Lesson 350 - Junior
Memory Verse
IKỌ IBUOT: “Mmodo Jesus ñko akakpade ke edem inua-otop obio, man Enye anam mbio-obio esana ke iyip Esiemọ” (Mme Hebrew 13:12).Notes
Utom Isaiah
Abasi ama enyene ekese utom ọnọ Isaiah ndinam. Abasi okokot enye ndinọ Nditọ Israel ntọt ubierikpe emi akanade etiene mmọ ke ntak mme idiọk-ñkpọ mmọ; ndinyuñ ntiñ nnọ mmọ mbaña Jesus, oro edi Messiah emi ekenyenede ndidi ndinyaña nsuhọ ufọk Israel. Ikedighe Isaiah nditiñ mbaña akpa eridi Jesus ikpọñ-ikpọñ, kpa nte enye ekewetde: “Koro eyen amanade ọnọ nnyin, enọ nnyin eyen-eren: ubọñ onyuñ odoro enye ke afara; enyuñ esio enye enyiñ, Utibe, Ọnọ-item, Ọkpọsọñ Abasi, Nsinsi Ete, Ọbọñ Emem;” edi Isaiah ọtọñọ ntak etiñ abaña ini emi Jesus edikarade ke ererimbot emi ke tọsin isua. “Wilderness ye nsat-isọñ eyedara; desert eyenyuñ ebre, onyuñ asiaha ikọñ nte rose” (Isaiah 35:1). “Edi mbufo edat esit, enyuñ ebre nsinsi ke se ami mbotde: koro, sese, ami mbot Jerusalem ke ñkpọ inemesit, mbot mbio esie ke ñkpọ idaresit … ndien idikopke aba uyo eyet ye uyo eseme ke esit” (Isaiah 65:18, 19).
Mbeñidem Ke Abaña Utom
Mbemiso Isaiah ekeme ndida ke iso mme owo oro ye utọ ikpọ mme ntiñ-nnim ikọ emi, akana enam esit esie odu ke mbeñidem. Ke akpan ema enyaña Isaiah mbemiso enye ọtọñọ nditiñ ntiñ-nnim ikọ. Ke idaha utebe-ikpe emi enye ama etetiñ ndiye ntiñ-nnim ikọ, onyuñ ọkwọrọ ikọ ọnọ Nditọ Israel. Edi ke abaña akwa utom emi ọkọsuhọde ndinam, akana enam ntọtuñọ utom ke idem Isaiah, oro edi edinam-asana.
Isaiah ama ọtọtọñọ utom ntiñ-nnim ikọ esie ke ini ukara Edidem Uzziah. Edidem emi ama anam akpanikọ ke ata ediwak isua, edi nte akade ke utit ukara esie enye ọsọñ ibuot ye Abasi, onyuñ akabare ọdọñọ akpa-mfia. Nnyin iwak ndikpep nte ke ini edidem anamde idiọk, ediwak owo ke idak ukara esie eyekabare etiene uwut-ñkpọ Esie. Ntem nnyin imọfiọk ite ke isua oro edidem Uzziah akpade, Nditọ Israel ema esuhọre eti-eti ke idaha edu-uwem mmọ.
Ndibọñ Akam Mbaña Israel
Isaiah ama ọdọk ke Itie-ukpono ndibọñ akam. Edi akpanikọ ete nditọ Israel oro ema eyom ọkpọsọñ akam. O Abasi nam Israel ekabare! Ọbọñ tua mbọm!
Nte enye ọbọñde akam, ubọñ Abasi edidoro enye, ndien enye okut Ọbọñ etiede ke edikoñ ye edimenere ebekpo, ndien akwa ekura esie ọyọhọ ke Itie-ukpono.
Ke ini nnyin idade esit akpanikọ ibiom mbiomo mbon efen ke akam, kpa ye eke utom Ọbọñ, Abasi esiwak ndiduri nnyin ndian idem, ndien nnyin ikop esisit Ubọñ Esie. Nnyin imesikop ebuana Esie ke utom emi inamde inọ Enye.
