Lesson 338 - Junior
Memory Verse
IKỌ IBUOT: “Ọfọfọn ọnọ mbon eke Jehovah edide Abasi mmọ” (Psalm 144:15).Notes
Paul Etiñ Abaña Edisana Spirit
Apostle Paul ama aka ke Ephesus ke isañ esie ndika ke Jerusalem ke ini okotode ke Corinth ke ọyọhọ isañ ukwọrọ-ikọ Abasi esie iba. Enye ama ọkwọrọ ikọ ke ekpri ini ọnọ mme Jew ke mme Ebiet-ukpono mmọ, mmọ ema enyuñ ebọ ukwọrọ-ikọ esie enyuñ eyom enye odu ye mmọ ke anyan ini. Ke utọ ini oro enye ikekemeke ndidu ye mmọ, edi idaha emi ke ọyọhọ isañ ukwọrọ ikọ Abasi esie ita enye ama edi ke Ephesus ndidu ke ekpri ini.
Paul ama okut ke Ephesus ndusuk mme mbet emi ekedide ata mme andinim ke akpanikọ emi ekenyuñ esañade ke kpukpru mme ukpep-ñkpọ emi mmọ ekebọde, ndien enye obup mme mmọ ema ebọ Edisana Spirit. Mmọ ikọfiọkke se enye eketiñde abaña. Mmọ ebọrọ ete, “Baba! Akanam nnyin ikopke ite Edisana Spirit odu.”
Ikpat Kiet Ke Ini Kiet
Ke ini owo ọbọde erinyaña obufa, enye okop inemesit emi etiede nte ikpoyomke mme mfọn Abasi efen kaña. Edi ke akade iso udọñ eyedemere ke esit esie emi oyomde se ikponde ikan. Nte enye ọbọñde akam onyuñ ayakde idem esie ọnọ Abasi, onyuñ onimde edinam-asana ke akpanikọ, enye ọtọñọ ntak okop inemesit oto obufa mfọn emi otode Abasi. Ntem ke enye okop edisana inem! Nso utọ emem odu ke esit esie! Nso utọ ima ke Abasi ọnọ enye! Oto ke mfọn emi enọ enye odudu emi okponde akan ndisọñọ mmum mbuọtidem emi Abasi ọnọde enye ñkama, ndinyuñ ñkan idiọkñkpọ. Ewubede oruñ idiọkñkpọ efep.
Ñkpọ osuk ọsọsuhọ ọnọ owo eke oyomde se ifọnde ikan emi otode Abasi. Jesus ama ọdọhọ mbet Esie mbemiso Enye ọnyọñ ete, yak mmọ ebet ke Jerusalem tutu ebọ eñwọñọ Ete, emi ekedide uduọk-mmọñ Edisana Spirit. Jesus ama ọbọñ akam abaña Edinam Asana mmọ, ama onyuñ enwek Edisana Spirit ọduọk mmọ (John 20:22), edi mmọ ekesuk enyene ndina uduọk-mmọñ Edisana Spirit. Se ikponde ikan okosuk anana ebet mmọ. “Eyenim mbufo baptism ke Edisana Spirit ke usen ifañ mibehe kaña (Utom Mme Apostle 1:5).
Odudu Ndinam Utom
Akwa utom ama odu onọ mme anditiene Jesus ndinam ke ndisuan etop Eti-mbuk. Mmọ ema eyeyom uñwam emi otode Heaven. Jesus ọkọdọhọ ete: “Mbufo eyebọ odudu, ke Edisana Spirit ama edi edidoro mbufo ke idem: mbufo eyenyuñ edi mme ntiense Mi ke Jerusalem, ye ke ofuri Judea ye Samaria, tutu osim utit ererimbot” (Utom Mme Apostle 1:8). Edi odudu oro ke owo kiet ekededi emi oyomde ndinam utom nnọ Ọbọñ ana nte enyene.
