1 John 1:1-10; 2:1-17, 24, 25, 28, 29; 3:1-24; 4:7-21; 5:1-21; 2 John 1-6, 12, 13; 3 John 1-8, 12-14.

Lesson 361 - Senior

Memory Verse
IKỌ IBUOT: “Edieke owo ọdọhọde ete, Mmama Abasi, ndien enye asua eyen-ete esie, enye edi osu-nsu; koro owo emi mimaña eyen-ete esie emi enye okokutde ke enyin ikemeke ndima Abasi emi enye mikekwe” (1 John 4:20).
Cross References

I. Ebuana Ye Abasi

1. Jesus Christ, ima Abasi emi eyararede enọ nnyin, edi ñkukure idaha idaresit nsinsi, 1 John 1:1-4; 2:25; 5:11-13; John 3:14, 15, 36; Utom Mme Apostle 4:10-12; John 17:2, 3

2. Abasi edi uñwana, ndien mmọ emi ebuanade ñkpọ ye Enye enyene ndisaña ke uñwana enyuñ enim mme mbet Esie, 1 John 1:5-7; 2:3-6, 24, 28; 5:1-3

3. Nditọ Abasi enyene uyuhọ idara ke ebuana kiet ye eken ke ini mmọ esañade ke uñwana, 1 John 1:7; 2 John 1-6, 12, 13; 3 John 1-4, 12-14

4. Kpukpru owo ema enam idiọk, edi mmọ emi eyararede mme idiọk-ñkpọ mmọ enọ Abasi enyene erifen, 1 John 1:8-10; 2:1, 2; Mme Ñke 28:13; Isaiah 55:7; Utom Mme Apostle 3:19

5. Mmọ eke emade ererimbot inyeneke ebuana ye Abasi, 1 John 2:15-17; Ñwed Mbon Rome 12:2; Titus 2:12; James 4:4

II. Mme Andinim Ke Akpanikọ Edi Nditọ

1. Ima Abasi ayarare ke edikpe ekọm-urua man nditọ owo ekpekabare edi nditọ Abasi, 1 John 3:1-3; John 3:16; Ñwed Mbon Rome 5:8; Ñwed Mbon Ephesus 2:4, 5

2. Nditọ Abasi emi ema ekemana obufa inamke idiọk-ñkpọ, 1 John 3:4-10; 2:12-14, 29; 5:4, 5, 18-21; Ñwed Mbon Galatia 6:7, 8; James 1:27

3. Nditọ Abasi emama nditọ ete mmọ, 1 John 3:11-19; 4:7-12, 20, 21; 2:7-11; 5:16, 17; Luke 10:25-37; John 13:35; 15:12; 1 Peter 1:22; 3 John 5-8

4. Uko ye mbuọtidem eto ke edinim mbet Abasi, 1 John 3:20-23; 4:17-19; 5:14, 15; John 15:7

5. Abasi edi ọyọhọ ntiense ọnọ nditọ Esie, 1 John 3:24; 4:13-16; 5:6-10; Ñwed Mbon Rome 8:16; Ñwed Mbon Galatia 4:6

Notes
SE EKPEPDE EBAÑA

Ima Abasi

John, owo mbet Jesus, emi ekeberede ke ikpanesit Jesus, ewak nditiñ mbaña enye nte Mbet ima, idighe koro enye ekekperede Ọbọñ eti-eti ke ini ukwọrọ-ikọ Esie ke isua ita, edi ke abaña mme ntọtuñọ ukpep-ñkpọ ke mme ñwed esie emi abañade ima Abasi. Koro John ekedide ọyọhọ ntiense ọnọ Jesus Christ ọtọñọde ke ini ñtọñọ ukwọrọ-ikọ Abasi Esie tutu osim mkpa Esie ke krọs, ama okonyuñ okut ufọn ima Abasi ke idem esie ye ke idem mme Mbet eken, ukpep-ñkpọ ima Abasi okotuk esit esie osim ukpọñ. Ke ediwak isua ema ekebe, ke idak nda-usuñ Edisana Spirit, enye ama ewet ekese abaña akpan ukpep-ñkpọ emi.

