Lesson 352 - Junior
Memory Verse
IKỌ IBUOT: “Mbufo ekabare esit; koro Ubọñ Heaven ke ekpere” (Matthew 3:2).Notes
Ufọk John
Ke nsat, itiat-itiat ye obot-obot obio Judea, ke ñkañ edem usop-utin emi esañade esim mben esuk Inyañ Mkpa, John, Ọduọk-owo mmọñ ama amana ọnọ ete ye eka emi ekedide mbon nsuhọreidem. Ndusuk ke ufọk esie enye ekeme ndida ñkut Obot Nebo ye Inyañ Jordan, ye mme ñkan-ñkuk Obio Jericho. Mben idim Cherith emi mme utere ekebọkde Elijah ke ini akañ ama onyuñ ekpere do. Ndusuk ini John ama esika ekese ndusuk mme ebiet emi mme Anditiñ ntiñ-nnim ikọ eke Abasi ekenamde ekabare edi edisana. Ukem-ukem odudu, ye ukeme, ye ifiopesit emi ekekutde ke Elijah, ama onyuñ odu ke esit John. Mme edu-uwem, ye edisine-ñkpọ esie ñko, ama onyuñ ebiet eke Elijah. Mme udia esie ekedi aran ọkwọk-ikọt ye ñkuku-ñkpọyọriyọ (Matthew 3:4), emi ndusuk ekeñwande ke iso utin, emi ekemede ndidi ke inem esie ekebiet obu.
Etop Esie
John ekedi owo emi ekenyenede mfọniso ndisian mbaña eridi Jesus. Nte ñkpọ utiñ-ikọ emi ọsọñde uyo, uyo esie ama asuana ọdọk mme obot, ndien mme owo ke Jerusalem ye Judea, ye mmọ emi ekeduñde ñkan-ñkuk mben Inyañ Jordan ema ewọñọ udim-udim edi ke obio, man edikop ukwọrọ-ikọ John. Ndidem edem usiaha-utin ediwak ini esima ndidọñ isuñ-utom eka ekediọñ usuñ enyuñ emen ñkpọ ubiọñọ efep, mbem iso mmọ edika. Ke ntre utom John ekedi ndidiọñ usuñ mbeñe eridi Jesus ke ererimbot. “Emenere ọkpọ-usuñ enọ Abasi nnyin ke desert. Kpukpru itihere ebiet eyemenere ke enyọñ, kpukpru ikpọ ye ñkpri obot eyenyuñ esuhọre: se ikwañade eyenyuñ akabare enen, ibombom eyenyuñ akabare edi una-isọñ” (Isaiah 40:3, 4). Mme utom esie ikedighe ndibọp mme ikpọ usuñ eke etarade enyuñ eñwañade, ye ndisuan mme obot, edi enye ekedi ndida owo mfiak ke usuñ ñkop item, nnyuñ mkpep mmọ ndisio ntañidem ye mbubik ido ke uwem mmọ mfep; nnyuñ ñkabare esit ñkpọñ mme idiọk-ñkpọ mmọ.
Ukwọrọ-ikọ emi ekenyenede ikọ duop akada ubiom-ikpe ọnọ mme owo emi ekeyarade mme idiọk-ñkpọ mmọ enyuñ enade uduọk-mmọñ ke ubọk John ke Jordan. Nso ikedi akpan etop emi John ọkọkwọrọde? “Mbufo ekabare esit; koro Ubọñ Heaven ke ekpere” (Matthew 3:2).
Mme Ukpep-Ñkpọ Emi Ekutde Ke Enyin
“Ubọñ Heaven” ọkọwọrọ didie? Etiñ ediwak ñkpọ ke Ñwed Abasi ebaña emi, onyuñ edi akpan ñkpọ nnyin ndifiọk. Jesus akada mme uwut-ñkpọ emi ndiñwana ndinam enye añwaña: (1) Mkpasip mustard; (2) Leaven eke emende esin ke ndom-uyo; (3) Owo urua; (4) Iyire eke eduọkde ke inyañ; (5) Eti mkpasip; (6) Inyene eke edibede ke iñwañ (Matthew 13:31-47); (7) Ete ufọk (Matthew 20:1); (8) Edidem kiet emi anamde udia-ndọ ọnọ eyen esie (Matthew 22:2); (9) Nditọ-iban duop emi ekewọñọde eka ndisobo ye ọdọ-ndọ (Matthew 25:1). Daniel onyuñ etiñ abaña enye nte akwa itiat kiet (Daniel 2:31-45); ye ndusuk mme andiwet Akani Ediomi ema etiñ ñkpọ etuk ñko.