Kere se ikpetakde Isaiah edieke enye ọkpọkọdọhọde ete Israel ema edediọk ema, nso idi ufọn ndibọñ akam mbaña mmọ. Edieke mmọ mikoyomke enyaña mmọ, nso idi ntak emi enye ekpefinade idem esie. Edieke enye ekpekekerede ntem, enye ikpakakaha ke Itie-ukpono ndibọñ akam, ndien enye ikpekekwe ubọñ Abasi oro.
Esit mme owo ekpesọñ nte ọsọsọñ, edi utom owo Abasi ndiyire ke akam man Abasi anyaña ukpọñ mmọ, ndinyuñ nnyene ọyọhọ odudu Abasi ke uwem mmọ man mme idiọk owo ekut. Ndusuk ini ebebọñ akam tutu edidemere ọtọñọ ntak oduk ke mme ebiet emi mme owo ema ekeduọk idorenyin ete owo ekeme ndibọ erinyaña.
“Sọñ idem!
Kudọhọ ete, “Mme usen ediọk. Edibiom anie?
Kukpañ ubọk, esit okunyun ọsọñ! Kukop but!
Daha da, kwọrọ uko uko, k’enyiñ Ọbọñ.”
Ubọñ Abasi
Ikureke Isaiah ndikokut Ọbọñ ikpọñ ikpọñ, edi enye ama okut Seraphim edade ke enyọñ ebekpo Abasi. Mmọ ekedi mme ñkpọ uwem emi akananam Isaiah mmikwe. Mmọ kiet-kiet enyene mba itiokiet. Eda mba iba efuk iso mmọ. Mmọ efiọk ete Abasi edi edisana, ke mmimọ idotke ndiwuk iso nse Enye.
Ke ini nnyin itọñọde ndikere nte Abasi asanade, iyokut nte nnyin midotke nte ekpekotde nnyin ufan Esie mme nditọ - ete. (Mme Hebrew 2:11). “Nso ñkpọ edi owo eke afo etide enye? Nso ñkpọ edi eyen owo eke afo edide edise enye?” (Psalm 8:4). Ke ini nnyin idude ke ufọk Abasi ana nnyin iti ndikama idem nnyin ke usuñ eke nnyin mmididaha ñkpọ but inọ Enye.
Mme Seraphim eda mba iba efuk ukot mmọ. Eda iba eken efe usọp usọp ndinam se Abasi ọdọñde mmọ.
Nte mme Seraphim emi efede ke ebekpo Abasi, mmọ ekwọ kiet ye eken ete “Edisana, edisana, Jehovah mme udim: ubọñ esie ke ọyọhọ ke ofuri ererimbot.” Edieke mme owo ekpetorode Ọbọñ, mmọ ekpekut ubọñ emi ọyọhọde kpukpru ebiet. Ubọñ Esie ke ọyọhọ ke ofuri ererimbot, ndien ebiet ekededi emi owo ọbọñde akam. Enye ododu do ndinọ ibọrọ. Abasi oyom mme owo etoro Enye. Mme udim enyọñ ke enọ Enye ubọñ.
Nte mme Seraphim oro ekwọde, Ubọñ Abasi ọyọhọ Itie-ukpono nte nsuñikañ. Idem asañ-udọk Itie-ukpono enyeñe ye odudu emi ekedude do. Emekeme ndikere nte eketiede Isaiah ke idem ke adaña emi enye okutde uto ubọñ ye odudu oro? Ke akpanikọ enye ikabatke nte imọ imodot. Ndien idut Israel ekedu ke idiọk-ñkpọ ke utọ ini emi! Nsinam Abasi okowut mmọ ubọñ Esie ke utọ usuñ emi? Isaiah okut nte ekpenamde esit imọ otim asana. Enye ke nsuhọreidem okot Abasi ete añwam imọ.
