Lesson 342 - Junior
Memory Verse
IKỌ IBUOT: “Jehovah ikpọñ-ikpọñ okoñ ke usen oro” (Isaiah 2:11).Notes
Ata Akpan Ñkpọ
Nte ini ebede mme usen enyuñ ebede ñko, udọñ ekeme ndidu ke esit fo ke abaña mme ñkpọ emi afo mukemeke ndinyene. Ndusuk ekeme ndidi usen ndika akamba ufọk-ñwed, midighe udọñ ndika anyan isañ man ese mme itie ke ekondo. Ekeme ndidi afo udunyeneke ifet ndinyene kpukpru udọñ esit fo, edi mme ñkpọ edu emi anade nte afo ọfiọk ete ke imọ imada inyene. Mme ñkpọ edu emi mifọnke owo ataba. Yak nnyin itim ida ini ikere ibaña mme ata akpan ñkpọ ke uwem.
Nnyin imekpep ke ukpep-ñkpọ edem nte ke mme anditiñ ntiñ-nnim ikọ eke Abasi emi ekewetde Ñwed-Abasi ekeda odudu Spirit ewet, ndien ke ofuri Ikọ Abasi enyene ndisu. Isaiah, kiet ke otu ikpọ mme anditiñ ntiñ-nnim ikọ, ama ewet ediwak ñkpọ emi editibede ke ini iso. Ke ñwed Isaiah ibuot iba nnyiñ imokot ndusuk ikọ emi edide ukem ye se Micah ekewetde, emi nnyin ikekpepde ito ọyọhọ ukpep-ñkpọ 330. Se mme afo eyekut mme ukem ufañ ñwed Ikọ Abasi oro. Owut ete ke ekedi ata akpan ñkpọ, midighe Abasi ikpọkọdọhọke anditiñ ntiñ-nnim ikọ Esie iba ewet ukem ikọ. Edi ofuri akpanikọ ndien eyesu; okposuk edi, edipde nnyin nnen-nnen ini emi ñkpọ emi edidade itie. (Matthew 24:36, 42).
Usọp-Usọp Edidi
Man nnyin ikudu ke ndutime ke abaña mme ñkpọ ntibe ini iso ye usuñ nte mmọ edidade itie, yak nnyin idomo nditim ñwuk esit nnyin ke ñkpọ ini iso. Akwa ñkpọ-ntibe efen emi edinyeñede ofuri ererimbot emi edidade itie, emi ekemede nditibe mfin,¬ — edi edidi Jesus ndimen Ñwan-ndọ Esie emi ebetde, kpa “Ufọk-Abasi Esie”, mme owo emi ebeñede idem enyuñ ekpemede ebet Ọbọñ (Matthew 24:27; 1 Ñwed Thessalonica 4:16, 17).
Efiọk emi nte Ntañ-ndọk ndisana owo, ndien emi edi ñkpọ-ntibe emi nnyin mikemeke nditre ndibuana! Jesus idisuhọkere idi isọñ ke ini Ntañ-ndọk, edi Enye eyesuhọre edida ke ntọñ-enyọñ; ndien mmọ emi ebeñede-idem ke ndo-ndo oro eyekpọñ isọñ ekesobo ye Ọbọñ. Mme akpa-mkpa ke Christ eyeset ewọñọ ke mme udi mmọ ekesobo ye Ọbọñ ke ofum, ñko, eyesine ikpọhidem eke midibiarake (1 Ñwed Thessalonica 4:16, 17).
“Eyeda kiet, ekpọñ kiet” (Matthew 24:40, 41). Eyeda kiet man okodu ye Ọbọñ, ndien eyekpọñ enye eken ke isọñ man abuana ke ini akwa ukut (Matthew 24:21; Isaiah 26:20, 21; Eriyarare 13:1-18). Ini akwa ukut oro edi kiet ke otu mme ñkpọ oro anade nte nnyin itim ikpeme ikut ite ke nnyin iyebọhọ; edieke nnyin ibuanade ke Ntañ-ndọk, nnyin idifeheke akwa ukut.
