edisana unek ndien etie nte ñkpọ eke esiode mmọ ke ikpọhidem efep. Ediwak ekikere, ye se mmọ enamde itoho Spirit Abasi.
Eti-mbuk emi Paul ye Barnabas ekekwọrọde akabaña edisana uwem. Ekenim mme mboho mmọ ke nnen-nnen ido. Paul Apostle anam nnyin ifiọk ite: “Koro Abasi idighe Abasi ndutime, edi edi Abasi emem; nte ido edide ke kpukpru mme ufọk mbon Abasi” (I Ñwed Corinth 14:33).
Ndik ikanamke Paul nditiñ nnọ Elymas nte ke enye edi eyen andidiọk. Edisana Spirit ama odoro Paul, ntre mme ikọ eke enye eketiñde ema ewọrọ esu. Ama etiñ ubiere-ikpe ọnọ Elymas nte ke enye enyene ndidi nnan, ndien ke ndo-ndo oro, edi ntre. Ndusuk ini ubiere-ikpe isisọpke ntre, edi edieke anam idiọk mikabakere esit ubierikpe enyene ndidi ke akpatre.
Ke ini Sergius Paulus ama okokut se Abasi akanamde ebe ke Paul onyuñ okop ukpep-ñkpọ emi Paul ekpepde, enye ama onim Jesus ke akpanikọ. Ukpep-ñkpọ emi ekedi obufa ọnọ enye. Ndusuk ini akananam enye ikokopke ibaña Jesus. Edi ke ini Paul emi Edisana Spirit ekeyetde enye aran ọkọkwọrọde ikọ, enye ama ọdiọñọ akpanikọ.
Emi onyuñ edi owo efen emi ekedide akamba owo ke ererimbot, nte ọsuhọrede idem man enye ekpedi se Abasi emekde. Paul Apostle ini kiet ama ọdọhọ ete: “Ikotde ediwak mmọ emi owo ebatde ke mbon eti ibuot, ikotke ediwak mme enyene odudu, inyuñ ikotke ediwak mbọñ” (I Ñwed Corinth 1:26). Ñwan emi akamanade ke ufọk mbọñ, emi akakabarede edi anditiene-Christ, ini kiet ama etiñ ete, “Ami mmọkọm Abasi ke leta ‘e’. Mmadara koro enye ọdọhọde ete, ‘ikotke ediwak’ edi midọhọke ete “ikotke baba kiet.”
Ukwọrọ-ikọ Paul ye Barnabas ama okut unen, okposuk edi nte satan okodomode ndisin ubiọñọ, ndien ema ekọ ediwak Mmọ-oko (Gentile) enọ obio Ubọñ Abasi.
Questions
MME MBUME1 Ewe isua ke ufọk Abasi ke Antioch ọkọtọñọ?
2 Mme anie ekedi akpa mme ọkwọrọ-ikọ?
3 Anie owo emi ọkọwọrọde etop ọkọbọ erinyaña do?
4 Nso akwa utom okoto ke ufọk Abasi emi okodude ke Antioch aka iso?
5 Akparawa emi akasañade ye Paul ye Barnabas ke akpa isañ ukwọrọ-ikọ mmọ ekedi anie?
6 Mmọ ekeka mmọñ?
7 Mme anie owo ke mme ọkwọrọ-ikọ ekesobo ke isuo oro?
8 Ewe ọwọrọ-iso owo akakabare esit do?
9 Nso ekedi mme item Paul ke abaña ido nte enimde ederi?