Isaiah 6:1-13

Lesson 350 - Senior

Memory Verse
IKỌ IBUOT: “Mme ebe, ema iban mbufo, kpa nte Christ akamade ufọk Abasi, okonyuñ ayakde Idem ọnọ ke ibuot esie; man enye akpada mmọñ ọkọrọ ye ikọ Abasi eyet ọkọp esie, anam enye asana; man akpada enye ọnọ Idem Esie nte ufọk Abasi emi ọyọhọde ye ubọñ, minyuñ inyeneke ntọi mme eriñwine mme oruk ñkpọ eke etiede ntre; edi man enye asana onyuñ anana ndo” (Ñwed Mbon Ephesus 5:25-27).
Cross References

I Ñkukut Isaiah Ke Abaña Abasi Ita Ke Kiet

1. Isaiah ama okut ñkukut ke ema ekekot enye nte anditiñ ntiñ-nnim ikọ, ke ama ọkọbọ utebe-ikpe nte owo Abasi, Isaiah 6:1; 1:1

2. Ñkukut oro okoto andikoñ-ñkan ye edisana Abasi Ita ke Kiet, Isaiah 6:1-3, 6; John 12:41; Utom Mme Apostle 28:25; Eriyarare 4:1-11; 5:6; Ezekiel 1:1-28; Psalm 72:19

3. Se ñkukut emi ọkọwọrọde ama ebe ifiọk owo ke uwem emi, Isaiah 6:4; Exodus 40:34, 35; I Ndidem 8:10, 11

II Nte Isaiah Okokutde Idem Esie, Oto Ke Edinam Enye Asana

1. Ñkukut edisana Abasi ama anam Isaiah okut nda-mmana idiọk ido ye idiọk itie esie, Isaiah 6:5; Exodus 33:20; Luke 5:8; Matthew 5:8; Mme Hebrew 12:14

2. Ema enam Isaiah asana ke ini ikañ ukañ okotukde mkpọk-inua esie, Isaiah 6:5-7; Psalm 51:2, 7; Ezekiel 36:26

III Ikot Isaiah Ye Utom Emi Ekedọñde Enye

1. Isaiah ama enyene ñwọrọ-nda ikot akwa utom emi eketienede edinam-asana esie, Isaiah 6:8; Genesis 17:1-22

2. Edinyime ndiyak idem nnọ akanam Abasi ọnọ Isaiah utom emi, Isaiah 6:8-13; Exodus 3:1-10; 1 Ndidem 19:19-21; domo ye 2 Ndidem 3:11, 12; Utom Mme Apostle 13:2.

Notes
SE EKPEPDE EBAÑA

Ñkukut Ye Se Enye Ekpepde

Mme ukpep-ñkpọ emi enọde ke ñkukut Isaiah ewak, kiet ke otu mmọ edi ediyarare akakan edisana Abasi Ita ke kiet. Ekut ete Abasi ita edu ke kiet, koro Isaiah ama okut Ọbọñ onyuñ okop mme ñkpọ uwem ekọmde Enye ikata nte andinam kpukpru ñkpọ. Mmọ emi Abasi afakde eyeda ukem mfiori itoro emi eka ke iso ebekpo Abasi ke ini Akwa Ukut edidade itie ke isọñ (Eriyarare 4:8; 5:8-10). Idighe ke ndudue ke ikpehe mfiori ita emi enyene kiet-kiet ke otu mbuot Abasi ita ke kiet koro Abasi inamke ndudue, ndien emi inyuñ idighe ñkukure se etiñde ebaña ñkukut Isaiah emi ayararede Mbuot Abasi ita ke kiet.

Abasi Ete ama odu, koro kpukpru ini esinimde Enye nte anditie ke Ebekpo ke Heaven. Idahemi Christ etie ke ubọk nnasia Ebekpo, ndien Edisana Spirit odu ke ererimbot, Enye “eyemen ifiọk abaña idiọk-ñkpọ, ye edinen ido, ye ikpe, otuk ererimbot esit” (John 16:8). Edi John Edima ewet ete ke ini Isaiah okokutde Ọbọñ, enye okokut Jesus! (Se ke John 12:37-41). Ndien ke Utom Mme Apostle, nnyin ikot ite ke Edisana Spirit ama etiñ ikọ ke ini oro! (Se ke Utom Mme Apostle 28:25-27). Mme mfiori itoro ita emi ekenyene Mbuot Abasi ita ke kiet – Abasi Ete, Jesus Christ Eyen, ye Edisana Spirit.

