Lesson 351 - Senior
Memory Verse
IKỌ IBUOT: “Ikọt mi, mbufo eka ekeduk ke mme ubet mbufo, enyuñ eberi itim mbufo ebaha idem mbufo: edibe ini esisit ntem, tutu ikpahesit ebe” (Isaiah 26:20).Cross References
I Mme Ubierikpe Abasi Ke Isọñ
1. Ọbọñ eyenam ibat ye mme andiduñ isọñ, Isaiah 24:1, 3, 4; 26:21; 34:1-3; 13:11; Matthew 24:21,22; 2 Ñwed Thessalonica 1:7-9
2. Ubierikpe Abasi eyedi ọnọ kpukpru owo, Isaiah 24:2; 34:2-5; John 12:48; Ñwed Mbon Rome 2:8, 9; Ñwed Mbon Colossae 3:25; 1 Peter 1:17
3. Isuñi osim isọñ ke ntak idiọk-ñkpọ owo, Isaiah 24:5-12; Genesis 3:17; Jeremiah 44:22
4. Eyesuhọ ibat-ibat owo ndien mmọ eyetoro Abasi, edi mme idiọk owo idibọhọke, Isaiah 24:16-18, 21, 22; 34:6-8; Mme Ñke 11:21; 19:5; Amos 9:1-4; Matthew 23:33; Ñwed Mbon Rome 2:3; Mme Hebrew 2:3
5. Isọñ eyewọñọre aka iso, afiak edem nte owo akpa mmin, Isaiah 24:19, 20; 2:19; 13:13; Eriyarare 11:19
II Ubọhọ Enyene Ndinen Owo
1. Ndinen owo emi ekekpade eyeset ediana ye ndinen owo emi esuk edude uwem ndien eyemen mmọ edọk ke Heaven mbemiso ini ukut, Isaiah 26:19, 20; 1 Ñwed Corinth 15:19-22, 51-54; 1 Ñwed Thessalonica 4:13-17; Eriyarare 20:4
2. Ọbọñ Mme Udim eyekara ke Jerusalem ke ukut ama ebe, Isaiah 24:23, 2:1-3; Zechariah 14:9, 16, 17; Eriyarare 11:15; 19:11-16.
Notes
SE EKPEPDE EBAÑA“Eyenyuñ ekwọrọ Gospel ubọñ Abasi emi ke ofuri ekondo nte ntiense enọ kpukpru mme idut, ndien adañoro ke utit eyedi … koro ke ini oro akwa ukut eyedu, oruk eke akanam miduhe toto ke eritọñọ ererimbot tutu osim emi, eke midinyuñ iduhe aba” (Matthew 24:14, 21). Ekwọrọ Eti-mbuk Obio-Ubọñ Abasi emi ke mme idut ererimbot ndien ekese owo emesin enye; ke ntre Akwa Ukut enyene nditiene mme ñkpọ-ntibe. Ke imenerede enyin ise ererimbot mfin, imekeme ndikut mme utom ekim eke idiọk-ñkpọ akamade ye mme utom satan eke eyọhọde ererimbot nte eyararede añwa-añwa. Etie nte adaña nte ifiọk ye ukpep-ñkpọ ekoñde ke ererimbot ntre ke edinen ido ye ata ima Abasi ọsuhọre. Ñwed Abasi etiñ ete “Edi ndiọi owo ye mbon abiaña eyedọdiọñ ediọk eka iso, ebiaña owo, owo eyenyuñ ebiaña mmọ” (2 Ñwed Timothy 3:13).
Mme Ubierikpe Emi Edidide
Abasi ọnọ ntọt ke Ikọ Esie ndiwut nte ke anam-idiọk ye idiọk-ñkpọ idibọhọke ufen. Ntiñ-nnim ikọ Isaiah ọnọ uwut-ñkpọ ndiwut nte ubierikpe emi editarade ke usen iyaresit Abasi. “Sese Jehovah añwaña ñkpọ ke isọñ efep, anam enye edi ukpọk, onyuñ okubi iso esie, onyuñ asuan mme andiduñ enye” (Isaiah 24:1). Baba owo kiet idibọhọke ubierikpe Abasi ke usen oro. Kpukpru owo eyebọ ufen ke ntak idiọk-ñkpọ emi mmọ ekenamde. Mme owo eyebọ ufen kpa ye mme anditiñ ntiñ-nnim ikọ abiaña emi ekpepde mmọ, ekenyuñ enọde mmọ abiaña-abiaña usuñ ubọhọ, mme ete-ufọk emi ekenyenede ukeme ndida okuk mmọ ndep kpukpru ñkpọ isọñ emi ye inemesit uwem eyebọ ufen ukem ye mme ifin emi ekenamde utom enọ mmọ; mme eka ufọk ye ifin iban mmọ, mme andidep ye mme andinyam, mme andibuọt ye mme andinọ ke ebuọt kpukpru mmọ eyesobo ye iyaresit ye ubierikpe Abasi sia mmọ ekesinde usuñ erinyaña emi Abasi akasiakde ọnọ mme andiduñ ke ererimbot.