Udia-Ndọ
Mmọ emi emende edọk ke ini Ntañ-ndọk eyebuana ke Usọrọ Ndọ Eyen-erọñ (Eriyarare 19:7-9). Nnyin ifiọkke nte usọrọ ndọ oro editiede, koro edi Christ edinam ñkpọ ọnọ owo; koro Enye ọdọhọde ete: “Ọfọfọn ọnọ mme asaña utom emi ete mmọ edidide okut mmọ etiede ekpeme; ke akpanikọ ke ndọhọ mbufo nte, enye ke idem esie eyefak ọfọñ, anam mmọ etetie ke okpokoro udia, onyuñ ada mbet ọnọ mmọ” (Luke 12:37). Ke emi nnyin inyene ebuana ye Christ ke esit nnyin, edi ke ini oro nnyin iyedu ye Enye ke nsi-nsi. Oh! imọfiọk ite edidi utibe ñkpọ ndidi andikan man “isobo ye Ọbọñ ke ikpa-enyọñ (1 Ñwed Thessalonica 4:17).
Ukem nte Ọbọñ ọkọkọbide Noah ye ufọk esie abaha ke ubom, ntre ke Enye edikọbi Ñwan-ndọ Esie abaha ke Usọrọ-ndọ Eyen-erọñ. Ukem nte ubom ọkọfiọrọde ke enyọñ mmọñ-ukwọ, kpa ntre ke edimen nnyin ye Christ enim ke ufọt-enyọñ. Mmọñ ukwọ ikadaha itie tutu Noah ye ufọk esie eduk ke ubom, ntre ñko ke nnyin inim ite ke akwa ukut ididaha itie tutu Jesus atañ ndisana ikọt Esie ọnọ Idem Esie.
Edi ke Usọrọ-ndọ Eyen-erọñ ke edinọ mmọ emi ekenamde akpanikọ mme utip utom mmọ. Mmọ emi ekedade mme talent mmọ enam ñkpọ ke abaña ubọñ Abasi eyekop mme ikọ emi: Omotim anam, afo eti asañautom ye owo akpanikọ, duk ke idara Ọbọñ fo. Kpukpru utom emi ekenamde nte enam enọ Ọbọñ ye ubọñ Esie ikpọñ-ikpọñ, eyenyene akwa utip, ndien kpukpru utom eken eyeta ikañ (1 Ñwed Corinth 3:13, 14).
Akwa Ukut
Nte isede mme idiọk owo ke isọñ, Isaiah owut nnyin ñkañ ndise eken ke ini enye ọdọhọde ete: “ndien mmọ eyeduk ke aba itiat, ye ke ndudu isọñ, ebaña ndik Jehovah, ye ubom ubọñ Esie, ke ini enye adahade ke enyọñ ndidighi isọñ”(Isaiah 2:19). Edi mmọ ekpeyom nte ekekeme, ebiet-udibe iduhe ye Enye emi “enyin Esie ebietde edeme-ikañ” (Eriyarare 19:12). O! akpakam edi mme inyene mmọ eyeñwam mmọ ke ini oro! Edi mbon iseri, se ikoñde ye se idorode ke enyọñ eyesuhọre ke usen Ọbọñ. Mfin edi usen eke owo; “Jehovah mme udim omonim usen” (Isaiah 2:12). Owo inyene idifọnke ke usen oro ikan ebeñe-ebeñe. Ye inyene emi ekọde enim “enọ idem ke ukperedem usen” (James 5:3), owo inyene idikemeke ndidep ebiet ubọhọ ekpedi ke ini-ñkanika (hour) kiet. Enye eyemen sidibe (silver) ye eme (gold) esie kpa mme ndem emi enye ekesikponode ini kiet ko, ọduọk ọnọ mme oyit emi eduñde ke odudu isọñ ye emiañ emi efede ke ñkim-ñkim ufọk emi owo miduñke ke esit (Isaiah 2:20). Kpukpru ediwọrọ ikpikpu ke usen oro.
Ediyarare
Ke utit isua akwa ukut itiaba, Jesus eyetọñọ ntak edi ke ererimbot. Ke ini enye emi, Enye ididighe “nte inọ” (1 Ñwed Thessalonica 5:2), edi “Sese, Enye ọmọñ asaña ke obubit enyọñ edi; kpukpru enyin eyenyun ekut Enye” (Eriyarare 1:7). Efiọk emi nte Ediyarare Christ. Mme andisaña ye Enye edidi ndisana owo emi edidorode ke edem mfia enañ-mbakara, etiene Christ edi ke isọñ. Emi edi utibe-ñkpọ efen emi mifọnke nnyin itaba, ndien ke akpanikọ nnyin iyebuana ke ñkpọ emi edieke ibuanade ke Ñtañ-ndọk.
