Lesson 337 - Junior
Memory Verse
IKỌ IBUOT: “Ntre ñko, nnyin, emi iwakde, idi ikpọhidem kiet ke Christ, nnyin kpukpru inyuñ idi ndido inọ kiet eken” (Ñwed Mbon Rome 12:5).Notes
Emenere Apollos Ewut
Ke ini emi Paul Apostle okodude ke Jerusalem, Apollos ama aka ufọk Abasi ke Ephesus, enye ekedi ọkwọrọ-ikọ Abasi emi okotode ke Alexandria, ke Egypt edi. Enye ikedighe owo-mbet Jesus, ndien ukwọrọ-ikọ esie ke akpa ikedighe ukem nte eke Paul, Peter, Barnabas, ye Nditọ Abasi efen emi ekesikwọrọde ikọ ke Ephesus. Apollos ekedi owo Jew, ama onyuñ otim ọfiọk ikọ Abasi; edi enye ikọkwọrọke ikọ-Abasi nte mme Pharisee, mme okpono Abasi ke ido mme Jew emi ekeyirede ke ndikwọrọ ibet ikpọñ. Apollos ama okop ukwọrọ-ikọ John ọduọk-owo-mmọñ ama onyuñ onim ke akpanikọ se enye okokopde.
John ama ọkwọrọ ete: “Mbufo ekabare esit; koro ubọñ Heaven ke ekpere” (Matthew 3:2). Ke mme ukpep-ñkpọ Apollos enye ama ọfiọk ete ke Messiah ekenyene ndidi; edi akpanikọ ke enye ama onyuñ okot ke ntiñ-nnim-ikọ Isaiah nte ke John ọduọk-owo-mmọñ eyedi nte “Uyo andifiori ke desert, ete, mbufo ediọñ usuñ Jehovah, eneñere ọkpọ-usuñ enọ Abasi nnyin ke Wilderness” (Isaiah 40:3). Ke ntre ke ini Apollos okopde ukwọrọ-ikọ John, enye onim ke akpanikọ.
Ekeme ndidi Apollos okodu ke Egypt ke ini utom Jesus, ikonyuñ ifiọkke ite ke Jesus ama edi nte Messiah oro, ndien ke ema ewot Enye ke krọs, ke Enye ama ọtọñọ ntak eset. Mme mbuk ikasuanake usọp-usọp ke ini oro nte edide idaha emi. Ñko ñko, mme Jew emi ekedide mbon usua Christ ikoyomke mbuk oro asuana ndomo kiet.
Ekpep Apollos Ọfọn Akan
Aquilla ye Priscilla, emi ekenamde utom ye Paul emi ekenyuñ esuhọre ke Ephesus, ema ekop inem ke ukwọrọ-ikọ Apollos. Enye ama enyene “ifiopesit ke Spirit, etiñ onyuñ ekpep mme owo ñkpọ abaña Jesus.” Enye ọkọkwọrọ ofuri se enye ọkọfiọkde, inyuñ ikpuhọkere ye se Paul ọkọkwọrọde. Edi enye ikọfiọkke ite ke akwa ñkpọ-ntibe emi enye eketiñde ete ke eyesọp otibe ama adada itie. Jesus ama ededi onyuñ akpa, ama onyuñ ọtọñọ ntak eset.
Aquilla ye Priscilla ema eda enye enyọñ ufọk mmọ enyuñ “etim eyarare usuñ Abasi enọ enye”. Edi akpanikọ ete ke mmọ ema etiñ enọ enye se Paul ọkọkwọrọde, ete ke Christ ama akpa ke krọs nte ufak ke abaña idiọk-ñkpọ, ama onyuñ ọtọñọ ntak eset, ayarare idaha Esie nte Abasi. Ebiet ekededi emi Paul ekesikade enye ọkọkwọrọ abaña Andinyaña emi ekesetde onyuñ ekemede ndibiat odudu idiọk-ñkpọ, emi edinyuñ anyañade kpukpru owo eke ekotde Enye ke mbuọtidem ye erikabare esit.
