Lesson 342 - Senior

Memory Verse

IKỌ IBUOT: “Ndien ediwak obio eyeka ekedọhọ, ete, Mbufo edi, nnyin idọk ke obot Jehovah, ke ufọk Abasi Jacob; ndien enye eyekpep nnyin ido esiemọ, nnyin iyenyuñ isaña ke usuñ esie: koro mme ewuhọ eyeto ke Zion, uyo Jehovah eyenyuñ oto ke Jerusalem” (Isaiah 2:3).

Cross References

I Edimenere Christ

1 Anditiñ ntiñ-nnim ikọ ama etiñ abaña edimenere idaha Christ ye edidi Obio-Ubọñ Esie, Isaiah 2:1, 2; Psalm 2:6, 7; Micah 4:1; Eriyarare 19:11-16

2 Kpukpru mme idut eyedu ke idak ukara Christ ke ini Ukara Esie ke Tọsin isua, Isaiah 2:2, 3; Psalm 2:8-12; Micah 4:2; Eriyarare 11:15

3 Ekọñ eyetre ke ini Obio-Ubọñ Christ, Isaiah 2:4; Micah 4:3, 4

II Ukara Edinen Ido

1 Eyekpe ikpe enọ mmọ eke esinde ndiduk ke idak ukara Christ, Isaiah 2:5-9; Psalm 2:1-3; Zechariah 14:17-19; Eriyarare 19:19-21

2 Idiọk-ñkpọ ye ntañidem eyesuhọre ke Usen Jehovah, Isaiah 2:10-18

3 Ukpono-ndem eyetre ndien mme owo eyeyom ebiet udibe ke ini Jehovah edidahade ke enyọñ ndidighi isọñ, Isaiah 2:19-22; Psalm 2:4, 5; Eriyarare 6:12-17

4 Jehovah eyekoñ onyuñ akara ke edinen ido ye emem, Isaiah 2:17; 25:6-9; 35:1-10; Zechariah 14:16, 20, 21; Eriyarare 20:4-6

Notes

SE EKPEPDE EBAÑA

Ke eritọñọ, Abasi ita ke kiet ama otim ese se Enye okobotde, “ndien sese ọfọn eti-eti.” Ema enam ọyọhọ-ọyọhọ ndutim ke abaña uforo ye inemesit enọ kpukpru se ekebotde. Ekeyom kpukpru ñkpọ ye edinam esaña kiet ye uduak Abasi enyuñ edi itoro enọ Enye.

Ikebighike idara ye eti edu-uwem oro ama abiara, koro owo akakpañde utọñ ọnọ onyuñ anamde ndiọi item emi Satan eketiñde ke ñkari esie ebe ke inua urukikọt. Ke ndo-ndo oro ukpọñ owo emi okpodude uwem ke nsinsi ama adianade ọkpọñ Abasi onyuñ akpa ke mme idiọk-ñkpọ oro. Eti uduot emi owo ekenyenede ama abiara, uduot idiọk-ñkpọ akabare oduñ ke ukpọñ owo onyuñ akara uduot ye usuñ owo emi mikabakere esit tutu osim mfin emi. Satan ama odomo ndibọ itie Abasi ye se Enye okobotde, onyuñ ekpere ndikan; edi Abasi osuk ọsọñọ ada ke odudu Esie, ndien usen kiet Enye eyefak ererimbot osio ke ufin emi enye esinede oto ke isuñi idiọk-ñkpọ. Abasi eyedọñ Jesus afiak edi ke isọñ edinim obio-ubọñ Esie onyuñ akara ke edinen ido ke tọsin isua.

