Lesson 335 - Junior
Memory Verse
IKỌ IBUOT: “Nnyin idudu ke Enye, inyuñ isaña ke Enye, inyuñ inyene uwem nnyin ke Enye” (Utom Mme Apostle 17:28).Notes
Ndikwọrọ Eti-mbuk
Paul ye Silas ikokopke mmemidem okposuk edi nte ukọbọ okosimde mmọ. Ini kiet efen mmọ ema eda etop erinyaña eka ke obio efen. Ke akamba obio Thessalonica, mmọ ema ekut Ebiet-ukpono mme Jew kiet, mi ke Paul ekenyene ifet ndikwọrọ ikọ Abasi. Ediwak mbio Greek, iren ye iban, ema enim mme ikọ emi Paul eketiñde ọnọ mmọ ke abaña ndutuhọ Christ ye eriset ke mkpa Esie ke akpanikọ.
Ntre ñko, ekese mme Jew ema efube-ufup sia ediwak owo ema ekekpañ utọñ enọ Paul. Usen kiet otu mbon ndutime ema enam mfina ke Obio eyom Paul ye Silas. Mmọ ekekere ete ke mme ọkwọrọ-ikọ Abasi emi ekedu ke ufọk Jason, edi sia mikekwe mmọ do, mmọ emum Jason eka ke iso mbon obio. Mme asua akpanikọ emi ema efiori ete “Mme anditimere ererimbot emi edi mi ñko-o” (Utom Mme Apostle 17:6). Mmọ ema etiñ enọ mbọñ ete ke Paul ye Silas ekekwọrọ ebaña Edidem Jesus. Emi ama afina mme mbọñ oro eti-eti, edi ke akpatre ema eyak Jason ọnyọñ. Nte etiede, mme ufan Paul ema enam ekikere ete ke ọfọn enye ndikpọñ obio man ọbọhọ mfina. Ke okoneyo, Paul ye Silas ema enam isañ eka ke Berea, ebiet emi ekedarade mmo, do ñko mmọ etiñ enọ ediwak owo ebaña Jesus.
Ke ini ndiọi mme Jew emi edude ke Thessalonica ekopde ete ke Paul ye Silas ke ekwọrọ ikọ-Abasi ke Berea, mmọ esọsọp eka do ndinam mbio obio ebumere esin ntime. Etie nte satan isikopke uyuhọ tutu enye anam kpukpru se ekemede nditre utom Abasi. Kpa ye oro, ema etọ ikọ Abasi ke mme obio emi, ñko, kpa nte ekpri mkpasip emi etọde ke isọñ, enye eyetibe ọwọrọ onyuñ ọkọri onyuñ oñwum mfri ke ebiet eke esit ọbiọñ odude.
Ke Athens
Paul ama aka ke akamba obio Athens, Greece, do ke ekebet Silas ye Timothy ndisobo ye enye. Paul ikabiatke ini emi ke ikpikpu, okposuk edi; kpa nte etiede mfin emi, nditọ Abasi ke enanam ñkpọ enọ Ọbọñ. Nte enye asañade akanare obio esit ofiop enye ndikut nte obio ọyọhọde ye ndem ye mme okpono-ndem. Owo ama ọdọhọ ete ke emem ndikut ndem ke Athens akan ndikut owo. Kpukpru usen Paul aka ke Ebiet-ukpono mme Jew ye ke mme urua mmọ etiñ ọnọ mme owo abaña Jesus.
Obot Mars
Mme owo edu ke mkpaidem. Nso idi emi Paul etiñde abaña esen abasi emi otode idut efen? Nso ke owo emi oyom nditiñ?” ekese edọhọ. Eketie nte ikọ Paul ikọwọrọke ñkpọ, ikpikpu, ndisime ikọ! Nso idi obufa ukpep-ñkpọ emi, Paul? Afo ada oruk “isen ñkpọ emi etiñ esin nnyin ke utọñ.”
