Lesson 327 - Junior
Memory Verse
IKỌ IBUOT: “Ekọm enyene Abasi, emi ọnọde nnyin erikan, oto ke Ọbọñ nnyin Jesus Christ” (1 Ñwed Corinth 15:57).Notes
Etop Emi Paul Ọnọde Esọk Mbon Corinth.
Akpa ye udiana Corinth emi ekotde mme Ñwed, edi mme etop emi Paul ewetde ọnọ esọk ufọk Abasi ke Obio Corinth ke Greece. Paul ama odu ke Obio emi ebe isua kiet ye ubak ọkwọrọ ikọ, ke akpa ifet ọnọ mme Jew ndien ọkwọrọ ọnọ Mmọ-oko (Gentile) ke ini eketọñọde ufọk Abasi emi. Corinth ekedi akwa Obio ye ñkọk ifum ukara mbon Rome. Enye ekedi ata idiọk Obio ndien mmọ emi ekeduñde ke esit esie ema emehe ke ediwak idiọk-ñkpọ. Nte ekpedọhọde ete mkpa edi utit kpukpru ñkpọ, mmọ ema enyime ye ufiet nditọ ufọk-ñwed Epicurus, emi ọdọhọde ete “yak idia inyuñ iñwọñ koro iyekpa mkpa mkpọñ” (1 Ñwed Corinth 15:32).
Edọhọ ete edieke mme owo ekemede ndinyime ndinim ke akpanikọ nte mme imọ idikpa nte mme unam idibigike mmọ eyedu uwem nte mme unam ñko. Akana nte enam mme okpono-ndem ke Corinth etim efiọk ete ke mkpa idighe utit kpukpru ñkpọ; ndien Paul ekedi owo emi Abasi ekemekde ndikama akpan etop emi. Etop oro ikenyeneke mmọ oro ikpọñ, edi aka iso osim ediwak owo mfin ebe ke ikọ Abasi. Ata ediwak owo mfin edu ke idiọk-ñkpọ inyuñ ifeheke iyaresit Abasi emi edisimde mme anam-idiọk usen kiet. “Koro Abasi eyekot kpukpru ñkpọ emi enamde edi ikpe, ọkọrọ ye kpukpru ndibe-ndibe ñkpọ, edide eti, enyuñ edide mme idiọk” (Ecclesiastes 12:14).” Mkpa idighe utit kpukpru ñkpọ, koro “ema enim enọ owo ndikpa ini kiet, ndinyuñ nda ke itie-ikpe ke oro ebede” (Mme Hebrew 9:27).
“Mmọ Emi Edide Eke Christ”
Paul ama emen akpanikọ owut ete ke Christ ekedi akpa andiset ke mkpa ye ikpọhidem ubọñ; ke ntre ekot Enye “akpa, emi ekebemde iso amana ke otu mme akpa-mkpa” (Ñwed Mbon Colossae 1:18). Usen kiet ndinen owo emi ekekpade ke Christ eyeset ewọrọ ke udi, ndien mmọ emi edude uwem enyuñ edide ata mme andikan “edọk ye mmọ ke ikpa-enyọñ man isobo ye Ọbọñ ke enyọñ” (1 Ñwed Thessalonica 4:16, 17) “Udim erọñ” Christ eyebuana ke ubọñ ke edidi Esie; edi inaha eda emi nte utit ererimbot me nte akpatre ubierikpe. (se Eriyarare 20:11-15) kpukpru eyeset, edi yak ikukere ite eyenyaña kpukpru, koro usuk eyedemere eduk ke “nsinsi uwem, usuk ke but ye nsinsi esuene” (Daniel 12:2). Akpatre eriset eyedu ọnọ mme anam ukwañido; okposuk edi, ibuot ñwed emi itiñke ñkpọ ibaña akpatre eriset mme utit ererimbot; Edi etim anyan ubọk owut ke mme ikọ emi “Edikem ke edisim utit ini” (1 Ñwed Corinth 15:24).