Mbet emi ama ewet ete: “Abasi edi ima”, ndien ima oro ama otim ayarare oto ke edinọ Eyen Esie kierakiet man afak ererimbot. “Enye ekedi ke ebiet Esiemọ, edi mmọ emi edide iman Esiemọ idarake Enye. Edi kpukpru owo eke edarade Enye, Enye ọnọ mmọ unen ndikabare ndi nditọ Abasi, kpa mmọ emi ebuọtde idem ke enyiñ Esie” (John 1:11, 12).

John ekedi kiet ke otu mmọ oro ekenimde enyuñ enyimede Jesus, Eyen Abasi. Ke Jesus ama ọkọnyọñ aka ke Heaven, John ama ọfiọk utọ eti ini oro enye ekenyenede, ndikodu ye Jesus. John ama ekeme ndibọrọ ini kiet ke abaña ekikere mme osioño-ndo emi ekedọhọde ete ke Jesus ekedi eti owo ye andikpep; onyuñ ọdọhọ ete: “Se ikodude toto ke eritọñọ, se nnyin ikokopde, se ikokutde ke enyin, se inyuñ isede, inyuñ idade ubọk ituk, ibaña Ikọ uwem” (1 John 1:1). Koro midighe obuk ye iyip akayarare utibe nsinsi akpanikọ emi ọnọ edima Mbet emi, edi Abasi Ete akayarade akpanikọ emi oto ke Heaven. (Se ke Matthew 15:16, 17).

Ifiọk Edimana Obufa

John ama enyene ifiọk abaña Jesus ndien utọ ifiọk oro odu ọnọ kpukpru owo. Jesus ọkọdọhọ Thomas ete: “Sia ama okokut Mi, omonim ke akpanikọ? Ọfọfọn ọnọ mmọ emi mikekwe, edi enimde ke akpanikọ” (John 20:29). Ke mme ñwed emi John, owo mbet ewetde, eneñere etiñ akpanikọ ete ke Jesus ama ekpep ke ini utom ukwọrọ-ikọ Esie; oro edi, ndifiọk Jesus ndinyuñ nnim Enye ke akpanikọ ọwọrọ ata akpan ñkpọ akan ndinyene ifiọk ibuot. Emi edi ata akpanikọ, koro ata akamba ubak mme anditiene-Christ emi enyene ifiọk ibuot ke abaña Jesus enyuñ ekot oro “eti usuñ nditiene Christ.”

Ekeme ndidiọñọ Jesus oto ke ñkukure usuñ ifiọk owo ndiyarare mme idiọk-ñkpọ mmọ nnyuñ ñkpọñ mmọ, ndien asaña ke uñwana Ikọ Abasi. Se Ñwed Abasi etiñde abaña ndinim Christ ke akpanikọ edi ofuri-ofuri edinim mme mbet Esie. Ke ini owo asañade ekpere Abasi, ayarare onyuñ ọkpọñde mme idiọk-ñkpọ, onimde Jesus Christ ke akpanikọ ye ufak oro Enye akafakde owo oto ke mkpa Esie ke krọs, Abasi ọfọn ido onyuñ enen ndifen mme idiọk-ñkpọ owo. Utọ ifiọk Abasi oro edi se ekotde ete edimana-obufa. Edi ata akpan ifiọk, ke esiode oro efep, baba owo kiet idikwe Obio Ubọñ Abasi. (Se ke John 3:1-8).

Nditọ Abasi

Ifiọk edimana-obufa ọkpuhọre owo ererimbot anam enye edi eyen Abasi. (Enye ọkpọdiọk nte ọdọdiọk mme ebik mbubik nte ededi, isehe nte enye okokoñde ke ñkpọ uwem ererimbot emi, me enye akanam idiọk ọtuñọ adaña didie). Esio ima ñkpọ ererimbot ke enye efep, ndien ima Abasi ada itie esie. Ubiom-ikpe idiọk-ñkpọ ọwọrọ ọkpọñ esit esie, ndien iwuk ke Abasi amana do onyuñ ọkọri, ọkọri adaña ini nte eyen Abasi emi asañade ke uñwana ikọ Abasi. Spirit Abasi edi ntiense onọ Spirit nditọ Esie ete ke mmọ edi nditọ Esie.