Christ eyesuhọre, nte John Edima etiñde ọnọ nnyin, odoro ke afia enañ ndien “edisọp ofut onyuñ oto Enye ke inua ọwọrọ, man Enye ada ekpeñe mme idut; Enye eyenyuñ ada esañ ukwak akara mmọ (Eriyarare 19:15).
Armageddon
Akwa udim ekọñ emi edorode ke mfia enañ, emi Edidem Ndidem ye Ọbọñ Mbọñ edidade usuñ, eyeñwana utọ ekọñ emi akananam ererimbot mikwe. Efiọk emi nte ekọñ “armageddon.” Eyemum “asua Christ” “etop mmọ mbiba ye uwem esin ke inyañ ikañ emi asakde ye brimstone” (Eriyarare 19:20), ndien Jesus Christ eyetañ ke Obio Ubọñ Esie “kpukpru ñkpọ emi esinde owo eduọ ye mmọ emi enamde ukwañido efep” (Matthew 13:41).
Tọsin Isua Emem
Mme andikara ererimbot, ikpọ obio-ukara ye ndidem ema enyene ifet mmọ. Edi ediwak mmọ ekekara nte ñkpọ eke satan akadade ibuot ukara. Edi ke ini Christ edifiakde edi ke isọñ nte Edidem ndidem ye Ọbọñ mbọñ, eyemum Satan enim ke ñkpọkọbi ke tọsin isua (Eriyarare 20:1-3).
Isaiah ama etiñ abaña ini oro ke ibuot ñwed emi, ndien Ezekiel etiñ ọnọ nnyin ete, “Mmọ eyeduñ ke wilderness ke ifure, enyuñ ede idap ke akai” (Ezekiel 34:25). Nnyin ima ikpep ke ukpep-ñkpọ mkparawa ye eke ikpọ owo ọyọhọ ukpep-ñkpọ 168, ke ñwed 13, ye ke ọyọhọ ukpep-ñkpọ 121 ke ukpep-ñkpọ Nditọ-ọwọñ ibaña ini emi nditọ-ọwọñ edidede idap ke akai ndien ñkpọ idinamke mmọ. Ke ini mmọ edemerede ke usen-ubọk, ndien ekut nte anawurekpe anade mmọ ke ñkañ, mmọ eyekeme ndinyan ubọk mfiọñọ enye ndien inyeneke ndik, koro eyenam mme ndiọi unam ikọt etie nte unam ufọk. Mme ekwọñ, nduyip ye ñkpri unam ibak idibiatke mme flawa ye mfri iñwañ nte enamde mfin. Nyara rose ye nsehe eto vine idinyeneke ñkukim ke mmọ, ndien akpap ye mbara-ekpe ididuhe ndikim nnyuñ ñwak ọfọñ nnyin. Mkpọdiọhọ mmọñ, idim ye edisiaha-mmọñ eyedu ke akpa-utatan emi edide nsat ke emi, ndien akpa-utatan eyenyuñ “asiaha ikọñ nte rose” (Isaiah 35:1). Mme nnan ebeñe-ebeñe ididuhe ke mme efak obio, koro eyetat kpukpru nnan enyin; se edade eñwam inan ndikop ikọ idighe se ediyomde aba, sia “utọñ eyenyuñ esirere mbon inan. Ndien mbuñọ eyenek nte edop, edeme imum eyenyuñ ọkwọ” (Isaiah 35:5, 6).
Ke utit tọsin isua ukara, eyekpọhọre Satan eyak ke ekpri ini (Eriyarare 20:3, 7); edi idibighike eyeduọk enye ke mkpọdiọhọ emi asakde ikañ ye brimstone, ebiet emi edituhọrede enye uwemeyo ye okoneyo ke nsinsi-nsinsi (Eriyarare 20:10).
