Lesson 351 - Junior
Memory Verse
IKỌ IBUOT: “Afo edi ebiet-udibe mi ye otu-ekọñ mi: mmebet uyo fo” (Psalm 119:114).Notes
Mme Ikọ Abasi
Isaiah ekedi anditiñ ntiñ-nnim ikọ. Enye ama etiñ mme Ikọ Abasi ọnọ Nditọ Israel, ndien ewet mme ikọ esie ke Edisana Ñwed Abasi man ada ufọn ọsọk kpukpru owo. Abasi ekedemere Isaiah man etiñ mme ñkpọ ekedidade itie ke ini iso, ndien ndusuk mme ntiñ-nnim ikọ Isaiah ema etọñọ ndisu. Isaiah ama etiñ abaña emana Andinyaña. Enye ama ọdọhọ ete: “Koro eyen amanade ọnọ nnyin, enọ nnyin eyen-eren” (Isaiah 9:6). Ikọ emi ama osu ke ini Jesus akamanade. Isaiah ama ọdọhọ ñko ete: “Edi enye akada unan abaña mme idiọk ido nnyin, anuaha abaña mme ukwañ-ñkpọ nnyin: ufen odoro enye ke idem man nnyin ikut emem; ndien inia esie ọkọk nnyin” (Isaiah 53:5). Mme ikọ emi ekenyan ubọk ewut edikọñ Jesus ke krọs emi ama akada itie ke ediwak isua ema ekebe.
Emi Enyenede Ndisu
Ndusuk ntiñ-nnim Isaiah isuhu kaña. Isaiah ye mme anditiñ ntiñ-nnim ikọ eken ema etiñ ñkpọ ebaña Akwa Ukut. Ñkpọ emi idaha itie kaña edi ekeme ndisọp nsim ererimbot ye mme owo ekedude ke ererimbot.
Ukut edi ini ntuaña ye eseme. Akwa Ukut eyesọñ odudu ndien ke mikpesibeke mme usen oro emuhọ, baba owo kiet ikpọbọhọke (Matthew 24:22). Isaiah ama ọdọhọ ete ke mbio emi edisuhọde “enyuñ edi esisit.” Ukut oro eyekpon akan ukut ini eñwen, “oruk eke akanam miduhe toto ke eritọñọ ererimbot … eke midinyuñ iduhe aba” (Matthew 24:21). Akwa Ukut eyesim kpukpru owo ekedude ke isọñ. Idisioho baba owo kiet ifep. Kpukpru owo eyekut ukut, oro edi, mme anam-utom ye mme andikara mmọ, mme owo ye mme nsu-nsu ọkwọrọ-ikọ mmọ, mme andinyam ye mme andidep, enyene-ñkpọ owo ye ubuene.
Isọñ Enyek
Akwa Ukut edituk isọñ ye mme andiduñ isọñ didie? Isọñ ke idem esie eyena ukpọk “onyuñ abiara ofuri-ofuri”. Isọñ eyedi mbiara ye ukpọk ye se esobode. Akwa unyek-isọñ eyedu. Isaiah ọkọdọhọ: “idak isọñ onyuñ enyek … ererimbot enyek ọkpọsọñ. Ererimbot eteteñ nte owo mmin, onyuñ ofofum nte hammock.”
“Jehovah … onyuñ okubi iso esie” “enyuñ emen kpukpru ikpọ obot ye isuo efep ke itie mmọ” (Eriyarare 6:14), enyuñ esop ke enyin (Eriyarare 16:20), ntantafiọñ ikpa-enyọñ enyuñ ekibe eduọñọ ke isọñ, ọfiọñ onyuñ akabare oyibe “nte iyip,” utin onyuñ akabare ebire nte ọfọñ-ikpo eke edade idet edọk (Eriyarare 6:12, 13). Isaiah ọkọdọhọ ete: Ererimbot atua, akpa, ekondo eyemere, akpa, ata ikpọ mbon ererimbot eyemere.
Ekpọñ Enye
Emekpọñ owo ye isọñ, ndọñesit inyuñ iduhe aba inọ mmọ. Mmọ eyekabare emem, odudu inyuñ iduhe ke mmọ aba. Eyesuhọre mbon iseri. “Emekọbi kpukpru ufọk, owo idukke duk.” Idara me inemesit inyuñ iduhe. Ikwọ idara etre, ñkpọ iduhe ndinam esit enem. “Ofuri idaresit omokure, idara ererimbot amatak.” Ubọhọ ididuhe inọ mme owo ke isọñ. Mmọ oro edifehede ikpọñ ndik eyebe eduk ke efen.” “Owo eke efehede abak uyom ndik eyeduọ ke ukpe, ndien owo eke otode ke ufọt ukpe ọdọk eyemum ke mfine” (Isaiah 24:18).
