Lesson 327 - Senior

Memory Verse

IKỌ IBUOT: “Edi ke akpanikọ ema enam Christ eset ke mkpa, nte akpa mbuñwum ke otu mmọ emi edede idap” (1 Ñwed Corinth 15:20)

Cross References

I Akpanikọ Emi Odude Ke Eriset Christ

1. Asaña ekekem ye se Ikọ Abasi etiñde, 1 Ñwed Corinth 15:1-4; Psalm 16:9,10

2. Mme ntiense eduñọre ekut, 1 Ñwed Corinth 15:5-7; Utom Mme Apostle 4:33; 10,41

3. Paul ke idem esie ekedi ntiense, 1 Ñwed Corinth 15:8-11; Utom Mme Apostle 9:4,17; 22:14,18

II Ufọn Eriset ke Mkpa Christ

1. Emi ọsọñọ owut ete ke mme akpa mkpa eyeset, 1 Ñwed Corinth 15:12-15; Utom Mme Apostle 1:3

2. Enye edi itiat idak-isọñ mbuọtidem nnyin, 1 Ñwed Corinth 15:16,17; Ñwed Mbon Rome 4:25; 10:9

3. Enye edi idorenyin nsinsi uwem nnyin, 1 Ñwed Corinth 15:18,19; 1 Ñwed Thessalonica 4:14

III Mme Ikpehe Eriset

1. Christ edi akpa mbuñwum, 1 Ñwed Corinth 15:20-22; Exodus 22:29; Leviticus 23:10; Mme Ñke 3:9

2. Ndien ñtañ-mbok ndisana ikọt Abasi eyetiene ke ini Ñtañ-Ndọk, 1 Ñwed Corinth 15:23; 1 Ñwed Thessalonica 4:16,17

3. Christ eyebiat odudu mkpa ke ini akpatre eriset ke mkpa, 1 Ñwed Corinth 15:24-28; Eriyarare 20:14

4. Paul etiñ ndisọñọ akpanikọ emi odude ke eriset ke mkpa, 1 Ñwed Corinth 15:29-34

IV Nte Eriset Ke Mkpa Editiede

1. Eda ñkpọ ikpọhidem edomo ye ñkpọ spirit, 1 Ñwed Corinth 15:35-50; 2 Ñwed Corinth 5:1-4

2. Eyekpuhọre ikpọhidem ikọt Abasi emi esuk edude uwem ke ediyip enyin kiet ke ini Christ edidide, 1 Ñwed Corinth 15:51-53; Ñwed Mbon Philippi 3:20,22

3. Eda erikan emen mkpa, 1 Ñwed Corinth 15:54-58; Eriyarare 21:4

Notes

SE EKPEPDE EBAÑA

Nte Ikọ Abasi Etiñde

“Ndusuk owo ke otu mbufo enam didie edọhọ ete eriset mme akpa-mkpa iduhe?” Paul ama ọkwọrọ Eti-mbuk eriset ke mkpa edi ndusuk nditọ Corinth ema esin ndibọ etop emi. Ke ntak emi Paul ọtọñọ ntak ọkwọrọ Eti-mbuk emi enye ọkọkwọrọde etiñ ete ke akpan ñkpọ edi ke Christ akakpa ke ntak idiọk-ñkpọ nnyin, ema ebuk enye, ndien ke ọyọhọ usen ita Enye ama ọtọñọ ntak eset. Enye ama etiñ enyin ndinam otim añwaña mmọ nte ke mkpa Christ ke ntak idiọk-ñkpọ nnyin ama asaña ekekem ye Ikọ Abasi. Ọkọrọ ye mme itie efen, Paul ama ekere itie ñwed emi ke esit esie “Edi Enye akada unan abaña mme idiọk ido nnyin, anuaha abaña mme ukwañ-ñkpọ nnyin; ufen odoro Enye ke idem man nnyin ikut emem; ndien inia esie ọkọk nnyin … Koro esibede enye efep ke isọñ mme odu uwem: Ke abaña mme idiọk ido Ikọt mi ke enye ada ufen. Mmọ enim udi esie ye mme idiọk owo, edi Enye odu ye owo inyene ke mkpa esie” (Isaiah 53:5-9). Ikọ Abasi ama eketetiñ “Koro afo mudukpọñke ukpọñ mi ke obio ekpo; uduyakke owo ima fo okut mbiara” (Psalm 16:10).

Mmọ Emi ekekutde Enye

Mme odu-uwem ntiense nte Cephas, mbet duopeba, mbet ikie ition ke ini kiet, James ye kpukpru mme Mbet emi ekefiọkde Jesus mbemiso mkpa Esie, emi ekenyuñ ekutde Enye ke Enye ama ekeset, ema esọñọ eriset ke mkpa Christ. Mmọ emi kpukpru ema etie ntiense ebaña eriset ke mkpa Esie. Nte ekpenyene ndikañ mme ikọ-ntiense emi? Paul ekeme ndidọhọ ete, mma ñkut Enye! Okposuk edi nte Paul okonimde mme ikọ-ntiense mmọ emi ekekutde Christ, edi ata akpan ifiọk emi enye ekenyenede abaña eriset ke mkpa ekedi ke ini enye okosobode ye Andinyaña emi ekesetde. Kpa ntre okposuk edi enyin ikpọhidem nnyin mikwe Enye, ata akpan ñkpọ emi idade ifiọk Odu-Uwem Andinyaña edi ifiọk emi nnyin inyenede nte ke ema emen mme idiọk-ñkpọ nnyin efep. Mbuọtidem nnyin idighe ikpikpu sia ifiọkde ite Christ akakpa ke ntak idiọk-ñkpọ nnyin, “ekenyuñ enamde Enye eset, man ikpe etebe nnyin” (Ñwed Mbon Rome 4:25).