Ke ini nnyin ikutde ntak emi iyomde uñwam ito Abasi, ndien Enye eyeñwam nnyin. Ke ini nnyin isañade ikpere Enye ke nsuhọreidem, Enye okop eseme nnyin onyuñ ọbọrọ.
Edinam Esit Asana
Nte Isaiah ọbọñde akam, Seraphim kiet ada mbubek ikañ ke itie uwa efe etiene Isaiah, onyuñ otuk ke mkpọk-inua esie, ete: “Sese, emi omotuk fi ke mkpọk-inua: omonyuñ osio isop idiọk ido fo.”
Mme idiọk-ñkpọ Isaiah, mme ndudue emi enye akanamde, ema efen ke ini ekenyañade enye. Edi uduot idiọk-ñkpọ, emi Ñwed Abasi okotde enye ke enyiñ kiet (idiọk-ñkpọ), okosuk ododu ke enye. Ekena nte enam enye asana. Edinam-asana eyet esit asana.
Ke ini David akanamde idiọk-ñkpọ enye ọbọñ akam ete esọhi nnam-ndue imọ esio. Ke ikọ efen, “Fen mme idiọk-ñkpọ emi ñkanamde.” Onyuñ adian do ete: “Diọñ yet mme ukwañ-ñkpọ mi fep, nyuñ sio mi mme idiọk ido ke idem fep, nam ndi edisana” (Psalm 51:1, 2). Oro akada ọnọ edinam-asana, edisana esit.
Isaiah ama okop nte mme Seraphim ekwọde ebaña edisana ido Abasi. Edieke akanade nte enye okpono Abasi ke nnen nnen usuñ, ana enye ñko edi edisana. Enyiñ efen emi enọde edinam-asana edi edisana ido.
Abasi ọdọhọ ete, “Mbufo edisana, koro Ami ndide edisana” (1 Peter 1:16). Abasi oyom nnyin isana ke uwem emi. Enye ama ọñwọñọ ọnọ Abraham, “Ete, ke ima isio nnyin ke ubọk mme asua nnyin, iyeyak nnyin inam ñkpọ inọ Imọ ke ifure, ke edisana ido ye edinen ido ke iso Imọ ke ofuri uwem nnyin” (Luke 1:73-75). Mkpa inamke owo asana.
Ebuana Abasi Ita Ke Kiet
Eyak nnyin ikut ite ke edisana Abasi ita ke Kiet etiene enyene ebuana ke ebiet emi. Mme Seraphim oro ekekwọ, “Edisana, edisana, edisana,” etoro Ete, Eyen, ye Edisana Spirit. Ke ini Abasi eketiñde ikọ, Enye ọdọhọ ete, “Anie ke ndidọñ utom?” onyuñ adian do ete, “Anie edinyun aka ñkpọ ọnọ nnyin?” Emi ama awak akan Owo kiet ke itie oro.
Ndusuk owo eyedọhọ ete ke Jesus ikoduhe mbemiso Enye amana ke Bethlehem. Edi Apostle John, ke ini enye etiñde abaña se Isaiah okokutde ke Itie-ukpono, ọkọdọhọ ete ke Jesus ama odu do. John etiñ mme utibe ñkpọ emi Jesus akanamde mi ke isọñ, onyuñ ọdọhọ ete ke mme owo ikonimke Enye ke akpanikọ ukem nte mbon owo mmikonimke Isaiah ke akpanikọ ke ediwak isua ke edem. Isaiah ọkọdọhọ ete, “Enye okotibi mmọ enyin onyuñ ọsọñ mmọ esit; mbak mmọ edida enyin mmọ ekut usuñ, enyuñ eda esit mmọ ekere ñkpọ enyuñ ekabare, ndien nnam udọñọ okure mmọ” (John 12:40). John ete: “Isaiah eketiñ ikọ emi koro enye okutde ubọñ Esie, enye ama onyuñ etiñ ñkpọ abaña Enye” (John 12:41). Ntem Spirit ama ayarade ọnọ John ete ke Jesus ama odu ke Itie-ukpono ke ini ekenamde Isaiah asana, ediwak ibat isua mbemiso Jesus edimana ke Bethlehem.