Edibiat Ediomi
Isaiah, kiet ke otu mme ikpọ anditiñ ntiñ-nnim ikọ ke Akani Ediomi ekedi anditiñ ntiñ-nnim ikọ emi ọkọkwọrọde abaña erifak owo; edi enye ama etiñ abaña ubierikpe eke edidide ọnọ ndusuk idut ye ofuri ererimbot. Etie nte ubierikpe emi etiñde ebaña ke Isaiah 24 enyene ofuri ererimbot enyuñ ewut mme akpan ntak ubierikpe emi do: “Koro mmọ eduede mbet, ebiatde ewuhọ, enim nsi-nsi ediomi ke ikpikpu.”
Kpukpru idiọk-ñkpọ mme owo eyayat Abasi esit, edi ndusuk enye emi ayatde akan edi ndisin Christ. Tọñọde ke ini emi owo akanamde akpa idiọk-ñkpọ, Abasi ama ọñwọñọ ete iyenọ Andinyaña emi edisiode isop idiọk-ñkpọ owo. Nsinsi ediomi emi enyene kpukpru owo. Ke kpukpru mme isua emi, Abasi edemere eñwọñọ emi, ndien se Enye ọkọñwọñọde asaña ekpere tutu Abasi ọnọ Eyen Esie Jesus Christ edi ke ererimbot man edibọ ufen nte eyen-erọñ uwa ke krọs man kpukpru owo ebọhọ oto ke Iyip Esie. “Abasi … owuk kpukpru owo ke kpukpru ebiet, ete mmọ ekabare esit: koro Enye omonim usen eke Enye edikpede ikpe ọnọ ererimbot ke edinen ido, ke ubọk Owo emi Enye ekemekde; Enye onyuñ ada erinam emi Enye anamde Owo oro eset ke mkpa ayarade owut kpukpru owo ete edidi ntem” (Utom Mme Apostle 17:30, 31).
Ñkukure usuñ ndibọhọ ndik ye ufen Akwa Ukut edi ndinam item emi odude ke nsinsi ediomi, ke ikọ efen, nim Jesus Christ ke akpanikọ, kabare kpọñ idiọk-ñkpọ emi akanamde, ma Abasi nyuñ nam item Esie ke ofuri esit, ke ofuri ukpọñ, ke ofuri ekikere ye ke ofuri odudu. Edi ñkpọ mfuhọ nditiñ nte ke ofuri-ofuri uduot owo inyimeke inyuñ isukke idem inọ se idude ke ediomi emi. Sia mmọ mibọhọ ima akpanikọ emi man enyaña mmọ, ata ekese owo ke ererimbot etie ebet nsobo.
Akwa Ukut
Ke ediwak isua idahemi, idiọk-ñkpọ ada ata akamba ubak uwem owo, edi Akwa Ukut edidi ini saña-saña ubierikpe. Mme ini afanikọñ esidu, edi akanam ini iduhe ke ñwed ñkpọ-ntibe ke ekondo emi edidade edomo ye ini emi Ikọ Abasi etiñde mi abaña. Akwa Ukut eyebighi ke isua itiaba. Ukperedem ini oro edidi ini eke enyene-ndik ubierikpe edisimde mme andiduñ ke isọñ, owo Jew ye Mmọ-oko (Gentile) ukem oto ke unana ido Abasi ke uwem mmọ ye edisin eke mmọ esinde Eti-mbuk Christ. Ini emi edidi ini nnanenyin, ubiak ye eseme ke ikpọhidem ye ke ukpọñ, ọnọ kpukpru oruk owo. Idiọk-ñkpọ ye ibak eyekoñ osim utit esie ke usen enyene-ndik ubierikpe emi. “Se ededi owo ọtọde kpa oro ke enye edidọk,” Ikọ Abasi etiñ emi ọnọ nnyin, ndien ini idọk ke edi kpa nte ini utọ.