Owo inyañake nnyin man itetie idia uwem ke emem, ifure ye inem. Mme edidiọñ Abasi edi utibe, Enye onyuñ oyom nnyin ikop inemesit; edi iduhe owo emi okopde inemesit nte owo emi anamde ñkpọ ọnọ mbon efen. Abasi ọdiọñ nnyin man nnyin idi edidiọñ inọ mmọ efen. Eñwọñọ Esie ndidu ye nnyin enyene mmọ emi edisañade utom inọ Enye. “Mbufo eka ekenam kpukpru mme idut edi mbet Mi.... ndien sese, Ami ndodu ye mbufo kpukpru ini, tutu osim utit ererimbot” (Matthew 28:19, 20).
Edi utọ uduọk-mmọñ emi ke Paul eketiñ ọnọ mbon Ephesus. Nte mmọ ema ebọ enọ emi ọyọhọde ye ubọñ eke edinọde mmọ odudu ndidi ntiense ke ofuri ererimbot? Nte mmọ ema enyene iberedem emi Jesus ọkọñwọñọde ke uwem mmọ? Nso idi ntak, mmọ ikọfiọkke ke mme imọ imekeme ndibọ utọ akwa edidiọñ oro ito Abasi!
Uduọk-Mmọñ
Paul ama obup mbume efen. Edieke mmọ mikokopke ñkpọ ibaña Edisana Spirit, nso oruk usọrọ ke mmọ ekesinam ke ini enade uduọk- mmọñ? Ewuhọ Jesus ke abaña uduọk-mmọñ ekedi ke ana nte enim owo baptism esin ke enyiñ Ete ye Eyen ye Edisana Spirit” (Matthew 28:19). Edieke ekenimde mmọ uduọk-mmọñ ke utọ usuñ oro, mmọ ekpenyene esisit ifiọk ete ke Edisana Spirit odu.
Mbon Ephesus ebọrọ ete ke ikena uduọk-mmọñ nte John eketemede. Nnyin itimke inyene ifiọk ibaña uduọk-mmọñ eke John; edi imotim ifiọk ite ke ofuri utom esie ekedi ndibeñe mme owo idem mbaña edidi Jesus. Etop esie ekedi: “Mbufo ekabare esit; koro ubọñ Heaven ke ekpere.” Ediwak owo ema ewọrọ eka ndikop ukwọrọ ikọ John, edi ndusuk ekekere ete enye edi Messiah. Edi John ọbọrọ ete: “Ami nda mmọñ nnim mbufo baptism man ekabare esit: Edi Enye emi etienede mi ke edem enyene odudu akan mi, emi mmendotke ndikama ikpa ukot Esie: Enye eyenim mbufo baptism ke Edisana Spirit ye ikañ” (Matthew 3:11). Ke ntre, uduọk-mmọñ John ikekemke. Ke ini Jesus ama okokure utom edifak owo ke isọñ onyuñ afiak ọnyọñ ke Heaven, obufa emana ama ọwọrọ odu. Ke ini uduọk-mmọñ Edisana Spirit ama ekedidoro owo 120 oro ke ubet enyọñ, usen duop ke Jesus ama ọkọdọk ke Heaven, emana Edisana Spirit ama ọtọñọ.
Enyene Mmọ Emi Edude Nsan-Nsan
Mme owo emi ekebọde uduọk-mmọñ Edisana Spirit ke usen oro ikedighe ñkukure mmọ emi ekenyenede ndibọ enye. Nnyin ima ikpep ibaña Mmọ-oko (Gentile) emi Edisana Spirit okodorode ke mme isua emi etienede Pentecost (Ọyọhọ Ukpep-Ñkpọ 290, 304). Edidi Paul ke otu mbon Ephesus ekedi ke isua 23 ke Pentecost ama ekebe; ndien ñkpọ nte owo duopeba ema ebọ Edisana Spirit ñko. Apostle Peter ama ọdọhọ ete: “Uñwọñọ oro enyene mbufo ye nditọ mbufo ye kpukpru mmọ emi edude nsan-nsan adaña owo nte Jehovah Abasi nnyin edikotde etiene Enye” (Utom Mme Apostle 2:39). Nnyin imetiene ibuana ye mmọ oro “edude nsan-nsan” nnyin ñko imetiene ibọ Edisana Spirit adaña nte inamde se Abasi oyomde oto nnyin.