Kpukpru mme utibe edidiọñ emi, ye ediwak efen, esana eyak enọ nditọ Abasi oto ke akakan ñwọrọ-nda ima Abasi. Utom efen emi okponde emi enamde ke esit owo oto nda-usuñ iyip ufak emi adade owo esin ke ubon nditọ Abasi edi idorenyin ete ke nditọ Abasi ke usen kiet ke mmọ eyekut Abasi nte Enye etiede. “Kpukpru owo eke edoride enyin ke Enye ntem enam idem asana, kpa nte Enye asanade” (1 John 3:3). Abasi anyaña ukpọñ owo osio ke idiọk-ñkpọ, ndien edieke enye osuk akade iso ke idak mfọn oro, enyene idaha ñkọri ke mfọn Abasi ọtọñọde ke ini oro tutu eda ukpọñ enyọñ ke Heaven.

Mme idiọk-ñkpọ iduhe ke idem nditọ Abasi. Idiọk-ñkpọ edi edibiat mbet Abasi, ndien ekesio Jesus Christ enim man emen idiọk-ñkpọ efep. Ke Christ, idiọk-ñkpọ iduhe, ndien “Baba owo kiet eke oduñde ke Enye inamke idiọk-ñkpọ. Kpukpru owo eke enamde idiọk-ñkpọ ikekwe Enye, inyuñ ifiọkke Enye” (1 John 3:6). Mbet emi, edi ọyọhọ ntiense ke mme utibe utom odudu Jesus, onyuñ emek ndikpañ utọñ ke nneme ye mme item Esie, otim etiñ añwaña abaña edu ndusuk owo emi ekotde idem mme anditiene-Christ emi enamde idiọk-ñkpọ. Ke nda-usuñ Spirit, Mbet ọkọdọhọ ete owo ikemeke ndinam idiọk ndien osuk edi anditiene-Christ. “Baba owo kiet eke Abasi okobonde inamke idiọk-ñkpọ, koro se Abasi adade obon enye nte eyen oduñde enye ke idem; enye inyuñ ikemeke ndinam idiọk-ñkpọ, sia edide Abasi okobon enye” (1 John 3:9). Abasi ọkpuhọ uduot owo, onyuñ emen udọñ idiọk-ñkpọ ke esit efep ke ini owo amanade ke Abasi.

Ima Ke Otu Nditọ-Ete

“Ima odu ke oruk usuñ emi, itoho ke emi nnyin ikamade Abasi, edi oto ke emi Abasi akamade nnyin, onyuñ osiode Eyen Esie ọdọñ, ete, edidi usio-isop mme idiọk-ñkpọ nnyin. Ndima, edieke Abasi akamade nnyin ntem, nnyin nde ikpama kiet eken” (1 John 4:10, 11). Mbet Abasi ọdọhọ nditọ Abasi ema kiet eken, inọhọ nnyin ifet ndimek mme iyenam ntre me idinamke. Ke ofuri Obufa Ediomi, ima Abasi ke idem owo ayarare ke ini enye ekemede ndima owo efen, ke ebede oro, enye inyeneke ima Abasi. “Edieke nnyin imade kiet eken, Abasi ododuñ ke esit nnyin, ema enyuñ enam ima Esie ọfọn ama ke uwem nnyin” (1 John 4:12).

Ima eke owo amade owo, ibemke ima Abasi ke esit anditiene-Christ iso, edi mmọ mbiba esaña ọtọ kiet. Nsọñesit ye ima Abasi ikemeke ndiduñ ọtọ kiet. Ndusuk owo eyeyuhọ ke ndima mme ufan ye mme owo obio mmọ, edi mmọ esua mme asua mmọ. Jesus ọkọdọhọ ete, “Ami ndọhọ mbufo nte, Ema mme asua mbufo, enyuñ ebọñ akam eyom ufọn mmọ eke enamde mbufo isin-enyin: man mbufo edi nditọ Ete mbufo emi odude ke Heaven” (Matthew 5:44, 45).

Ima nditọ ete itoho owo, edi Abasi akanam enye esin ke esit owo. Ebuana ke Abasi ye ebuana ke otu nditọ Abasi esaña ubọk kiet, owo ikemeke ndinyene kiet, ñkpọñ enye eken. Ebuana ata nditọ Abasi ikemeke ndinyene mbiet; koro, ke akpanikọ, ebuana edi udomo idaha ke Spirit Abasi emi ọfiọrọde ke ufọt Spirit nditọ Abasi. Ke ini ebuana ke ufọt owo ye Abasi abiarade, ebuana ke ufọt esie ye nditọ Abasi eken onyuñ abiara ñko.