Idorenyin Nnyin

Idorenyin nditọ Abasi tọñọ ke eritọñọ tutu osim utit ini ọkọñọ ke eriset mme akpa-mkpa. “Edieke nnyin minyeneke se ibede idorenyin ke Christ ke uwem emi, nnyin idi mmọ emi enyenede mbọm ikan kpukpru owo eñwen.” Job ama enyene idorenyin ke eriset ke mkpa esie onyuñ oyom etim efiọk adaña nte enye okofioride ete “Akpakam ewet ndien ikọ mi! akpakam efik mmọ esin ke ñwed! Eda ntañwed ukwak ye ñket ekap ikọ mi esin ke itiat ke nsinsi! Ndien ami mmọfiọk nte ke Andifak mi odu uwem; ndien ke akpatre enye eyedaha ada ke ntan isọñ: Ndien ke ikpọhidem mi ama abiara ama, nyedu ke obukidem mi ñkut Abasi: Emi ndikutde ke idem mi, enyin ikpanesit eyemere” (Job 19:23-27).

Akpa Mbuñwum

Ke ini ibet, nditọ Israel, ekenyene ndida akpa mfri idọk mmọ nsọk Abasi nte ñkpọ uwa. Abasi ama ọñwọñọ ete edieke mmọ edinamde mme ñkpọ emi, mme ufọk unim-ñkpọ mmọ eyeyọhọ kpak. “Kpono Jehovah ke inyene fo, ye ke akpa ubak kpukpru mbuñwum fo: Ndien ebiet unim ñkpọ fo eyeyọhọ kpak, obufa wine eyenyuñ ọyọhọ ke ebiet udighi fo ọduọhọ” (Mme Ñke 3:9,10). Mme akpa mfri emi ekenọde ekedi idiọñọ idọk emi edidide. Ntre Christ ke ini ekesetde ke mkpa, ama akabare edi “akpa mbuñwum ke otu mmọ emi edede idap.” Enye ekedi akpa ndiwọrọ ke otu mme akpa mkpa ye ikpọhidem ubọñ. Enye ekedi akpa mbuñwum— idiọñọ eñwọñọ, eriset obukidem emi ediwọrọde ke udi ke eridi Esie. Idorenyin owo Abasi ke eriset ke mkpa edi odu-uwem idorenyin, koro etetañ akpa mbuñwum, ndien idọk enyene nditiene edem.

Ikpehe Eriset Ke Mkpa

Idighe kpukpru mme akpa mkpa ediwọrọ ke udi ke ini Christ editañde mme andikan ikpọñ isọñ mbemiso ini akwa ukut. “Edi kpukpru owo ke idaha esie; Christ ebem iso eset nte akpa mbuñwum; ekem mmọ emi edide ikọt Christ eyediana ye Enye ke eridi Esie.” Osuk etie nte eriset mmọ emi ekebede ke ukut eyeda itie ke ini Christ ediyarade idem. (Eriyarare 20:4). “Ndien utit edi …” Ke utit ukara Christ ke tọsin isua ke isọñ emi, eyenam mme idiọk owo emi ekekpañade eset. “Enyuñ eda se ewetde esin ke ñwed oro ekpe ikpe mme akpa-mkpa, nte ekemde ye se mmọ ekenamde. Ndien inyañ ibom asana mme akpa-mkpa emi edude ke esit ayak; mkpa ye obio-ekpo enyuñ esana mme akpa-mkpa mmọ eyak: ndien ekpe ikpe kpukpru owo nte ekemde ye se mmọ ekenamde. Enyuñ emen mkpa ye obio-ekpo eduọk ke akwa mkpọdiọhọ ikañ” (Eriyarare 20:12-14). Emi edi akpatre erikan emi Christ edikande mkpa, akpatre asua Esie. Ke obufa enyọñ ye obufa isọñ “mkpa idinyuñ iduhe aba; eseme ye ntuaña ye ubiak idinyuñ iduhe aba; Koro ebe-iso ñkpọ ema ebe efep” (Eriyarare 21:4).