Mme Akpatre Usen

“Ndien ama ekem ke utit eyo,” ekedi ñtọñọ ntiñ-nnim-ikọ emi Isaiah eketiñde abaña edidi Obio-Ubọñ Christ. Ke ama ekem ini emi idiọk-ñkpọ ebrede odudu esie ama, ndien etie nte ñkpọ eke Satan ebeñede idem nditop akpatre ita nsobo esie ntọ mme owo ye ererimbot, Jesus eyebiọñọre idaha oro onyuñ anyaña ererimbot osio ke odudu ye uko Satan. “Ekem ñkut nte ebererede heaven; ndien sese, afia enañ-mbakara, Andidoro enye ke edem ekere Anam-akpanikọ ye Ata Akpanikọ, Enye onyuñ asaña ke edinen ido ekpe ikpe onyuñ añwana ekọñ. Ndien udim ekọñ emi edude ke heaven edoro ke mfia enañ-mbakara etiene Enye ke edem, mmọ esine ediye linen emi afiade onyuñ asanade. Edisọp-ofut onyuñ oto Enye ke inua ọwọrọ, man Enye ada ekpeñe mme idut; Enye eyenyuñ ada esañ ukwak akara mmọ” (Eriyarare 19:11, 14, 15). Obio-Ubọñ Christ eyekara ofuri ererimbot. Ñkpọ emi nta mbon-ekọñ ke eset ekeñwanade eyom ndinyene, enyuñ ebiatde uwem mmọ kpa ñkpọ oro ke ediyak enọ Jesus, Eyen Abasi.

Enyene ndik ekọñ eyedu ke ibio-ibio ini ndidiọñ usuñ nnọ ukara edinen ido Christ. Ediwak owo eyeñwana ye Ọbọñ ke usen oro, edi eyesobo mmọ ke ofut emi otode Christ ke inua. Eyekọbi Satan ke tọsin isua ke edituñọ ukpe, enyuñ etop etubom mme isuñ utom esie ye uwem esin ke mkpọdiọhọ ikañ. Mme owo emi edibọhọde ke ini ufen ye ukut emi eyebe eduk ke tọsin isua ukara emem emi minyeneke se edade edomo.

Usuñ Ndiduk Obio-Ubọñ

Ata nnen-nnen ye eti usuñ odu ndibe nduk ke utibe Obio-Ubọñ Christ emi edidide. John ọduọk-owo mmọñ ekedi ñkpọ-utom Abasi ndisian ererimbot mbaña Obio-Ubọñ emi ye ekọm-urua esie: “Mbufo ekabare esit; koro Ubọñ Heaven ke ekpere” (Matthew 3:2). Jesus ama asuan onyuñ anam ukem etop oro añwaña, edi Enye etiñ ete ke uyọhọ ini Obio-Ubọñ oro ndida itie ikedighe ke ini oro. “Edi ke ini mme Pharisee ebupde Enye ini eke Ubọñ Abasi edidide, enye ọbọrọ mmọ ete, Ubọñ Abasi idighe ke ido nte owo okutde enye ke enyin: owo idinyuñ idọhọke ete, se enye mi; midighe, se enye do: koro sese, ubọñ Abasi odu ke otu mbufo” (Luke 17:20, 21).

Kpukpru owo emi enyimede Jesus Christ ke akpanikọ ke esit mmọ enyuñ enimde mbet esie ofuri-ofuri, emana eduk ke Obio-Ubọñ Esie. Mmọ emi ekan odudu Satan oto ke Iyip Eyen-erọñ onyuñ oto ke ikọ-ntiense mmọ. Ata mme andikan emi ekeme ndikpa ke ikpọhidem, edi eyenam mmọ eset enyuñ ediana ye ndisana owo emi edude uwem, eyemen mmọ edọk ke Heaven ndidu ye Christ ke ini Udia Ndọ Eyen-erọñ. Ke ini ediyararede Christ nte Edidem, ndisana owo emi eyedi ke isọñ ye Enye, ndidi mme oku Abasi ye Christ, enyuñ ekara ye Enye ke tọsin isua. (Kot Eriyarare 19 ye 20).