Emi ekeme nditie nte ñkpọ emi ekpetimere ndusuk mkparawa iren ye iban, edi nnyin iyom nditim ntat enyin nnyin, ye utọñ nnyin, ye mme esit nnyin; man ikpep se emi ọwọrọde. Nnyin iyomke nditie nte mme nnan ke mbuk ñke emi ekeyomde ndifiọk nte enin etiede. Owo nnan kiet otuk nnuk onyuñ ọdọhọ ete, ke emi mmọfiọk nte ke enin etie nte eduat; owo efen otuk ukot, onyuñ ọdọhọ ete ana nte enye etie nte eto, kpa ye oro owo nnan eñwen ọduọ odoro ke idem enin, onyuñ ete ke enin etie nte ibibene. Edi nnyin idighe nnan, nte nnyin ikutde ñkpọ inyuñ idighe enye eke mikaha anyan, emi akpanamde nnyin ikot ubak itie ikpọñ-ikpọñ ke ñwed Abasi, edi nnyin imenyene ofuri ikọ Abasi, do ke nnyin ikeme ndikut ibọrọ mbume: Obio Ubọñ Heaven ọwọrọ nso?
Jesus ediwak ini esida “ñkpo emi owo ekutde” ke enyin, man Enye anam mme owo efiọk se Enye ekpepde. Enye onyuñ etiñ abaña mkpasip mustard, ete ke enye ekpri akan kpukpru mkpasip, edi ke ini ọkọride okpon akan mbiet, onyuñ akabare edi eto, mme inuen enyọñ enyuñ edi edikubọ ke ñkọk esie. Jesus ete, ke emi ebiet Obio Ubọñ Heaven.
Mme asaña-isañ emi ema ekesim Edisana Obio, ebuk enọ nnyin ete, ke uduot mustard emi Jesus eketiñde abaña, ke akaka iso ọkọri uwak-uwak ke Palestine, tutu ndusuk ini ọniọñ osim akamba idaha. Inyuñ idighe ọkpọsọñ ñkpọ owo ndifiọk nte ke ini edimende “isuñi” ifep ke iso isọñ ke ini mme ñkpri ye ikpọ eto edikọride enyuñ eyede uyai kpa ntre eto mustard eyekọri onyuñ okoñ tutu osim akamba idaha.
Edidem Ye Obio Ubọñ
Obio Ubọñ ye mme andidu ke idak ukara enyene ndinyene edidem, ye mbon ufọk edidem, ye ebekpo, ubon ubọñ, ye mme ada idaha; ye mme owo, mmọ emi edude ke idak ukara emi ekopde uyo edidem. Ke ini Christ Edidem edifiakde edi ndikara ke ererimbot, Enye eyewuk Ebekpo Ubọñ Esie ke Jerusalem ndien “ubọñ Jehovah eyeyarare, kpukpru owo ọtọ kiet eyenyuñ ekut Enye: koro uyo Jehovah ọdọhọde” (Isaiah 40:5). Ndisana owo emi ekesañade ye Christ efiak edi, eyekara ye Enye (Eriyarare 2:26, 27; 5:10), nte nnyin ikekpepde ke ọyọhọ ukpep-ñkpọ 342. Edinem ukara emi Christ edidide Edidem eyesim ofuri ererimbot. Nte emi iditiehe nte eto emi ọkọride tutu ọyọhọ ofuri iso isọñ? Me nte itiat, emi Daniel eketiñde abaña, emi okonyuñ ọyọhọde ke ofuri iso isọñ?