Ke ini owo duopeba emi ekebọde Edisana Spirit, mmọ ema esem ke mbufa usem. Usem eke akananam mmọ mifiọkke, ukem nte owo 120 oro ke usen Pentecost ekenamde. Oro osuk edi idiọñọ emi Abasi ọnọde owo kiet ekededi emi ọbọde uduọk-mmọñ Edisana Spirit.
Paul ikekereke ite imokure utom imọ koro owo duopeba ebọde uduọk-mmọñ Edisana Spirit. Enye osuk akaiso oduk ke Ebiet-ukpono mme Jew ndikwọrọ mbaña Jesus man oto do mmọ efen ekeme ndinim ke akpanikọ enyuñ ebọ enọ Abasi. Edi, nte esiwakde ndidi ke ebiet ekededi eke ekwọrọde Eti-mbuk, ndusuk ikonimke ke akpanikọ, ndien mmọ ema etọñọ mfina. Paul ama ọfiọk ete idinamke ọfọn baba kiet ke ndifaña ye mme owo emi miyomke ndinim ke akpanikọ; ndien enye ama ada mbet esie kpa mmọ ekenimde ukpep-ñkpọ Jesus ke akpanikọ, onyuñ aka iso ke mme mboho esie ke ufọk-ñwed ke ebiet eke mmọ midikpañke utọñ inọ mfaña mmọ emi minimke ke akpanikọ. Ke isua iba enye odu ye mbufa ukpọñ oro, tutu kpukpru owo ke obio oro ye mme ñkan-ñkuk esie, mme Jew ye Mmọ-oko (Gentile) ekop ebaña Ọbọñ Jesus.
Erikọk Emi Otode Abasi
Ke ini Paul ọkọkwọrọde Jesus, enye ikọkwọrọke ibaña erinyaña, edinam-asana ye uduọk-mmọñ Edisana Spirit ikpọñ, edi ama ọkwọrọ ñko abaña erikọk emi otode Abasi. Ke ebede ndikwọkwọrọ Paul ama onim ke akpanikọ ete ke Abasi eyebọrọ akam imọ ke ini ibọñde akam inọ mme owo. Abasi ama anam mme ikpọ utibe-ñkpọ sia Paul okonimde ke akpanikọ.
Edinam edinọ ukwọhọre-inua emi eyetde aran emi mme ọkwọrọikọ ema ekenyuñ ebọñ akam erikọk udọñọ esin ke esit ọkọtọñọ ke utọ ini oro. Paul ama esinọ ukwọhọre-inua ye mbọbọ esọk mbon udọñọ ye mmọ emi edidehe spirit ọtuhọrede emi edude ke nnyan usuñ ebiet. Abasi ama esikọk mmọ. Abasi ke okokop onyuñ ọbọrọ akam mbuọtidem mfin ke abaña erikọk udọñọ, ñko ediwak owo ekop odudu erikọk ke ini edade ukwọhọre-inua emi ema ekeyet aran enyuñ ebọñ akam ebaña edori mmọ ke idem.
Mme Edidehe Spirit Enim Ke Akpanikọ
Ama odu ndusuk mme Jew ke Ephesus emi ekedomode ndibin mme ndiọi Spirit oto ke ubre-idiọñ mmọ. Emi eketie ukem ukem nte ukpono-ndem eyo mfin. Ke mmọ ema ekekop nte Paul ebinde mme ndiọi spirit oto ke enyiñ Jesus, mmọ enyuñ edomo ndinam ntre ñko. Edi owo ikanyañake mmọ oto ke Iyip Jesus, ndien mmọ ikenyeneke unen ndinam mme utibe-ñkpọ ke enyiñ Jesus. Ndidehe spirit efiọk Jesus. James ini kiet ko ama ọdọhọ ete: “Afo omonim ke akpanikọ ete Abasi kiet ke odudu: Ọfọn mme demon ñko enim ke akpanikọ enyuñ enyek” (James 2:19). Ediwak owo inyekke idem ibaña Abasi nte mme demon enamde.