Ke ndidian ke mme eriyarare emi, nnyin imokut ite ke ini Isaiah okokopde uyo Ọbọñ, enye ikokopke uyo otode ke kiet saña-saña, edi okokop uyo ediwak owo edianade kiet, koro Ọbọñ ọkọdọhọde ete: “Anie ke ndidọñ utom? Anie edinyuñ aka ñkpọ ọnọ nnyin?” Ema edọñ Isaiah utom nte asaña-utom nnọ Mbuot Abasi ita ke kiet, edi utom emi ekedọñde enye okoto Abasi ita emi edianade kiet, oro edi ebuana emi owo mikemeke ndifiọk ke ekikere obuk-idem. (Se John 17:21-23; Mme Hebrew 2:11).

Itie ukpep-ñkpọ emi ekpep nnyin ñko ete ke Edisana Abasi ita ke kiet odudu kpukpru ini ye ke nsinsi. “Edisana, edisana, edisana, Jehovah mme udim,” ekedi mfiori itoro, emi owutde ete ke ini oro Christ ekedi kiet ke otu mbuot Abasi ita ke kiet. Mmọ emi edọhọde ete ke Christ ọkọtọñọ ndidu ke ini Enye akamanade ke Bethlehem enam ata akwa ndudue. Enye emi “ekewotde toto ke eritọñọ ererimbot” enọ uduot owo emi etakde (Eriyarare 13:8) sia “Enye odude uwem ke nsinsi ndinam mkpe-ubọk nnọ mmọ” (Mme Hebrew 7:25).

Ekpep nnyin ñko ete ke itoro ye ukpono ke ata akwa idaha eke ọfọnde edot ndinyene Abasi nnyin, ndien nnyin inyene ndinọ Enye nte odotde. Mme ata ñkoñkoñ mmọ emi edade ke Ebekpo efuk iso mmọ ye ukot ke ukpono, kpukpru ini ke etoro Abasi ke ofuri ukeme mmọ. Edieke mmọ oro Abasi obotde emi minamke idiọk-ñkpọ edade ke iso Abasi andikpon ñkan enamde ntre, didie ndien ke nnyin emi ema ekedep ke ọsọñ-urua Iyip ikpanam. Nnyin ikpenyene ndinọ Enye itoro nnyin, erituak-ibuot nnyin, nsọñọ-nda nnyin, utom nnyin—kpukpru ñkpọ nnyin – ke ata ntọtuñọ-ntọtuñọ nsuhọre-idem. Ndisana ñkpọ emi etoro Enye kpukpru ini— mmọ emi akananam mifiọkke idiọk-ñkpọ, ndien ke ntak emi ima Abasi iyarakere inọ mmọ ke abaña mfọn erifak Esie. Nnyin ikpenyene nditoro Enye ñkan, koro nnyin imokut ima oro, mfọn oro ye mbọm oro asañade etiene nnyin ke usen ke usen ke uwem nnyin.

Edinam Isaiah Asana

Isaiah ekedi owo Abasi ke ini emi enye okokutde ñkukut emi. Enye ama ebebem iso edi anditiñ ntiñ-nnim ikọ eke Abasi. Mme anditiñ ntiñ-nnim ikọ eke Abasi ekedi ndisana owo, ndien sia Isaiah mikọbọhọ edinam-asana ofuri-ofuri mbemiso ini emi, ema enam enye asana nte edide ye kpukpru mmọ emi ema ekebọ utebe-ikpe ke akpanikọ. Edi ama odu ini kiet, nte Isaiah ọkọfiọkde, nte edide ñko ye kpukpru anditiene-Christ emi enyenede utebe-ikpe ke akpanikọ, nte enye asañade ke uñwana, ke ini edọñde edinam-asana enọ enye ke nnen-nnen usuñ, ema enam esit esie asana ofuri-ofuri ke idaha kiet. Edisana-ido eke ebatde enọ owo oto ke mfọn Abasi, eyenyene enye adaña ini nte enye minyeneke uñwana eke okponde mme ifet ndibọñ akam mbọ enọ edinam-asana emi enọde oto ke enọ mfọn Abasi, kpa Jesus Christ ye Iyip Esie emi ekeduọkde— ke ini edinam-asana ofuri-ofuri.