Ema Enyime Mbuk Oro
Okposuk edi nte Apollos ekedide akamba ọkwọrọ-ikọ Abasi ndusuk enye ama enyene ediwak owo emi eketienede enye, enye ama akpañ utọñ ye inemesit ọnọ mbuk emi Aquilla ye Priscilla eketiñde. Mmọ ekedi mme anam ufọk ọfọñ, edi enye ama ọdiọñọ ete ke mmọ ema enyene odu uwem etop ndien enye ama ọbọ etop oro. Ye esit owo emi anamde akpanikọ ifinake mme anie owo etiñ ọnọ enye abaña Jesus. Eyen-ọwọñ emi ama ekenyene erinyaña ekeme nditiñ mbuk oro ye ọyọhọ uko ukem nte akamba owo. Afo emeti mbuk ekpri eyen-añwan emi ekemumde emi eketiñde ọnọ Naaman owo akpa-mfia oro abaña anditiñ ntiñ-nnim ikọ ke Israel. Enye ekedi ekpri eyen-añwan ye ofin, edi enye ama ọfiọk abaña odudu Abasi Israel, ikonyuñ ikopke ndik nditiñ mbaña Enye.
Apollos Aka Isañ
Ke ema ekenyene ediwak mboho ke Ephesus, Apollos ama aka ke Greece ndikwọrọ ikọ, ndien Nditọ Abasi ema enọ enye ñwed etiñ ete ke Apollos ọkọkwọrọ akpanikọ, ukem nte mmọ ekekopde eto Paul. Paul okonyuñ ọbọ etop oro oto Heaven.
Ọkọfọn didie ete ke Apollos ama ada utibe enọ udọn-ikọ esie anam ñkpọ ndinọ Abasi ubọñ! Enye ama ọfiọk ikọ-Abasi, ñko, ke ntre ama enyene ukeme ndikpe ye mme owo ete ke Jesus ke akpanikọ ekedi Christ. Spirit Abasi ama eti enye kpukpru se enye ekekpepde ke edem, onyuñ ayarare ọnọ enye nte Ikọ Abasi oro okosude.
Eneni
Apollos ama ọkwọrọ ikọ ke Corinth, ebiet efen emi Paul Apostle ọkọkwọrọde ikọ. Mme owo ema enim ukwọrọ ikọ esie ke akpanikọ enyuñ ema enye ke abaña akpanikọ emi enye akasuande. Edi mfina ama adaha ada koro ndusuk owo ema emek Paul Apostle ekan Apollos, ndien ubahare ama odu ke ufọk-Abasi.
Paul ama ewet ñwed ọnọ ufọk-Abasi ke Corinth onyuñ ọdọhọ mmọ ete ke mmọ ema enam se minenke. Mmọ ekpenyene ndikpañ utọñ nnọ etop emi abañade Jesus, enyuñ ekere ebaña Enye, akan nditim ndọñ enyiñ ke andikwọrọ ikọ.
Paul ikoyomke ndiwọñọre esit mme owo nnọ idem esie. Kpukpru ini enye ekemenere Jesus ke enyọñ: enye ñko ama onyime ete ekpedianare imọ ke Christ nte ñkpọ-nsobo, edieke akam edide ke mme Jew eyenyene erinyaña. Enye eketiñ ọnọ mbon Corinth ete: “Edi ami Paul ke idem mi nda ifure-ifure ido ye mmem-ido Christ nnọ mbufo uyo – ami emi ndide owo nsuk idem ke iso mbufo, ke ini ndude ye mbufo, edi nsọñde inua ye mbufo, ke ini mmenduhe ye mbufo: edi mmekpe mbufo ubọk nte, ke ini ndide ke ọtọ mbufo, ñkusọñ inua ye mbufo” (2 Ñwed Corinth 10:1, 2). Enye eketiñ, ikọ ye “akwa uko,” ọkpuhọre ye udọn-iko Apollos, edi odudu Abasi ama odu enye ke idem Abasi ama onyuñ ada utom esie anyaña mme ukpọñ.
Mme ñwed iduhe ke ererimbot emi ekponde ekan eke Paul Apostle. Abasi ekekeme ndida enye nnam ñkpọ koro enye okosuhọrede idem esie onyuñ ọnọ Abasi ubọñ ke kpukpru se ikadade itie ke utom ukwọrọ-ikọ esie.
Paul ama obup ete: “Apollos edi nso? Paul onyuñ edi nso? Mmọ edi mme isuñutom, emi okotode mmọ mbufo enim ke akpanikọ, nte Ọbọñ ọnọde mmọ kiet kiet” (1 Ñwed Corinth 3:5). Mmọ ekedi mme inua emi Edisana Spirit ekebede ke mmọ etiñ. Mmọ eketiñ Ikọ emi Abasi ọkọnọde mmọ nditiñ. Owo ndomo kiet ikpekenyeneke erinyaña ito ke ukwọrọ ikọ Paul mme Apollos edieke Spirit Abasi mikpadaha ubiom-ikpe idiọk-ñkpọ ituk esit. “Edi Spirit anam owo odu uwem: obukidem inọhọ owo baba udori kiet” (John 6:63).