Uduọk-mmọñ

Ndifiak nsọñọ ikọ esie ke abaña ukpep-ñkpọ eriset mme akpa-mkpa, Paul ama anyan ubọk owut mme anditiene-Christ ido uduọk-mmọñ ke ndibuhọ ke mmọñ. Emi ada ọnọ edibuhọ ye Christ ke mkpa Esie, ndinyuñ ñwọrọ ke mbiet eriset Esie. “Mbufo ema ebuhọ ye Enye eset ke baptism; ke enyuñ eda baptism enam mbufa eset ye :Enye, oto ke oro mbufo ebuọtde idem ke odudu: Abasi, emi akanamde Enye eset ke mkpa” (Ñwed Mbon Colossae 2:12). “Mmọ emi enade baptism ebaña mme akpa-mkpa edinam nso? Edieke minamkenam mme akpa-mkpa eset, nsidi ndien ntak emi mmọ enade baptism ebaña mmọ oro?” Mbume emi owut ndisime emi odude ke edibuk owo ke mmọñ ye edinyuñ nsioño mmọ ke mbiet eriset, edieke eriset ke mkpa miduhe. “Mme nte mbufo ifiọkke ite kpukpru nnyin emi ikanade baptism iduk ke Christ Jesus, ikana baptism iduk ke mkpa Esie? Mmọdo ke baptism nnyin ikọbuhọ ye Enye iduk ke mkpa; man, nte Ete akadade ubọñ Esie anam Christ eset ke mkpa, kpa ntre ke nnyin ñko ikpasaña ke obufa uwem. Koro edieke nnyin ima ikadiana ye Enye ke mkpa eke ebietde mkpa Esie, nnyin iyenyuñ idi kiet ye Enye ke eriset eke ebietde eriset Esie” (Ñwed Mbon Rome 6:3-5).

Se IdikpadeYe Se Midikpaha

Eyebup ete, “Edinam mme akpa-mkpa eset didie? Nso oruk ikpọhidem ke mmọ edinyuñ eda edi?” Man ebọrọ mbume emi, Paul ọnọ nnyin ediye uwut-ñkpọ ke mkpasip ibokpot emi etọde ke isọñ. Mkpasip eyemere, edi oto ke se isuhọre oro, emine ọwọrọ emi ediñwumde ukem mkpasip oro eketọde. “Abasi ọnọ mkpasip oro idem nte enemde Enye esit, onyuñ ọnọ kpukpru mkpasip kiet kiet idem eke ekemde ye mmọ” “Etọ ikpọhidem ke mbiara; enam enye eset nte ñkpọ eke mikemeke ndibiara.” Nso utibe idorenyin: ikpọhidem emi akpade ke mmeme, mbiara, ye esuene, ndien emenere ke spirit ye ke ubọñ, ke odudu ye ke idaha eke midibiarake, osuk enyene mbiet idem owo ọtọñọ ntak enyene uduot Heaven! Ibietke aba mbiara ikpọhidem emi obiomode ndo, ubiak ye udọñọ onyuñ ọtuhọde, edi nte ikpọhidem eke midikpaha aba, enye ifiọkke aba ukut. Mme mbiet ye ndiye flawa emi ekpañade ke ini ọkpọsọñ ufiop, enyuñ etibede ekọri, enyuñ esioñode mfri ke ini edim edi uwut-ñkpọ nte ke usen eriset, kpukpru mmọ emi eke edede ke Ọbọñ eyeset eduk ke uwem eke midikpaha aba.

Ekpuhọre Mme Odu-Uwem

Utibe-ñkpọ kiet efen emi Mbet emi akayarade edi ke idighe kpukpru owo edisuhọre ke udi ye mbiara ikpọhidem, edi ke ndusuk ikọt Abasi eyedu uwem tutu osim utibe usen emi Jesus “editode ke Heaven ọsuhọre ye mkpo, ye uyo archangel, ye ukorowo Abasi; ndien mmọ emi ekpañade ke Christ eyebem iso eset: ndien eyemen nnyin emi idude uwem, emi isuhọde, edọk ye mmọ ke ikpa-enyọñ” (1 Ñwed Thessalonica 4:16,17). Kpa ke idaha oro eyekpuhọre ikọt Abasi emi ekande emi esuk edude uwem esio ke mbiara ikpọhidem esin ke ikpọhidem spirit me ikpọhidem ubọñ. “Mmọdo ndima nditọ ete mi, esọñọ eda, ekuyak ñkpọ esehede mbufo; eyọhọ kpukpru ini ke utom Ọbọñ; sia emefiọk ete utom eke mme imọ inamde idiwọrọke idi ikpikpu ke Ọbọñ.”

Questions

MME MBUME

1. Nso idi ntak emi eriset ke mkpa Christ edide akpan ñkpọ ọnọ nnyin?
2. Nso idiọñọ ke nnyin inyene ke abaña eriset ke mkpa Christ?
3. Ndikot Christ akpa mfri eriset ke mkpa ada ọnọ nso?
4. Nso idi akpatre asua Christ emi edisobode?
5. Ke nso utọ usuñ ke edina uduọk-mmọñ ebiet eriset ke mkpa?
6. Nso ukpep-ñkpọ ke nnyin inyene ito mkpasip ke abaña eriset ke mkpa?
7. Siak ndusuk mmọ emi etiede ntiense ebaña eriset ke mkpa.
8. Nso iditibe ye ikpọhidem mmọ emi Christ editade edọk?
9. Anie ekedi “akpatre Adam”?
10. Nso idi ifọt mkpa?