Ke nsobo mmọ, uwak ke esuk eka iso esin ndinam ata mkpe-mbiere ndinam ñkpọ nnọ Christ. Ediwak owo esin ofuri-ofuri ndifiọk akamba afanikọñ emi odude ke ndisin ndinam se anade enam emi edinamde mmọ enyene udeme ke Obio-Ubọñ Christ, edi ñkpọ iduhe ke uwem owo emi okponde akan ndibọñ akam nnyene ata erinyaña. Abasi ọnọ ini ye ifet man nditọ owo ebeñe esit mmọ enọ nsinsi ini. “Ntre, kpa nte Edisana Spirit ọdọhọde, Mfin, edieke mbufo edikopde uyo Esie, Ekusọñ esit mbufo nte mmọ ekesọñde, ke ini mmọ eyatde Abasi esit” (Mme Hebrew 3:7, 8). Kpukpru owo emi esinde ndibuọt-idem nnyuñ ñkop uyo Christ ke uwem emi eyesobo ye udiana mkpa. Ndusuk mme idiọk owo emi mikabakere esit eyenyene ifet ndidu uwem ke ini ukara ke Tọsin Isua, edi mmọ eyesobo ye Abasi ke Akwa Afia Ebekpo ubiere-ikpe. Ndien do ke ediduọk mmọ esin ke mkpọdiọhọ ikañ: “Emi edi udiana mkpa” (Eriyarare 20:14).

Obio-Ubọñ Emi Emenerede

Ke ofuri mbuk emi abañade mme Anditiene-Christ, ererimbot akanam idaha esit kiet inyime Obio-Ubọñ Christ; kpa ye oro, ini ke edi emi kpukpru mme odu-uwem edinyimede Jesus Christ nte Ọbọñ. Mbet Christ ke ekpa utom ke mme isua emi ndida mme owo nduk ke Obio-Ubọñ Christ; edi kpukpru utom emi enamde ke ofuri ukeme ye akpanikọ ididaha uyọhọ Obio-Ubọñ Christ idi ke isọñ. Oro ediyom Edidem ke idem Esie oto ke Heaven edi.

Mme andiduñ isọñ idisuaha Jesus aba enyuñ edọho Enye ete, “Nnyin iyomke owo emi akara nnyin” (Luke 19:14); edi kpukpru mme idut eyebuñọ eduk ke ufọk Jehovah ke Zion. “Ndien ediwak obio eyeka ekedọhọ, ete, Mbufo edi, nnyin idọk ke obot Jehovah, ke ufọk Abasi Jacob; ndien enye eyekpep nnyin ido esiemọ, nnyin iyenyuñ isaña ke usuñ esie” (Isaiah 2:3). Jehovah ikpọñ edikoñ ke usen oro. Ndien mmenere-idem owo eyesuhọre, ntañ-idem mbọñ onyuñ ọduọ. Enye eyebiat kpukpru ibọk. Idighe kpukpru owo ekpono se edade eme (gold) me sidibe (silver) ebot mfin, edi ñkpọ eke edade akpa itie ke uwem owo akan Abasi, me emi owo amade onyuñ okponode akan Abasi, ñkpọ oro edi ndem ndien eyedi se esuade ke usen Jehovah mme udim.

Ini Emem

Mbemiso odudu Satan ye idiọk-ñkpọ oduk ke Iñwañ Eden, ebiet oro ekedi itie emem ye ifure. Mme owo, mme unam, mme inuen kpukpru ekeduñ ọtọ kiet ediana kiet inyeneke ndik ibaña kiet eken. Abasi ama emek awawa ikọñ ikọt ete edi udia ọnọ mme unam ye inuen, edi nte akade iso isuñi idiọk-ñkpọ ama ada edinam emi unam kiet atade unam efen nte udia edi. Ke ini Christ editode ke Heaven odoro ke afia enañ-mbakara edikan Satan ye kpukpru odudu idiọk-ñkpọ, eyekpuhọre udọñ mme unam ye inuen enam etie nte ekedide ke Iñwañ Eden. “Ndien wolf eyeduñ ye eyen erọñ, nawuri-ekpe eyenyuñ ọsuhọre ana ye eyen-ebot: eyen-enañ, ye abak lion, ye enañ ubom, eyenyuñ ena ọtọ kiet: ekpri eyen-ọwọñ eyenyuñ akama mmọ. Ndien uman enañ ye bear eyeta mbiet; nditọ mmọ eyesuhore ena ọtọ kiet: lion eyenyuñ ata nnyanyaña nte enañ. Ndien eyen-nsek eyebre mbre ke enyọñ odudu okuñ, eyen emi adahade ke eba eyenyuñ ada ubọk esie odori odudu ibọm. Mmọ idinamke idiọk, idinyuñ ibiatke ñkpọ ke ofuri edisana obot mi: koro ifiọk Jehovah eyeyọhọ ke ererimbot, kpa nte mmọñ ofukde inyañ” (Isaiah 11:6-9).