Baba, idighe idem mmọ oro ekekpañade ye ekikere “ndibọhọ” mme ubierikpe Abasi ke mmọ mikamanake obufa ke esiak enyiñ mi. Paul ke ibuot ñwed emi etiñ abaña eriset ke ubọñ “mmọ emi edide ikọt Christ”. Christ akakpa ke abaña mme idiọk-ñkpọ nnyin ekenyuñ ebuk Enye, ndien Enye eset ke ọyọhọ usen ita (1 Ñwed Corinth 15:3, 4); ndien enyiñ efen iduhe ke idak ikpa-enyọñ eke edade enyaña nnyin ke mibọhọke enyiñ Jesus (Utom Mme Apostle 4:12). Yak owo baba kiet okukere ete nti utom ikpọñ eyenam imọ ibuana ke; nsinsi uwem oro; yak owo baba kiet okudori enyin ndibuana ke mme ubọñ Heaven ke enye mituaha mkpọfiọk ke mme idiọk-ñkpọ esie man eda iyip Jesus efak enye.
Etọ Ke Mmemidem
Ke ini emi Abasi okobotde Adam, Enye akada ntan isọñ obot enye, enyiñ oro, Adam, ọwọrọ ikonoeto (ndatndat ntan) Abasi ọkọdọhọ enye ete “koro afo edide ntan, eyenyuñ afiak ke ntan,” (Genesis 3:19). Ke ibuot efut emi Paul otim anam añwaña ndisana nditọ Abasi ye mme anam idiọk ete ke Christ ama eset ke mkpa, ndien ke usen kiet ediset eyedu ọnọ kpukpru mmọ emi edude ke udi eke ikpọhidem mmọ ema ekefiak ke ntan.
Paul ada emi odomo ye mkpasip eke etọde ke isọñ. Nso ikọ enem ntem ndida ndomo akan ndidọhọ edibuk! kpa nte mkpasip eke etọde ke isọñ akpade, ndien obufa idem otibe ọwọrọ ke mkpasip oro, ntre ke edi ke ini enimde eyen Abasi ke udi. Ikpọhidem esie afiak ke ntan, edi ke ini edifride akpatre ukorowo obufa ikpọhidem ubọñ eke midibiarake eyewọrọ ke udi. Nso oruk idorenyin ubọñ ke anditiene-Christ enyene! Obufa ikpọhidem emi ikemeke ndikpa me ndidọñọ, mme ndikop mmemidem. “Etọ ikpọhidem ke mbiara------------; ke esuene ---------- ke mmem-idem--- uduot obukidem”; edi enam enye eset nte ñkpọ eke mikemeke ndibiara ---- ke ubọñ --- ke odudu ---- ke uduot spirit”. (1 Ñwed Corinth 15:42-44).
Mme Akpa Mbuñwum Ye Idọk
Ke idak ibet, akana nte mme owo eda mme akpa mbuñwum mmọ esọk Ọbọñ: enañ, erọñ, ibokpot, wine, aran ye idet erọñ (Deuteronomy 18:3, 4). Mme akpa mbuñwum edi ekpri ubak ofuri idọk emi editienede. Mmọdo Christ andida uwem ndi, edi Akpa mbuñwum eriset ke mkpa. Kpa nte Adam ekedide andida mkpa ndi, ntre ke Christ edi andida uwem ndi. “Koro nte kpukpru owo ekpañade ke Adam, kpa ntre ñko ke Christ ke eyenam kpukpru owo edu uwem’ (1 Ñwed Corinth 15:22).
Paul etiñ ete “Christ ama akpa abaña mme idiọk-ñkpọ nnyin”, nte asañade ekekem ye se ñwed Abasi ọdọhọde; enyuñ ebuk Enye; Enyuñ enam Enye eset ke mkpa ke ọyọhọ usen ita, nte asañade ekekem ye se ñwed Abasi ọdọhọde” (1 Ñwed Corinth 15:3, 4). Kpukpru ñkpọ ema ewọrọ esu nte mme anditiñ ntiñ-nnim ikọ eset ekewetde ke abaña Jesus. Ikọ Abasi ọsọñ ada, edi akpanikọ, ke ntre mbume iduhe ke mme akpanikọ eke ewetde ebaña mkpa Christ, edibuk ye ediset, edifiak ndi Esie, mme itie efen ekedide ke ñwed Abasi. Ke ndidian ke se mme Andiwet mme Eti-mbuk ekewetde ebaña eriset, odu mme enyiñ ediwak ntiense emi esiakde ke Ñwed Abasi emi Paul edide kiet, okposuk edi nte enye ọdọhọde ete “mmekpri ñkaha ke otu mme Apostle, ---- koro ñkesinde ufọk Abasi enyin” (1 Ñwed Corinth 15:9). Etie nte ama ọsọñ enye idem ndifen nnọ idem esie ke enye etide mme idiọk-ñkpọ esie ke edem.