Mme owo oro ema ebiere ndida enye ñka Obot Mars, emi ekedide ñkpon ñkan esop ke Areopagus, ekemen Paul eka man nta-ifiọk ke Greece ekpebup enye mbume. Ntre ke Paul ada ke ufọt mme ọfiọk ñkpọ ọdọhọ ete “Nte nsañade mbe, --- ñkut itie uwa kiet, --- EMI ENYENE ABASI EMI OWO MIFIỌKKE.” Enye ekedi nditiñ nnọ mmọ mbaña kpa Abasi oro— Abasi emi okobotde ererimbot ye kpukpru se idude ke esit. Nte akanam mmọ ikopke ibaña Abasi emi miduñke ke mme Itie-ukpono eke ubọk owo enamde? Ikanaha nte mmọ ekere ete ke Abasi ebiet gold, Silver mme ndem itiat eke owo ọsọide. Paul etiñ ete ke ini odu emi Abasi mikesehe, ndusuk ọkọyọde ndisime oro, edi idighe ntre aba; Abasi owuk ete kpukpru owo ke kpukpru ebiet ekabare esit. Ekem Paul etiñ ọnọ mmọ ntak emi anade nte mmọ ekabare esit ekpọñ ndiọi ñkpọ mmọ: Koro Abasi omonim usen eke Jesus edifiakde edi ke ererimbot ndikpe ikpe mme owo ke abaña edinam mmọ ke ererimbot. Abasi akanam Jesus eset ke mkpa man edi Andinyaña mmọ, ñko Ọbọñ “iyomke usuñ ye baba nnyin owo kiet.” (Utom Mme Apostle 17:27), edi se Paul ọkodọhọde. Edieke ọsọñde ndikut Ọbọñ itoho koro Enye oyomde usuñ ọkpọñ nnyin edi oto ke ntak edu-uwem nnyin emi oyomde usuñ ọkpọñ Enye. Enye kebebet ete anam idiọk akabare onyuñ afiak etiene Imọ ọbọ edidahado-nnọ.
Mme Asak Nsahi
Nte mbio Athens ema enim mme ikọ Paul emi ke akpanikọ? Ndusuk owo ema esak ke abaña mbuk ediset Jesus ke mkpa. Tim kere nte mme owo emiomde enyuñ esakde akpanikọ emi abañade eriset ke mkpa, emi edide idorenyin mme anditiene-Christ! Paul ekewet ete, “Edieke mikanamke Christ eset, mbuọtidem mbufo ọwọrọ ikpikpu (1 Ñwed Corinth 15:17). Mmọ eken edọhọ Paul afiak edi usen efen ke ekeme ndidi iyenyene inem.
Ndusuk owo ekere ete ke nte ifiọk mmọ ke abaña Ọbọñ ye Eti-mbuk ekpride, ntre ñko ke idinyene esisit ndibọrọ mbaña. Ndusuk mkparawa iren ye iban ekere ete ke ọfọn mmọ nditre ndika ke ufọk Abasi, man mmọ ekubọrọ ñkpọ ebaña akwa ifiọk mme uñwana eke abañade ikọ Abasi. Edi akpanikọ ete ke mmọ enyene ndibọrọ mbaña mme akpanikọ emi edude ke ofuri ikọ Abasi koro mme akpanikọ emi edu. Eyak nnyin ikpeme man nnyin ekutaba ifet ndikop nnyuñ mkpep mbaña Ọbọñ koro baba ntak kiet iduhe eke edimende ubierikpe Abasi ifep ke akwa usen oro.
Suk ekpri ibat owo ifañ ekenim mme ikọ Paul ke akpanikọ ke abaña Jesus, nnyin inyuñ ikot mme ikọ mfuhọ, “Ntem ke Paul ọwọrọ ọkpọn mmọ.”
Usen ke edi emi Christ edisakde mmọ emi ekesinde ikot Abasi. “Ami ñko nyesak ke ini nnan enyin mbufo: nyenyuñ mbiaña ke ini ndik anamde mbufo” (Mme Ñke 1:26). Usen oro Paul eketiñde abaña: emi Abasi osiode onim eke Enye edikpede ikpe mme owo ke ererimbot abaña mme idiọk-ñkpọ mmọ: Usen oro ke edi. Ke usen oro idighe mbio Athens, Greece, ye mbon Thessalonica ye Berea ikpọñ mmidinyeneke mfaña ndinọ edi ediwak mme owo ke ofuri ererimbot idisioroke uyo ke iso Edinen Ebierikpe. Ema etiñ Eti-mbuk enọ mmọ edi mmọ ikatatke esit mmọ man ebọ. Yak Abasi añwam nnyin ndinyene utọñ eke ikopde ye esit eke inyimede mbuk Jesus ye ima Esie.
Questions
MME MBUME- Nso ikedi ukot ukwọrọ-ikọ Paul?
- Tiñ nte mme Jew emi edude ke Thessalonica ekenemede ñkpọ ye Paul.
- Nso ke Paul akanam ke ini Enye osimde Athens?
- Nso enyiñ ke ekekot Paul ke Athens?
- Tiñ baña ukwọrọ-ikọ ke Obot Mars.
- Nso ikedi Obot Mars
- Nso mbet ibiọñọ ukpono edisọi ñkpọ O-gold, Silver ye itiat?
- Nte mme owo oro ema enim mme ikọ Paul ke abaña eriset ke mkpa Christ ke akpanikọ?
- Nso ke Paul etiñ abaña edinim eriset ke mkpa ke akpanikọ.
- Nso ke eriset ke mkpa Christ ọwọrọ ọnọ nnyin mfin emi?