Ñkọri Esie
Ini Emana Eti-Mbuk emi, edi mme usen eke nnyin idude ke esit, emi edi akpa ikpehe Obio Ubọn Esie. Akpa, ekedi uyo ọkwọrọ-ikọ emi akasañade ikpọñ, edisine-ñkpọ esie ekedide idet akamba enañ-mbiomo (camel) (Matthew 3:4), ekenyuñ ekopde uyo esie ke akpa-utatan. NDIEN JESUS EDI! Ema enyuñ enam ediwak owo ewọrọ ke ufin idiọk-ñkpọ, ñko ema enyuñ emek mme Apostle duopeba ndikwọrọ Eti-Mbuk. Mmọ ema ewọrọ eka ndien mbuk emi onyuñ asuana usọp-usọp oto ke ikọ inua mmọ. Ke mme isua emi ekebede, mme anam-akpanikọ ke otu mme ọkwọrọ-ikọ ye mme anam-utom Abasi, ye mme asuan-etop ikọ Abasi, edi mmọ ke ekekut nte esiande mme ukpọñ emi edude ke ekim ebaña eti-mbuk erinyaña nsio ke idiọk-ñkpọ. “Enyene ndibem iso ñkwọrọ gospel nnọ kpukpru mme idut” (Mark 13:10), mbemiso Jesus edi, ke enyuñ enanam emi okure ke mme utit usen emi. Mmọ emi ema ekemana obufa ke akpanikọ, enyene udọñ nditiñ nnọ mmọ eñwen mbaña Jesus; ndien ke mme usen emi, ye mbufa ñkpọ utom, Eti-Mbuk ke asuana usọp-usọp.
Mme ubom-isọñ, ye mme nsuñikañ ke akpa, ye mme ubom-ofum ke ikpa-enyọñ, edi mme ñkpọ emi ekekamade esuan etop erinyaña. Okposuk edi nte uyo John ama eketre ke anyan ini ndiyomo ke obot Judea, edi ke ekokop uyo mme ọkwọrọ akpanikọ ye edinen ido. Ufọk Abasi Apostolic Faith enyene udeme ke ndisuan etop Eti-Mbuk mbe ke mme mboho efak. Mme ufọk-ñkpọkọbi, ye ufọk-ibọk ye mme ufọk iduñ edi ebiet esikade; idem mmọ emi edude nsan-nsan ke mme isuo esimen Eti-Mbuk ke nsuñikañ esọk mmọ; esika ekese mme owo emi ebehede ke nsuñikañ enyuñ eda mmọ edi ke ufọk Abasi; esida nditọwọñ ñko edi ke Sunday School, ebiet emi esikpepde mmọ ikọ Abasi. Enọ ñwed Ikọ Abasi ke mfọn eka ediwak esen idut ye kpukpru obio ke America. Mme tọsin owo ke ebọbọ mme ñwed emi ye mme ñkpri mbak ñwed eke emiñde ikọ Abasi esin, ñko esibọ uwọrọ-ufin ke idiọk-ñkpọ ye erikọk ke ikpọhidem. Eda ediwak usuñ efen ke nditim nsin ifik nnam mme ewuhọ emi Jesus ọkọnọde ete “Eka ke ofuri ererimbot ekekwọrọ gospel enọ kpukpru owo” (Mark 16:15).
Nti Mbuk
“Ukot owo eti mbuk eye didie ke enyọñ ikpọ obot! Ukot owo eke ọkwọrọde emem, eke obukde eti ñkpọ, eke ọkwọrọde erinyaña” (Isaiah 52:7). Mmọ emi esuande Gospel edi mme akama eti-mbuk, koro ikọ oro “gospel” ọwọrọ “eti-mbuk.” Nte afo edi enye emi akamade eti-mbuk? Midighe ntre, nsinam afo mutọñọke mfin emi nditọ mkpasip eti ido ye ima, ye erinyaña, nnyuñ nse nte ekpri mkpasip edisọpde nditibe. Afo emekeme ndiñwam “eto mustard” ndikọri ñka iso tutu Jesus editañ mmọ emi ekedude ke mbeñidem ndisobo ye Enye. “Eyenyuñ ekwọrọ gospel ubọñ Abasi emi ke ofuri ekondo nte ntiense enọ kpukpru mme idut, ndien adañoro ke utit eyedi” (Matthew 24:14). Nnyin imenim ite utit emekpere eti-eti.
Questions
MME MBUME- Ekekop uyo anie ke akai-ikọt ke Judea?
- Nso ikedi ntak emi ekedọñde enye? Nso ikedi etop esie?
- Nso ikedi udia esie? ọfọñ idem esie?
- Enye akada mbiet ido anie ke Akani Ediomi?
- Nọ uwut-ñkpọ ita emi Jesus ọkonọde, nditiñ ñwut nte Obio Ubọñ Heaven etiede.
- Ekeyom ekwọrọ etop Eti-Mbuk enọ mme anie?
- Nnyin ikeme didie ndiñwam ke ndisuan Eti-Mbuk? Nte afo ke ananam oro?
- Nso ke Jesus eketiñ abaña John ọduọk-owo mmọñ?
- Nnyin inam didie ifiọk ite utit emekpere eti-eti?