Edidehe spirit ke idem owo oro ndiọi mme Jew emi ekedomode ndikọk ama ọdọhọ ete, “Mmọdiọñọ Jesus, mmonyuñ mbure Paul; edi mbufo edi mme anie.?” Owo emi idiọk spirit odude enye ke idem ọfrọ ọkọtọ mmọ, tutu mmọ eda unan enyuñ efeñe iferi ewọñọ ke ufọk.
Ke ini mme owo ekopde se ikotibede mmọ ekop ndik, ndien mmọ etim eyom ndifiọk ñkpọ mbaña Jesus. Ediwak mmọ ema ebọ erinyaña, enyuñ etañ mme ñwed idiọñ mmọ edifọp ke iso kpukpru owo. Ekedi akpan ñkpọ mmọ ndiduọñọ mme ñwed ibọk mmọ ye mme ñkpọ eken eke edade ekpono ndem. Mmọ ekere ete ke mmimọ inyene ndiwa kpukpru uwa ke edu ukpono mmọ man ebin mme idiọk spirit efep, ukem nte mme okpono-ndem enamde mfin. Edi Eti-mbuk Jesus Christ enyene odudu akan Satan. Ini kiet ekededi eke mme okpono-ndem eyomde Jesus ye ekpri mbuọtidem enyuñ eyakde Enye anyaña ukpọñ mmọ, odudu idiọk eyebiara. Ndidehe Spirit idikarake mmọ aba, ndien mme owo oro eyenyene idaresit. Ukpono-ndem inọhọ owo inemesit, edi Eti-mbuk Jesus Christ ọnọ.
Eti Mbuk
Ikọ oro, Gospel ọwọrọ “Eti mbuk.” Ke ini Angel ọkọnọde etop emana Jesus, enye ọkọdọhọ ete, “Ekufehe ndik; koro sese mmada eti mbuk akwa idaresit eke edinyenede kpukpru owo nsọk mbufo” (Luke 2:10). Ñko ke ini Joel, anditiñ ntiñ-nnim ikọ eketiñde abaña emana Edisana Spirit, enye ọdọhọ ete” “O isọñ, kufehe mbufo edara enyuñ ebre” (Joel 2:21). Ke ini Jesus ọnọde mme anditiene Enye mme item, Enye ete, “Edieke mbufo efiọkde mme ñkpọ emi, ọfọfọn ọnọ mbufo ke mbufo enamde mmọ” (John 13:17).
“Ntem ke ikọ Ọbọñ ọkọri ọkpọsọñ onyuñ akara” ke idak ukwọrọ-ikọ Paul. Ebiet kiet ekededi eke emenerede ikọ Abasi ke enyọñ, Abasi eyenyaña mme ukpọñ do. Ikọ etiñ abaña Jesus, ndien Enye ọdọhọ ete, “Ndien Ami, ke ema emen mi ekpoñ isọñ nyedudi kpukpru owo etiene Mi” (John 12:32).
Questions
MME MBUME- Mmọñ ke Paul akaka ke ini ọtọñọde isañ ukwọrọ-ikọ Abasi esie ọyọhọ ita?
- Enye eketie do ebighi adaña didie?
- Nso mbume ke enye okobup mbon Ephesus?
- Nso ke edinam-asana anam ọnọ owo?
- Nso ke nnyin ibọ inyene ke ima ikọbọ uduọk-mmọñ Edisana Spirit?
- Nso ke Jesus ọkọñwọñọ ọnọ mme owo emi edikade ke ofuri ererimbot ndikwọrọ Eti-mbuk?
- Peter ọkọdọhọ ete ke edidọñ Edisana Spirit inọ mme anie?
- Ikafañ ke Ñwed Abasi ewet ete ke ema efiak enọ uduọk-mmọñ Edisana Spirit ke Pentecost ama ekebe?
- Nso ikotibe ke isañ utom Paul ke Ephesus ke abaña erikọk emi otode Abasi ye edibin mme ndidehe spirit nduọk?
- Nso ke ndidehe spirit eketiñ ye ndiọi mme Jew oro?