Ima nditọ ete emi edituñọ adaña didie? Enye enyene ndituñọ tutu anam eyen Abasi abuana udia me ñkpọ ekededi eke enye enyenede ye kiet eken emi ananade. Edieke owo ọdọhọde ete imọ idi owo Abasi, edi inyeneke mbọm inọ eyen ete esie emi odude ke unana, ikọ esie idighe akpanikọ. Spirit Abasi anam ifiọk ete, nte Christ akayakde uwem Esie ọnọ nnyin, ntre nnyin, “ikponyuñ iyak uwem nnyin inọ kabaña nditọ-ete” (1 John 3:16). Ke ini eyo mme Mbet, mkpaña ke abaña utom Abasi ama awak, ke akpanikọ ekedi se owo kiet ke otu nditọ Abasi enyimede ndiyak uwem esie, man nditọ Abasi eken ebọhọ. Ima nditọ-ete ikpenyeneke ndisuhọre ke emi. Enye emi midinọhọ owo ọbiọñ udia esie, idikemekekeme ndiyak uwem esie nnọ nditọ-ete.

Ọfiọk-ibet okobup Jesus, “Andikpep, ndinam nso man nnyene nsinsi uwem?” Jesus okobup ọfiọk-ibet se ibet etiñde abaña mbume emi, ndien ọfiọk-ibet ama ọbọrọ. Jesus ama ọdọhọ enye ete, “Omotim ọbọrọ: nam ntre, ndien eyedu uwem” (Luke 10:25, 28). Nso ikedi ibọrọ ọfiọk-ibet? “Ma Jehovah Abasi fo ke ofuri esit fo, ye ke ofuri ukpọñ fo, ye ke ofuri odudu fo, ye ke ofuri ekikere fo; nyuñ ma mbọhiduñ fo nte idem fo” (Luke 10:27). Ima emi, ndien, edida osim nsinsi uwem ọnọ owo emi enyenede enye. Nte ata ediwak owo mfin, ọfiọk-ibet okoyom nditebe idem esie ikpe, ntem ke enye okobup Jesus etiñ ọnọ imọ owo eke edide mbọhiduñ imọ. Jesus eketiñ mbuk Eti Owo Samaria, okonyuñ obup ọfiọk-ibet owo emi enye ekerede ete ekedi mbọhiduñ Jew emi ọkọduọde ke otu mbon-ñwo. Ndusuk ini ọfiọk-ibet emi akasasua owo Samaria emi, nte ediwak mme Jew enamde, koro enye mikadaha enyiñ, edi okonyime se idide akpanikọ; “Edi owo emi akatuade enye mbọm.” Ekem Jesus ọdọhọ ete, “Ka kanam kpasuk ntre” (Luke 10:37).

Fiak ti, ete, mbuk Eti Owo Samaria enyene nsinsi ebuana. “Anie edi mbọhiduñ mi?” Mbume emi abaña kpukpru mmọ emi edidukde Heaven. Mbọhiduñ nnyin edi adaña owo ekededi eke nnyin inamde eti ñkpọ inọ, me enye emi nnyin idade isọk Abasi.

Questions
MME MBUME
  1. Emem adaña didie owo ndinyene ebuana ye nditọ Abasi?
  2. Anie ke otu nditọ owo akanam idiọk-ñkpọ?
  3. Ke nso utọ usuñ ke ekeme ndifen ke mme idiọk-ñkpọ nnyin?
  4. Nso itibe ke ini owo odomode ndima Abasi ye ererimbot ini kiet oro?
  5. Mme anie edi nditọ Abasi?
  6. Nso edi ntak emi idiọk-ñkpọ mikemeke ndidu ke uwem owo Abasi?
  7. Nso idi ntak emi ọfọnde nditọ Abasi ndima nditọ ete mmọ?
  8. Adaña didie ke eyen Abasi edinyime ndida ikọ ima emi nsọk eyen ete esie?
  9. Nditọ Abasi ekpenam didie ye mmọ emi ekwọrọde nsu-nsu ukwọrọ-ikọ?