Enam nditọ owo etim efiọk oto ke Ikọ Abasi ete ke idighe ekpri ñkpọ owo ndiwọñọre ñkpọñ Abasi nnyuñ ndọk utip idiọk-ñkpọ. Ndusuk owo eñwana ndiwut unana ifiọk mmọ mbaña Abasi ye ibet Esie, edi Abasi ọdọhọ ete “mmọ ekekoi efre” (2 Peter 3:5). Mfaña ididuhe ke ini ubierikpe emi koro enọ owo utibe ufañ ndisioño idiọk-ñkpọ mfep ke esit. Ubierikpe idighe se inem-inem ukot ukwọrọ-ikọ, edi ata akpan ubak ke Ikọ Abasi; akpan-akpan ke isede mme ñkpọ eke enyeñere ererimbot.
Asua Christ
“Mbọm isọñ ye inyañ koro andidori ikọt Abasi ikọ ama ọsuhọre etiene mbufo; Enye asaña ye akwa ifuresit, sia enye ọdiọñọ ete ini imọ edi ibio” (Eriyarare 12:12). Andidiọk ama añwana ke Heaven edi ikakanke, ntre enye eyenam se ekekeme ke isọñ ndinam uduak Abasi okpu. Ndo-ndo oro edimende ufọk Abasi, oro edi Ikọt Abasi emi ekande, ekpọñ isọñ edọk ke enyọñ, Satan eyetim udim ekọñ onyuñ anam uduak esie ndikara isọñ.
Jesus ama edi nte Ikọ ke obukidem, Eyen Abasi emi ayararede ke obukidem; ntre Asua-Christ eyedi nte Satan ke obukidem, Satan ke idem esie. Eneñere etiñ ọyọhọ-ọyọhọ ke Ñwed Abasi, edu uwem Asua-Christ emi. Enye edi enye emi miteñeke ibet, inyeneke ukpono inọ ibet owo me eke Abasi. Emi otim ayarare ke eyo emi koro nnyin idu ke ini eke owo mibatke ibet ke ñkpọ. Kiet ke otu mme ñwọrọ-nda ñkpọ emi odude ke ebuana idut ye idut, edi ndisin mbet, me ediomi, me ikọ ubiọñ ke ndek; owo idaha mmọ ke ñkpọ. Ndusuk idut ñko esin ofuri Ibet Abasi ke ndek. Mme ñkpọ emi edi ndusuk idiọñọ emi ewutde edisọp ndi Asua-Christ emi.
Enye edidi andifik emi okopde uyuhọ akan ke otu mme andifik eken, onyuñ ofuk mmọ kpukpru. Enye eyeda nnem-inua ọbọ eti idaha ada; edi ndo-ndo oro enye ọsọñọde idaha esie, enye eyenam uduak esie ke ufik. Ke Daniel etiñde abaña enye, ọdọhọ ete ke enye, “eyekpono Abasi mkpọsọñ.” Ke ikọ efen enye eyekpono mme odudu ekọñ.
Ke eyo emi, sia ererimbot etimde ñkpọ-ekọñ ke ofuri idaha enyuñ eyomde ndibon mme idaha ukpeme, odudu uñwana ekọñ akabare edi ọwọrọ-iso ñkpọ ke ediwak idut. Emi akabare edi se mme idut eberide edem ke esit man uduak mmọ okposu; ndien ukara ke odudu akabare edi ñwọrọ-nda ñkpọ eke utọ idut emi enamde. Mmọ iberike edem ọkpọsọñ ke ubierikpe ye ikọ emem emi mme idut enimde. Mmọ idomoke aba ndisobo ọtọ kiet ntiñ mbaña mme mfina mmọ nnyuñ mbiere ke emem; edi emek ndinyene udọñ esit mmọ ke ọkpọsọñ ubọk, emi edi kiet ke otu mme mkpọsọñ edu uwem asua-Christ.