Ndien Jehovah eyekpe ikpe ke otu mme idut, onyuñ asua ọnọ ediwak owo. Ye utọ Edidem Ubọñ oro nte Christ ke ibuot ukara ndituak ibuot nnyuñ nnam ñkpọ nnọ, ye nte edikọbide Satan ke edituñọ ukpe, ndien ikọ nsu, isinenyin, ye nte ñkohore-idem edisuhọrede ina ke idem mme idiọk owo, mme owo eyekut nte edide mmem-mmem ndiduñ ke emem ye kiet eken. Mme ñkpọ uñwana ekọñ, mme ofut, ye mme eduat, eyeda edom ñkpọ ufuñ isọñ ye ikwa udiọñ vine. “Idut idimenke ofut itiene idut, mmọ idinyuñ ikpepke aba ekọñ.” Mme idut edomo ofuri ukeme ndinyene emem ke ererimbot, edi nte mmọ esesin ifik eyom emem, ntre ke emem oyom usuñ ọkpọñ mmọ. Ke usen Jehovah mme udim, emem eyedu ke ofuri ebiet, ke ufọk ye ke mme efak, ke idut ye ke mme ikpọ obio. Mme ufọk-esop usioño-ndọ idinamke utom aba, koro ufọk eyefiak edu uwem nte Abasi okonimde ete edi.

Mme Jew

Nte Jesus edifiakde edi ke isọñ ndiyarare idem nnọ mme Jew ye kpukpru owo ke ererimbot, eyemen, “nnan” emi okomumde “Israel ubak-ubak” efep. Do ke mme ikọ Isaiah ediwọrọ osu: “O ufọk Jacob, mbufo edi, nnyin isaña ke uñwana Jehovah” (Isaiah 2:5). Ibat-ibat Jew emi ekesuanade ema enim Jesus ke akpanikọ nte Messiah emi ekeñwọñọde enọ mmọ toto ko, edi nte idut mme Jew ema esin Jesus nte Messiah mmọ. Ata afanikọñ ama etiene idut oro, akpan-akpan tọñọ ke usen oro mme andikara mmọ ekeyomde ekọñ Jesus ke Krọs ewot, edọhọ ete, “Iyip Esie akpakam ọkọbọ nnyin ye nditọ nnyin” (Matthew 27:25). Afanikọñ eke okponde akan osuk ebebet ke iso, tutu ke akpatre mme Jew emi esuhọde eyediọñọ Edidem mmọ ke enyọñ afia enañ enyuñ enyime Enye nte Andinyaña ye Eyen Abasi. “Jehovah onyuñ ọdọhọ, ete, Ndien ama ekem, eyesibe mbak iba ke ofuri isọñ ewot; edi ọyọhọ ubak ita eyesuhọ ke esit. Ndien nyeda ọyọhọ ubak ita nsin ke ikañ, nnyuñ nduk mmọ nte edukde silver, nnyuñ ndomo mmọ nte edomode gold: mmọ eyekot mi enyiñ, ndien ami nyeyere mmọ: nyenyuñ ndọhọ mmọ nte, Mmọ edi ikọt mi: ndien mmọ eyedọhọ, ete, Jehovah edi Abasi mi” (Zechariah 13:8, 9).

Questions

MME MBUME

1. 1 Ini ewe ke Obio-Ubọñ Christ edida itie ke isọñ?

2. 2 Edinim akamba itie ukara ke mmọñ?

3. 3 Mme anie ke otu mme andiduñ isọñ edituak ibuot enọ Edidem ke usen oro?

4. 4 Obio-Ubọñ Christ edikpuhọre didie ye obio-ubọñ ererimbot mfin?

5. 5 Ntak emi Jehovah ekesinde ufọk Jacob?

6. 6 Nso ufen ke edinọ ñkohore-idem ye ntañ-idem ke Usen Ọbọñ?

7. 7 Nso editibe ye ibọk ye mme okpono-ndem ke ini ediyararede Ọbọñ?

8. 8 Obio-Ubọñ Christ edibighi didie ke isọñ?

9. 9 Ikeme didie ndifiọk ite iyedu ye Christ ke Obio-Ubọñ Esie?