Akwa ukut edidi ini nnanenyin, idihe kiet, edidi ediwak. Ema ewut John Edima ndise ini Akwa Ukut emi Isaiah ekewetde abaña. John ama okut mme nwure emi nte asañade ebe kiet-kiet, nte mbon enañ-mbakara ewatde ke isọñ. Ekọñ ye akañ ye mkpa, idiọk udọñọ ye ndutime eyeyọhọ ererimbot nte ewetde ke Eriyarare 6. Ke ido emi ke mme idiọk owo edibọ ufen. “Eyenyuñ etañ mmọ ebon ọtọ kiet, nte mbon ñkpọkọbi ke obube, enyuñ ekọbi mmọ ebaha ke ufọk ukwak” (Isaiah 24:22).
Ufen
Nso edi ntak emi edade ofuri ufen emi etiene ererimbot? Isaiah ama ọnọ ntak. Enye ama ọdọhọ ete: “Isọñ onyuñ edehe ke idak mmọ emi eduñde ke esit: koro mmọ eduede mbet, ebiatde ewuhọ, enim nsi-nsi ediomi ke ikpikpu. Oro esin isuñi adiade isọñ, enyuñ enọ mme andiduñ ke esit ufen”. Ema etiñ enọ Nditọ Israel ete ke mmọ eyebọ eridiọñ edieke mmọ edikopde uyo Abasi. Edieke mmọ etutde utọñ ye Abasi ye Ikọ Esie, isuñi eyetiene mmọ. Moses ama ọdọhọ ete: “Mbufo esin esit mbufo ke kpukpru ikọ emi … koro edide uwem mbufo” (Deuteronomy 32:46, 47).
Oto ke ikọ mme anditiñ ntiñ-nnim ikọ, etiñ enọ nnyin emi idude mfin se iditibede edieke nnyin itutde utọñ ye Abasi, edieke ikpuhọrede mme mbet Esie, edieke ibiatde eñwọñọ Esie. Mfin ediwak owo esin Abasi ye mbet Esie ke ndek; mmọ ekpono okuk; mmọ edu uwem uko-uko ke idiọk-ñkpọ. Edi ke usen iyaresit Abasi, owo eyeda ibọk sidibe (silver) esie, ye ibọk eme (gold) esie ọduọk ọnọ oyit ye emiañ (Isaiah 2:20); mmọ eyedibe ke mme aba ye ke ikpọ itiat emi odude ke ikpọ obot; mmọ enyuñ edọhọ ikpọ obot ye ikpọ itiat ete eduọ efuk nnyin, enyuñ edip nnyin, man nnyin ibọhọ ubierikpe Abasi (Eriyarare 6:15, 16).
Ubọhọ ididuhe ke ini Abasi edidade iyaresit Esie etiene mme idut (Isaiah 34:2). Ediwak eyekpa. “Koro Jehovah onimde usen usiene” (Isaiah 34:8). Jehovah eyenọ ererimbot ufen abaña mme idiọk-ñkpọ mmọ (Isaiah 26:21).
Ebiet-Udibe
Nte ebiet iduhe ndidibe mbọhọ mme ñkpọ-ndik emi Isaiah ọdọhọde ete ke eyetiene ererimbot? Isaiah ama ewet ke Ikọ Abasi: “Ikọt mi, mbufo eka ekeduk ke mme ubet mbufo, enyuñ eberi itim mbufo ebaha idem mbufo: edibe ini esisit ntem, tutu ikpahesit ebe” (Isaiah 26:20). Ih, ebiet-udibe odu ọnọ ikọt Abasi. Mbemiso Akwa Ukut, Christ eyedi ndisio ikọt Esie ke ererimbot emi man edu ye Enye. “Koro Ọbọñ ke Idem Esie eyeto ke heaven ọsuhọre ye mkpo, ye uyo archangel, ye ukorowo Abasi; ndien mmọ emi ekpañade ke Christ eyebem iso eset: ndien eyemen nnyin emi idude uwem, emi isuhọde, edọk ye mmọ ke ikpa-enyọñ, man isobo ye Ọbọñ ke enyọñ, ntem ke nnyin ididu ye Ọbọñ ke nsinsi” (1 Ñwed Thessalonica 4:16, 17).