Unana Edinim Ke Akpanikọ
“Edi owo eyebup ete, Edinam mme akpa-mkpa eset didie? Nso oruk ikpọhidem ke mmọ edinyuñ eda edi ?” (1 Ñwed Corinth 15:35).
Paul ọbọrọ mbume emi ke ndikot mmọ mme anana ibuot; ke akpanikọ edi unana ibuot owo ndisin akpanikọ oto koro enye mifiọke ntak. Ndusuk owo esidomo odudu Abasi ye ekpri ifiọk mme ukeme mmọ inyuñ ikemeke ndinyime baba ñkpọ ekededi eke minwañake mmọ. Eyak nnyin idu ke otu mmọ emi mikekwe edi enimde ke akpanikọ (John 20:29).
Ini kiet spirit Abasi ama emen Ezekiel, anditiñ ntiñ-nnim ikọ aka ke ebedeñ emi mme nsat ọkpọ ekeyọhọde. Spirit ama obup enye ete, “nte mme ọkpọ emi emekeme ndidu uwem?” (Ezekiel 37:3). Ezekiel ama ọbọrọ ete “Ọbọñ Jehovah, afo ọmọfiọk.” Nnyin imekeme ndikot mbuk emi man ifiọk ite ke Abasi ama anam osip ye obuk ọkọri mme ọkpọ ke idem, onyuñ ọfọri ikpa ndien ofum ofri ibifik esin mmọ ke idem, ndien mmọ edu uwem emi ekedide “akamba udim owo”. Ekenọ ñkukut emi ndinam añwaña Ezekiel ye nnyin nde ete ke odudu Abasi emekeme ndinam ñkpọ eke etiede nte ikemeke nditibe, otibe.
Idorenyin Nnyin
Ata ọkpọsọñ uyo ukorowo ekebem uyo Abasi iso ke ini ekenọde owo ibet ke Obot Sinai. “Uyom ukorowo onyuñ ọsọñ eti eti;” ndien akwa ndik omum kpukpru esit mmọ emi ekekopde uyom ukorowo oro. (Exodus 19:16-19). Akpatre ukorowo eyesioro uyo usen kiet ndien ke uyo ukorowo oro ikpọhidem ndinen owo emi ekekpañade eyewọrọ ke mme udi ndien eyekpuhọre ikpọhidem ndisana owo emi edude uwem esin ke ikpọhidem ubọñ eke midibiarake (1 Ñwed Corinth 15:52, 53).
Iren, iban, mkparawa iren ye iban emi ema ekebọ ata edifen, edinam asana ye Uduọk-Mmọñ Edisana Spirit ye ikañ emi edude uwem eke enemde Abasi esit kebet ini edifiak ndi Jesus ye idara. Ndik baba kiet iduhe ke esit mmọ eke ema ekebeñe idem man esobo “ye Ọbọñ ke enyọñ” ndien ediana ye mmọ emi ema ekebem iso eset edu “ye Ọbọñ ke nsinsi-nsinsi” (1 Ñwed Thessalonica 4:17). Edieke Jesus ebighide ndidi tutu ndusuk mmọ eke edude uwem ke emi ekpaña, idem ekikere oro idaha ndik inọ mme andikan, koro “ifọt” mkpa ama osop. mmọ eyedaha eda ke usen ediset. Mmọdo “ye nnyin iditabade idap ke uwem, ye nnyin idede, ikpodu uwem ye Enye” (1 Ñwed Thessalonica 5:10). Nso utọ idorenyin, emi ọyọhọde ye ubọñ!
Questions
MME MBUME- Anie okokut Christ ke ini Enye ekesetde ke mkpa?
- Nso idiọñọ efen ke nnyin inyene eke ayararede owut ete Enye ama eset ke mkpa?
- Ákpa mbuñwum” ọwọrọ nso?
- Eda didie mkpa edomo ye mkpasip eke etọde?
- Nso editibe ọnọ mmọ emi efakde ke ini edifride ukorowo?
- Nso ke ekot “ifọt mkpa”? Nam añwaña.
- Nso ibet anditiene-Christ ke mkpa ebede? Nso ibet anam-idiọk?
- Afo ekere ete itie nnyin ekpetie didie edieke Christ mikpesetke ke mkpa?
- Nso idi ata akpan ñkpọ emi nnyin inyenede ndinam?