Ubierikpe
Ndien Akwa Afia Ebekpo Ubierikpe eyedu emi Christ edibonde kpukpru mme odu uwem ye mme akpaña-mkpa man ekpe ikpe nte ekemde ye utom mmọ (Eriyarare 20:11-13). Usen ubierikpe oro idibuatke-buat mmọ oro ekebuanade ke Ntañ-ndọk. Kpa mmọ oro ekenamde mme idiọk-ñkpọ mmọ ebem iso ewọrọ eka ikpe (1 Ñwed Timothy 5:24), mmọ oro ekemende edọk man edu ye Ọbọñ ke nsinsi idinyeneke ndik ibaña ubierikpe. Anam idiọk-ñkpọ, anam-ukwañ-ido, enye emi okofumide onyuñ esinde akwa erinyaña Abasi eyeda ke ikpe ke usen oro. “Nnyin idinam didie ibọhọ edieke nnyin isinde erinyaña eke okponde ntem?” (Mme Hebrew 2:3). Usuñ ubọhọ iduhe inọ mmọ emi esinde ndiyom Abasi.
Se Idide Akpan Ñkpọ Ikan
Kpukpru ọkọnọ ke nnyin. Edieke nnyin ibeñede idem ibaña akwa ñkpọ-ntibe emi oyomde nditiene ererimbot, kpa Ñtañ-ndọk ndisana owo, nnyin inyeneke ndifehe ndik ke abaña se iditienede enye edem. Ke ntre ke nnyin ibiere ite ke se idide akpan ñkpọ ikan ke uwem edi ndinam mbeñe idem ndisobo ye Jesus ke ini Enye edidide. Bọ erinyaña ke mme idiọk-ñkpọ fo, edieke munyeneke kaña; ndien yom Abasi anam fi asana, onyuñ ọnọ fi uduọk-mmọñ Edisana Spirit ye ikañ. Ka iso ndien ke edibọñ akam nnyuñ kot Ñwed-Abasi fo nyuñ beñe idem, “Koro Eyen Owo eyedi ke ini eke mbufo midorike enyin” (Luke 12:40).
Mme Idaha Akwa Ñkpọ-ntibe Se Ke Mme Itie Emi
Ñtañ-ndọk Ndisana Owo Ukpep-Ñkpọ 164,
(Eridi Christ Nte “Inọ”) Ọyọhọ Ñwed 13
Usọrọ Ndọ Eyen-erọñ Ke Ufọt Ukpep-Ñkpọ 165,
enyọñ, ye edinọ ndisana Ọyọhọ Ñwed 13
owo utip ke ebekpo
Ubierikpe Christ
Ini oro, Akwa Ukut eyedu ke isọñ Ukpep-Ñkpọ 165, Ọyọhọ Ñwed 13 Eriyarare Christ (ye ndisana Ukpep-Ñkpọ 166 owo emi edorode ke mfia enañ-mbakara) Ọyọhọ Ñwed 13 Ekọñ Armageddon Ukpep-Ñkpọ 166 Ọyọhọ Ñwed 13 Ini Ukara Christ – 1000 isua emem Ukpep-Ñkpọ 168 Ndisana owo eyekara enyuñ eda uboñ ye Christ) Ọyọhọ Ñwed 13 Ekpọhọre Satan eyak ke ekpri Ukpep-Ñkpọ 168 Ọyọhọ Ñwed 13 ini, (Akpatre ekọñ Gog ye Magog) Ukpep-Ñkpọ 169 Afia Ebekpo Ubierikpe (Eduọk Ọyọhọ Ñwed 13 mme idiọk owo ke mkpọdiọhọ ikañ) Obufa Heaven ye Obufa Isọñ Ukpep-Ñkpọ 169 Ọyọhọ Ñwed 13 Nsinsi Ini-ke nsinsi nsinsi
Questions
MME MBUME- Ntañ-ndọk edi nso? Nte nnyin imọfiọk ini emi enye edidade itie?
- Ediyarare Christ edi nso?
- Nso ke efiọk nte Tọsin Isua Ukara? Tiñ nte ererimbot editiede ke ini oro.
- Ke mmọñ ke mme owo edidomo ndinyene ebiet-udibe man ebọhọ iso Ọbọñ? Nte mmọ eyekut ebiet-udibe?
- Mme anie ke Ọbọñ edisak ke usen kiet?
- Nso ke mme owo edinam ye eme (gold) ye sidibe (silver) mmọ ke usen Ọbọñ?
- Nso edi Akwa Afia Ebekpo Ubierikpe?
- Mme anie edidu do? Nte ndik anam fi ke ini ekerede abaña enye?
- Nso edi ata akpan ñkpọ ọnọ nnyin ndinam?
- Nte enyene owo emi ọfiọkde ini emi Jesus edidide? Didie ke nnyin ifiọk ite ke eridi Esie otim ekpere?