Mbeñidem
Ebiet-udibe ke Christ ana ọnọ ikọt Esie ikpọñ. Se ibehede nnyin edi nnyin ndidi ikọt Jesus, ndinyuñ mbeñidem man isobo ye Enye. Ñwed Abasi ekpep ete ke nnyin inyene ndisaña ke ofuri uñwana emi Abasi ọnọde nnyin man ikeme ndidi ata mme andikan, emi edude ke mbeñidem ndisobo ye Jesus. Nnyin emi ima ikọbọ uñwana imekpep ito Ñwed Abasi nte ke ana efen mme idiọk-ñkpọ nnyin, idu edisana uwem enyuñ eyọhọ nnyin ye Edisana Spirit man ikeme ndibeñe idem mbet eridi Jesus.
Owo ekeme ndibọ erifen ke idiọk-ñkpọ oto ke edibọñ akam nnyuñ mbeñe Abasi ete efen ke mme idiọk-ñkpọ esie. (Kot Mme Ñke 28:13 ye 1 John 1:9). Ke owo ama ọkọbọ erinyaña, ana nte enam enye asana. Ke edibọñ akam ye ke ediyak idem nnọ Abasi, owo eyebọ edinam-asana, mfọn emi osiode oruñ idiọk-ñkpọ ke uwem owo onyuñ ọnọ owo ukeme ndidu edisana uwem. “Koro emi edi uduak Abasi, ete mbufo ekpekabare esana” (1 Ñwed Thessalonica 4:3). Owo ndidu edisana uwem idighe uduak Abasi ikpọñ, edi emi edi se anade edi ntre koro Ñwed Abasi ọdọhọ ete “Etiñ enyin esaña ke emem ye kpukpru owo; enyuñ esaña ke edisana ido; koro esiode oro efep, baba owo kiet idikwe Ọbọñ” (Mme Hebrew 12:14).
Idaha efen mmọdo emi nnyin inyenede ndida man ikeme ndisaña ke ofuri uñwana emi enọde nnyin, man ikeme ndibeñe idem mbet eridi Jesus. Oro edi Uduọk-mmọñ Edisana Spirit emi Jesus ọkọñwọñọde ọnọ mbet Esie (Utom Mme Apostle 1:5), ndien uñwọñọ emi enyene “adaña owo nte Jehovah Abasi nnyin edikotde etiene Enye” (Utom Mme Apostle 2:39). Uduọk-mmọñ Edisana Spirit ọnọ owo odudu ndinam utom ye odudu ndidi ntiense nnọ Ọbọñ. Nte afo emenyene mme mfọn emi? Nte afo emebeñe idem ebet eridi Jesus? Edieke ukorowo Abasi okposiorede uyo idahemi, nte afo okposobo ye Enye ke enyọñ?
Isaiah iketiñke ibaña Akwa Ukut ikpọñ, edi ama etiñ abaña ebiet-udibe emi odude ọnọ ikọt Ọbọñ. Andiwet Psalm ñko etiñ abaña ebiet-udibe. Enye ọdọhọ ete: “Abasi Jacob edi ebiet-ubọhọ nnyin” (Psalm 46:11). David ama ọdọhọ ete: “Mmebeñe Jehovah ñkpọ kiet, ndien nyeyom enye; nte nduñ ke ufọk Jehovah ke ofuri uwem mi, man nse uyai Jehovah, nnyuñ ntim mbup ke temple esie. Koro enye eyefuk mi ke ataya esie ke usen idiọk: eyedip mi ke ndibe ebiet iduñ esie” (Psalm 27:4, 5).
Nnyin ikpeyakke ndik akan nnyin. Nnyin imekeme ndidi mme andikan oto ke mbuọtidem. Ikuyak mme ikọ Isaiah anam nnyin idighe edi yak nnyin ikam ibeñe idem, inam utom, ikpeme, inyuñ ibet eridi Ọbọñ, ndien ke ntre ibọhọ Akwa Ukut emi editienede ererimbot.
Questions
MME MBUME- Nso edi utom anditiñ ntiñ-nnim ikọ?
- Nso edi mme ntiñ-nnim ikọ Isaiah emi osude?
- Nso edi ukut?
- Nso edi ntak emi Akwa Ukut edidide?
- Akwa Ukut edida itie ke mmọñ?
- Didie ke Akwa Ukut edituk mme owo?
- Nso iditibe ye utin, ọfiọñ ye ntantafiọñ?
- Didie ke mme ndinen owo edibọhọ Ukut oro?
- Nso ke owo enyene ndinam ndidu ke mbeñidem mbet eridi Ọbọñ?
- Didie ke nnyin ifiọk ite ke Ukut eyedu?