Ke ini Isaiah ama okokut idaha esie ke akpanikọ ke iso Abasi ye edisana Abasi nte ayararede ke iso esie, enye ofiori ke ata unana idorenyin: “Mbọm mi! Koro mmakpa: koro ami ndide owo edidehe mkpọk-inua, … koro enyin mi okutde edidem, Jehovah mme udim.” Edikut uyai ye mfọn-mma eke odude ke nsinsi Mbuot Abasi ama anam enye okut ata nnen-nnen idaha esie. Ema enam enye ọfiọk ete enye okosuk enyenyene nda-mmana uduot idiọk-ñkpọ emi enyenede ndisio mfep. Enye ama okut ata unana ukeme esie. Edikut idem esie, nte enye okokutde ama anam edi mmem-mmem ọnọ Abasi ndinam utom ediyet asana emi ekotde, edinam-asana ofuri-ofuri, ke esit esie.

Ọfọn nnyin ndikut idem nnyin nte Abasi okutde nnyin. Ke nnyin inamde ntre, nnyin itua iseme ikot Abasi ye esit mfuhọ. Do ndien ke Abasi ekeme ndinam se Enye amade nnọ nnyin. Eda ikọ Abasi edomo ye ukut-iso. Nnyin ikpenyene ndise ukut-iso kpukpru ini, ye akam ke esit nnyin man nnyin ikpekeme ndikut ata mbiet idem nnyin do. Mme owo kiet-kiet emi mibọhọ edinam-asana enyene ndisọñọ nyire, “Koro emi edi uduak Abasi, ete mbufo ekpekabare esana” (1 Ñwed Thessalonica 4:3). Ndien nnyin emi ima ikọbọ ata eti ifiọk imekeme ndinyene ufọn ke ndida Ikọ Abasi nduñọre idem, koro nnyin inyene ndinam idem nnyin asana kpa nte Enye asanade, ndien ika iso “ọtọñọde ke mbuọtidem” osim ke mbuọtidem, onyuñ ọtọñọde ke ubọñ osim ke ubọñ, tutu nnyin ikut Enye nte Enye etiede inyuñ ikabare ibiet Enye oto ke utibe mfọn Esie.

Ke Efe-esop ke isọñ, ikañ emi okodude ke itie-uwa okpoho edi se ekedomode ke utibe usuñ, ndien ekeda mme ukañ ikañ emi otode ke itie-uwa okpoho eduk ke Edisana Ebiet enyuñ enim ke itie-uwa ufọp incense o-gold, nsuñ-ikañ onyuñ oto do aka iso ọdọk etiene Abasi. Emi ekedi mbiet edinam-asana ofuri-ofuri. Ndien kiet ke otu mme Seraphim ada mbubek ikañ ke itie-uwa, otuk Isaiah ke mkpọk-inua, onyuñ ọdọhọ ete ke “omonyuñ osio isop idiọk ido fo.” Ke ntre ekeme nditim ntiñ nte owo ekekeme, ete ke Isaiah ama ọbọ edinam-asana.

Edinam-asana Isaiah ikedighe nsit-nsit. Edi akayarade ọnọ enye idaha kiet. Enye ikọkọrike suñ-suñ ikesim idaha edinam-asana, ndien okut nte nda-mmana idiọk-ñkpọ osopde ke uwem esie nsit-nsit. Ke ntọi ñkanika kiet, Isaiah okut idem esie nte edidehe owo, ndien ke ntọi efen enye okop uyo seraphim ọdọhọde ete ke ema eyet enye enyuñ enam edi edisana. Edinam-asana edi utom emi eyetde esit owo asana oto ke mbuọtidem ke enye ama akayak idem esie, uwem esie, ukpọñ ye spirit esie ọyọhọ-ọyọhọ ke ndiyom enọ mfọn oro.