Enyaña Eto Ke Enyiñ Jesus
“Enyiñ baba kiet efen inyuñ iduhe eke enọde ke otu owo ke idak ikpa enyọñ eke enyenede ndida nnyaña nnyin” (Utom Mme Apostle 4:12). Itiat-idak isọñ ukwọrọ ikọ ofuri Nditọ-Abasi edi idaha Christ nte Abasi. Odudu ndomo kiet ikpokoduhe ke enyiñ oro ikan enyiñ anditiñ ntiñ-nnim ikọ me akamba ọkwọrọ-ikọ ekededi edieke Jesus mmikpokotoho Abasi. Paul ọkọdọhọ ete, “Edieke mikanamke Christ eset ke mkpa, se nnyin ikwọrọde ọwọrọ ikpikpu” (1 Ñwed Corinth 15:14). Ke ikọ efen, edieke Jesus mikedighe edisana Eyen Abasi, ufọn ikpoduhe ndikwọrọ ikọ ke enyin Christ. Edi Christ ama eset ke mkpa ye ikpọhidem ubọñ, ndien ikpọhidem ofuri Nditọ-Abasi akpanikọ emi ekpañade ke ukem mbuọtidem oro eyenam mmọ etọñọ ntak edu uwem ke ukem usuñ oro “ke mbiet idem Esiemọ emi enyenede ubọñ”.
Paul ama etiñ abaña Jesus ọnọ Mbon Rome ete “edi ke spirit Esie emi edide ata edisana, eriset emi Enye esetde ke mkpa ama owut ke odudu ete Enye edi Eyen Abasi” (Ñwed Mbon Rome 1:4). Enye ama ayarare idaha Esie nte Abasi ke ndiyak uwem Esie nduọk nnyuñ ntọñọ ntak mbọ nda, ñkpọ eke akanam baba anditiñ ntiñ-nnim ikọ, oku mme edidem ererimbot kiet mikemeke ndinam.
Paul, Apollos, ye Peter (emi ekekotde Cephas ke itie enye emi) ema ekwọrọ mme isọñ akpanikọ emi edude ke Eti-mbuk, ndien mme owo ema ekpañ utọñ ye idaresit enọ mmọ kiet kiet oto ke nsio-nsio usuñ emi mmọ ekedade etiñ mme akpanikọ emi. Kpukpru se mmọ ekekwọrọde ekedi edibọp ufọk-Abasi. Mmọ ekeyom ndiñwam mme owo man ebeñe idem ndisobo ye Jesus, mmọ ikọnyuñ ikwọrọke ikọ ndida ubọñ nnọ idem mmọ.
Utom Eke Enyenede Kpukpru Owo
Ifet odu ọnọ ofuri mme asaña-utom Abasi ndinam utom, ntak inyuñ iduhe owo ndifube kiet eken ufup. (Ke akpanikọ, edieke ufup odude, owo oro ama ọduọk spirit Abasi). Kpukpru mme ọkwọrọ ikọ Abasi enam utom ke abaña ñkpọ kiet. Owo kiet eyetọ mkpasip Eti-mbuk, ndien owo efen ye ukwọrọ-ikọ esie eyebọk mkpasip oro ke mmọñ. Nte ini osuk akade, iñwañ eke spirit oro ekeme ndiyom esio mbiet enọ enye. Ekeme ndidi ukwọrọ ikọ Abasi efen eyewut mme “mbiet” ke uwem owo emi anade nte ewubede efep. Adaña nte ọkwọrọ-ikọ Abasi ọkwọrọde ofuri uyo Abasi, onyuñ odude uwem ekem ye se enye ọkwọrọde, isioho ñkpọ ndomo kiet ifep mme ndisuhọre idaha akpanikọ, enye edi asana-utom Abasi enyuñ enyene ndikpañ utọñ nnọ enye nnyuñ nyime utom esie, ikọñọke mme enye edi anie owo.
Questions
MME MBUME- Anie ekedi Apollos?
- Apollos okoto ke mmọñ edi?
- Didie ke enye ọkọkwọrọ ikọ ke Ephesus?
- Nso ke Aquilla ye Priscilla eketiñ enọ Apollos?
- Nso ikedi eneni ke Corinth?
- Nso ke Paul eketiñ ke ñwed esie ọnọ mbon Corinth abaña idem esie ye utom Apollos?
- Nso ikedi ibuot ukwọrọ ikọ Paul ye Apollos?