Ndiyere Ikot
Ekedi ata utibe ifiọk Isaiah ndikut nte Abasi amade enye ntem saña-saña; edi ikedighe enye ndibọ mfọn ye edidiọñ emi nnọ idem esie ikpọñ. Ekenọ enye man ọnọ enye odudu ye ifiọk nditeme mbon mfiakedem Israel usuñ Abasi. Ke ndo ndo oro edidiọñ emi osimde enye, enye okop uyo Ọbọñ ọdọhọde ete, “Anie ke ndidọñ utom? Anie edinyuñ aka ñkpọ ọnọ nnyin?” Enye ọbọrọ ini kiet ete, “Se mi, dọñ mi.” Enye okosuk abat idemesie nte imọ idotke, edi edieke utom akanade ọnọ enye ndinam enye ama ekeme ndinam.
Ikpedighe mmem-mmem ñkpọ. Mme owo oro ikebeñeke idem ndikpañ utọñ nnọ Isaiah. Ediwak ini eketie enye nte ukwọrọikọ imọ ọwọrọ ikpikpu. Edi Abasi ọkọdọñ enye aka, enye ñko onyuñ osuk ibuot. Ke ntak udọñ idiọk-ñkpọ, mme owo oro ikekemeke ndikut uyai ke Eti-Mbuk. Mmọ ikoyomke ndikop eti mbuk erinyaña oro. Mmọ ekesọñ esit tutu Spirit Abasi ikekemeke ndiduk. Edi nte ededi akana Isaiah ọwọrọ.
Adaña Didie?
Isaiah ama ọfiọk ke mbiomo eyekpon, ndien obup ete, “Adaña didie?” Adaña didie ke Israel edibọ ufen idiọk-ñkpọ mmọ? Adaña didie ke mmọ edisin etop Abasi? Mme Jew ebọ ufen ke ata ediwak isua tọñọ ke usen oro, ndien mmọ ke esuk ebebup ete, “Adaña didie?” Adaña didie ke edida mmọ ndidiọñọ Messiah man Enye afak mmọ.
Ema esuan mme Jew esioño ke isọñ Palestine ke mmọ ema ekekọñ Jesus. Edim etre ndidep ke isọñ mmọ, ndien se ediade enana. Mme ufọk enyuñ ebiara enana owo, ukem nte Isaiah ọkọdọhọde.
“Edi ọyọhọ ubak duop eyesuk odu enye (isọñ) ke esit, ndien emi eyetọñọ ntak edi.” Isaiah ete ke ndusuk mmọ eyefiak enyọñọ. Jesus ọdọhọ ete: “Mme Gentile eyedighi Jerusalem ke ikpat, tutu ini mme Gentile ọyọhọ.” (Luke 21:24).
Osuk esisit, ini mme Mmọ-oko (Gentile) ọmọñ ọyọhọ. Edim ke ọtọñọ ntak edep ke Palestine, ndien mme Jew ke eto ke mme utit ererimbot efiak enyọñọ Edisana Obio oro. Edi Ikọ Abasi osu emi.
Questions
MME MBUME- Siak ndusuk nti ñkpọ emi Isaiah eketiñde enim.
- Nso ndutim esit ke Isaiah okoyom mbemiso akwa utom esie?
- Isaiah okodu mmọñ ke ini enye okutde ñkukut?
- Nso ke Isaiah okokut?
- Enye akabat idem ke nso ke adaña emi enye okutde utọ ubọñ oro?
- Nso ke Seraphim oro akanam ye Isaiah? Enye okonyuñ ọdọhọ didie?
- Nso idi enyiñ efen emi enọde edinam-asana?
- Nnyin inam didie ifiọk ite nnyin imekeme ndisana ke uwem emi?
- Nnyin inam didie ifiọk ite ke Jesus ama ododu ke Itie-ukpono ke ini emi mbemiso Enye edimana ke Bethlehem?