Iyekut ite mbubek ikañ emi emende esio ke itie-uwa ekedi idiọñọ ikañ edinam-asana eke Edisana Spirit, edi idighe odudu uduọk-mmọñ Edisana Spirit ye ikañ. Ndutime esiwọrọ oto mme owo emi edomode ndifaña uduọk-mmọñ Edisana Spirit nte edide ñwọrọ-nda ọyọhọ enọ mfọn ita eke owo Abasi. Ema enam Isaiah asana, oro edi, ema emen ukwañ-ñkpọ esie efep enyuñ esio idiọk-ñkpọ esie ke ini mbubek ikañ oro okotukde mkpọk-inua esie. Edisana Spirit ikọnọhọ enye odudu ke ini oro ke ukem ifiọk nte emi owo ọbọde odudu ke ama ọkọbọ Eñwọñọ emi Ete ọkọñwọñọde. Se Isaiah okokutde ekedi utom ediyet nnyuñ nsana eke Edisana Spirit. Enye edi edida Iyip nyet asana, kpa mbubek ikañ emi eyetde anam asana, emi anamde nnyin ibeñe idem ndibọ Edisana Spirit emi edinọde nnyin odudu Esie ọyọhọ-ọyọhọ. Enọ nnyin odudu emi ke ini nnyin ibọde ọyọhọ akwa enọ ita eke Nditọ Abasi, kpa uduọk-mmọñ Edisana Spirit.

Isaiah ama ọbọ edinam-asana, ibọhọke ke usen Pentecost ikpọñ ke ekeyak uduọk-mmọñ Edisana Spirit enọ mme owo ke akpa ini. Iberedem ikekemeke ndidi ibọhọke tutu Jesus ọdọk ke enyọñ, ke ntre baba owo kiet ke otu mme ndisana owo ke Akani Ediomi ikọbọhọ uduọk-mmọñ Edisana Spirit. Edi ata ediwak ndisana owo ke Akani Ediomi ema ebọ edinam-asana enyuñ etiñ ikọ-ntiense ebaña akpanikọ oro ke ndisaña ke ererimbot ke ata edisana uwem emi suk mmọ emi ebọde edinam-asana ekemede ndifiọk.

Utom Emi Ekedọñde Isaiah

Abasi okot kpukpru owo. Ibat-ibat owo eyere ikot Abasi, ndien Abasi emek mmọ, ndien nte mmọ esinde ifik esaña ke usuñ Abasi, mmọ edi mme anam-akpanikọ (Matthew 20:16; Eriyarare 17:14). Ndusuk mmọ emi eyerede ikot Abasi enyuñ ebọde erinyaña edi mmọ emi Enye okotde onyuñ emekde ọnọ mme akpan utom Esie (1 Ñwed Corinth 12:28; Ñwed Mbon Ephesus 4:11-13). Ekekot Isaiah nte anditiñ ntiñ-nnim ikọ eke Abasi mbemiso enye ọbọ edinam-asana, edi ke ema ekeyet nda-mmana idiọk-ñkpọ esie, utom esie aka iso ọsọñọ ndien ekedọñ enye saña-saña utom ebaña mfiak-edem Israel.

Ekenọ Isaiah ata akpan etop ada ọsọk mme owo, man mmọ ekuka iso ke usuñ mmọ, man ekim ye ufin editiene mmọ. Ekedọñ enye ata akpan utom enyuñ ebeñe enye idem saña-saña enọ utom emi. Mme Ñwed efen emi ewetde ntiñ-nnim ikọ esie eneñere etie ntiense ete ke enye ama anam akpanikọ ke ikot esie ọnọ oruk esie. Eyarare akakan ye mme utibe-ñkpọ enọ nnyin oto ke etop emi enye ke nda-usuñ Edisana Spirit adade ọsọk nnyin oto ke Abasi. Ewet enyene-ndik ubiere-ikpe ye ata idiọk utip emi otode ke ntak idiọk ñkpọ, ye nsọñ-ibuot ye Abasi, esin ke ñwed Isaiah. Ema ekot enyuñ emek enye, enye onyuñ anam akpanikọ tutu osim mkpa esie.

Questions
MME MBUME
  1. Siak mme akpan ñkpọ emi ekpepde nnyin ebaña Abasi oto ke ñkukut Isaiah.
  2. Nnyin isaña didie idiọñọ ito ke itie edikot ñwed emi ye ke mme itie efen ke Ñwed Abasi, ite ke Owo ita edu ke mbuot Abasi kiet?
  3. Nso ke Abasi ndisuhọre ndidu ke Itie-ukpono ke Idemesie akanam?
  4. Nso ke ñkukut oro akanam ke idem Isaiah?
  5. Nso ke Seraphim akanam onyuñ etiñ ndibọrọ ikọ emi Isaiah eketiñde abaña idem esie?
  6. Nnyin inam didie ifiọk ite ke Isaiah ama ọbọ edinam-asana ke ini emi?
  7. Nnyin inam didie ifiọk ite ke Isaiah ikọbọhọ uduọk-mmọñ Edisana Spirit ke ini emi?