Lesson 343 - Junior
Memory Verse
IKỌ IBUOT: “Ke usenubọk ke nditim mbọñ akam nnọ fi, nnyuñ ntie ñkpeme” (Psalm 5:3).Notes
Edituak Ibuot Ke Usenubọk
Mbemiso afo ọkpọñ ufọk fo ke usenubọk emi nte ama ekere ndibọñ akam? Nte ama eti ndikot ufañ Ikọ Abasi ifañ ke Ñwed Abasi ñko? Mme edituak ibuot nnọ Abasi ama odu ke ufọk fo ke usenubọk emi ke otu mbon ufọk fo? Usenubọk edi eti ini ndituak ibuot nnọ Abasi mbemiso aka ufọk-ñwed, mbemiso aka utom mme ọtọñọ mbre. Ediwak ini mme utom eke owo enyenede ndinam ke usen esiwak tutu ọbọ enye ifet nditiñ ikọ nnọ Abasi ndinyuñ nyak Abasi etiñ ikọ ke esit esie. Ke ebiet efen David ama ewet ete, “mbubreyo, ye usenubọk, ye ufọt uwemeyo, ke ndiseme nnyuñ ntua” (Psalm 55:17).
Nditie Ñkpeme
David ama ọdọhọ ete: “O Jehovah, afo eyekop uyo mi ke usenubọk; ke usenubọk ke nditim mbọñ akam nnọ fi, nnyuñ ntie ñkpeme” (Psalm 5:3). Ke “nditie ñkpeme” ndusuk David ekekere ete, edieke imọ ikutde iso Abasi ke mbuọtidem, ndien iyekeme ndikpep uduak Esie. “Nyetiñ fi enyin mi ke idem” edi mme Ikọ Abasi emi David ewetde ke Psalm 32:8.
Nte eka mme ete fo akananam ewut unana inemesit mmọ ye afo ke ndisese fi, edi itiñke baba ikọ kiet? Mme ke ñkañ eken, nte mmọ ema ewut unyime mmọ ke ido ye edinam fo ke ndise fi ke enyin mmọ? Ke ini afo emenerede enyin ese Abasi, afo eyefiọk mme Enye okop inemesit ke uwem fo.
Esit ete fo esinem didie ke ini afo anamde se enye ọdọhọde, onyuñ odude uwem nte eti akparawa eren mme ñwan! Edieke ete fo edide owo Abasi, enye oyom nditọ esie efọn enyuñ ekop item. Adaña didie ke enye asua ibak, idiọk-ñkpọ ye abiaña ke ini okutde ke idem owo kiet ke otu nditọ esie! David ama ọdọhọ ete ke Abasi asasua mmọ eke enamde ukwañ-ñkpọ; Enye osuk amama ukpọñ mmọ onyuñ oyom kpukpru owo ekabare ekpọñ mme idiọk-ñkpọ mmọ enyuñ ebọ erinyaña, edi Enye asasua mme idiọk usuñ mmọ ndien iditreke ndisobo ikpọhidem ye ukpọñ mme anam-idiọk emi mikabakere esit. “Efehe Enye emi ekemede ndisobo ukpọñ ye ikpọhidem ke hell” (Matthew 10:28).
David ekenyene esit ye ekikere emi akasanade anana ubiom-ikpe. Oro ekedi ntak emi enye ekekemede ndimenere enyin nse iso Abasi ukem nte ekpri eyen emi ọfiọkde ete ke imọ isisọñke ibuot, isuhu-nsu, mme nditiñ ikọ emi adade iyaresit ọnọ mmọ efen ekemede ndiwuk enyin nse iso ete ye eka esie inyuñ ikopke but mme ndifehe ndik ufen.
Mme Edeme Abiaña
Mme ñkpọ efen emi ekedude ke akam David ekedi mbubik ye abiaña. Abasi asasua mme ñkpọ oro kpa nte David akasuade, ndien kpukpru nti nditọ Abasi emi edude uwem enyuñ esañade ye Abasi esasua mmọ ñko, idinyuñ inamke utọ enyene ndik idiọk-ñkpọ oro. Mme owo emi etiñde ñkpọ kiet edi enam ñkpọ efen edi mbon mbubik. Edieke owo abiaña edide editiñ “inem-inem ikọ” ọnọ fi ndien ọwọñọre etiñ “ndot ndot ikọ” adian fi ọnọ owo efen, enye idighe eti ufan, ke akpanikọ inyuñ idighe owo Abasi. David ọkọdọhọ ete ke oruk owo oro enyene usuñ itọñ eke ebietde ana-iñwañ udi. Udi edi ebiet emi esibukde mme akpa-mkpa, ndien ana nte efuk enye man ebiọñọ idiọk utebe eke enye ọkpọnọde. Ntre mme owo emi edide mbon abiaña ye mbon mbubik ekpenyene ndida ubọk mfuk ke inua mmọ midighe ntre ekibe inua mmọ.
Eyak nnyin inam akpanikọ ikunyuñ iyak ikpe obiom nnyin oto ke ndinam abiaña ye mbubik. Edieke itiñde akpanikọ kpukpru ini ito ke esit nnyin, oro ke ndusuk ini ekeme ndiyat owo efen, edi Ikọ Abasi etiñ ọnọ nnyin ete, “mme unan eke ufan ọnọde edi akpanikọ; edi ntim-inua usua ewak ekaha” (Mme Ñke 27:6). Oro iwutke ete ke nnyin inyene ndisaña ñkanare ndinam mme owo ekop iyaresit; edi Abasi eyeñwam nnyin ndinyene ifiọk eke itiñde ikọ ke ufat man ntak okudu ndiyat mmọ efen esit, ndien ifet ididuhe inọ uwem mbubik.
Etim Ekpeme
Edieke mkparawa iren ye iban emi efiọkde Abasi editide ndibọñ akam ke usenubọk nnyuñ menere esit mmọ ke enyọñ nnọ Abasi ke ofuri usen oro, Abasi eyekpeme mmọ. Mmọ eyenyene ukeme ndidu uwem emi enanade idiọk-ñkpọ inyuñ ibiatke kiet ke otu ibet Abasi. “Koro, owo emi edimade uwem, edinyuñ oyomde ndikut edifọn ini, yak enye afara edeme esie ke idiọk, onyuñ ekpeme mkpọk-inua esie okubiaña abiaña” (1 Peter 3:10).
Akam David ke usen-ubọk ekedi man Abasi akpada enye usuñ. David okokop inemesit didie koro enye ọkọbuọtde idem ye Abasi! Enye ekenyene ndisio mkpo idara, nte kpukpru nditọ Abasi ekemede ndinam ke ntak ima ukpeme Abasi. Abasi ke Idemesie otim ekpeme onyuñ anyaña ndinen owo osio ke afanikọñ. Nte afo ukpamaha Abasi ada otu-ekọñ Esie akan fi okuk akan ndiyom odudu ererimbot ekededi?
Questions
MME MBUME- Nso utọ enyiñ ukpono ke David ọkọnọ Ọbọñ?
- Nso ini ke usen ke David ọkọdọhọ ete ke imọ iyebọñ akam?
- Nso idi ntak emi David ọkọdọhọde Ọbọñ ada enye usuñ?
- David eketiñ nso abaña mbon abiaña?
- Enye akada usuñ-itọñ mbon abiaña odomo ye nso?
- Nso ke David eketiñ abaña mmọ eke ebuọtde idem ye Ọbọñ?
- Nso idi ntak emi usenubọk edide eti ini ọnọ nnyin ndibọñ akam?
- Adaña ediwak ini didie ke Daniel ọkọbọñ akam?