Idiọñọ Unam
Uwem Christ ọwọrọ ada akan kpukpru mme uwem eken, nte Enye emi adade ke ibuot Edinen ido Abasi ọnọ ererimbot emi. Asua-Christ ke ñkañ eken, eyedi nte andida nnọ ukwañ-ido. Ke akpanikọ enye edidi idiọk unam idiọk-ñkpọ, enyene-ndik unam. Ikọ Abasi okot enye unam; ndien kpukpru mme andiduñ ke isọñ ke ini ukara asua Christ enyene ndinyene idiọñọ unam ke ọkpọ-iso mmọ me ke ubọk nnasia mmọ midighe eduọk uwem mmọ. Ñkpọ eyesọñ ye owo, enye eyenyuñ anam “baba owo kiet okunyene ukeme ndidep ñkpọ mme ndinyam ñkpọ ke mibọhọke owo eke enyenede idiọñọ oro kpa enyiñ unam oro mme ibat enyiñ esie” (Eriyarare 13:17). Ata akwa isuñi ana ọnọ mmọ emi edibọde idiọñọ unam oro; “Edieke owo atuakde ibuot ọnọ unam oro ye mbiet esie, onyuñ ọbọde idiọñọ ke ọkpọ-iso mme ke ubọk, enye nde eyeñwọñ wine ifuresit Abasi, emi ebuakde enana mbọm ke cup iyaresit Esie; eyenyuñ etuhọre enye ke ikañ ye brimstone ke iso nti angel ye ke iso Eyen-erọñ: ndien nsuñ-ikañ ndutuhọ mmọ eyedọk ke nsinsi-nsinsi: mmọ inyuñ ikopke nduọk-odudu ke uwemeyo ye okoneyo kpa mmọ eke etuakde ibuot enọ unam oro ye mbiet esie, ye owo ekededi eke ọbọde idiọñọ enyiñ esie” (Eriyarare 14:9-11).
Usuñ Ubọhọ
Nte ikotde ke Ñwed Abasi ibaña ukara asua-Christ ye mme enyene-ndik ñkpọ-ntibe emi edidade itie ke ini Akwa Ukut, nnyin ikpenyene ndikọm Abasi sia Enye onimde usuñ eke ikemede ndibọhọ oruk ini oro. Jesus Christ ke afiak edi ke isọñ nditañ ndinen owo emi etiede ebet Enye kpa nditọ Esie emi ema eketim idem ebeñe ndisobo ye Enye. “Koro Ọbọñ ke Idem Esie eyeto ke Heaven ọsuhọre ye mkpo, ye uyo archangel, ye ukorowo Abasi; ndien mmọ emi ekpañade ke Christ eyebem iso eset: ndien eyemen nnyin emi idude uwem, emi isuhọde edọk ye mmọ ke ikpa-enyọñ, man isobo ye Ọbọñ ke enyọñ: ntem ke nnyin ididu ye Ọbọñ ke nsinsi-nsinsi.” (1 Ñwed Thessalonica 4:16, 17).
Abasi ama onim Noah uwem ke ini ekesobode ererimbot ke mmọñ ukwọ; Enye ama onim Lot uwem ke ini ekesobode Sodom ye Gomorrah; ndien Enye ama onim Israel uwem ke ini angel afai akasañade ebe ke isọñ Egypt. Kpasuk ntre ñko, Enye onim usuñ ọnọ ikọt Esie ndibọhọ Akwa ukut. “Ikọt mi, mbufo eka ekeduk ke mme ubet mbufo, enyuñ eberi itim mbufo ebaha idem mbufo: edibe ini esisit ntem, tutu ikpahesit ebe. Koro, sese, Jehovah ọmọñ oto ke ebiet Esiemọ ọwọrọ, ete inọ ererimbot ufen ibaña mme idiọk ido mmọ: ndien isọñ eyeyarare iyip esie, idinyuñ ifukke aba nditọ esie emi ekpañade afai” (Isaiah 26:20, 21). Akpana nte nditọ owo eda ifet emi ke ikot Eti-Mbuk mfin, koro ke usen ke usen mme idiọñọ ndiwut nte ke usen edidi Christ ekpere, ke ewọrọ ewut idem.
Questions
MME MBUME- Nso inam Abasi ọñwọñọ ete ke ubierikpe eyesim isọñ?
- Mme anie ke otu mme andiduñ isọñ edibuana ke ubierikpe Abasi ?
- “Nsinsi ediomi” ọwọrọ nso ọnọ ererimbot mfin?
- Didie ke mme owo ebiat “nsinsi ediomi”?
- Ini ewe ke Akwa Ukut edisim isọñ?
- Nso iditibe ye mmọ emi edibọde idiọñọ unam ke ini Akwa Ukut?
- Tiñ mme enyene-ndik ñkpọ emi editibede ke isọñ ke ini Akwa Ukut?
- Ke nso utọ usuñ ke ikeme ndibọhọ Akwa Ukut?