Lesson 363 - Senior

Memory Verse

IKỌ IBUOT: “Eyak nnyin idara inyuñ idat esit, inyuñ inọ Enye ubọñ; koro ekem ini ndọ Eyen-erọñ, Ñwan Esie otim idem ebeñe Enye” (Eriyarare 19:7).

Cross References

I. Ñwan Ndọ Christ Ebiet Enyene Ido Añwan

1. Enye edi owo akpanikọ, Mme Ñke 31:10-12; Matthew 24:45-47

2. Enye edi anam utom ke unyime esit, Mme Ñke 31:13-19, 22-25; Genesis 24:18-20

3. Enye añwam mbon ubuene onyuñ ọfọn ido, Mme Ñke 31:20, 26; Psalm 112:9; James 1:27

4. Enye inyeneke ubiom-ikpe ibaña nditie ifu mme nditre ndinam ubiọñ utom esie, Mme Ñke 31:21, 27; Mme Hebrew 2:3

5. Uteñe Abasi anam enye oñwum mfri itoro emi, Mme Ñke 31:28-31; Psalm 111:10; Mme Ñke 22:4; Isaiah 11:2

II. Ñke Ke Abaña Nditọ Iban-Duop

1. Nditọ iban duop ebet ini ọdọ-ndọ edidide, Matthew 25:1-9

2. Ọdọ-ndọ edi ndien ubahare ada itie, Matthew 25:10-13

III. Ñke Ke Abaña Talent

1. Ema edeme Talent enyuñ eda mmọ enyam urua, Matthew 25:14-18

2. Ọbọñ mmọ ọnyọñ isañ edi ndien ubahare ada itie, Matthew 25:19-30

IV. Etop Emi Ekenọde Esọk Ufọk Abasi Ke Ephesus

1. Etoro ufọk Abasi ke ediwak ñkpọ, Eriyarare 2:1-3

2. Kpa ye oro enye ama ọkpọñ akpa ima esie, Eriyarare 2:4

Notes

SE EKPEPDE EBAÑA

Anana Ndo Ñwan-ndọ

Etiñ ebaña Ñwan-ndo Christ nte “Ufọk Abasi emi ọyọhọde ye ubọñ, minyuñ inyeneke ntọi mme eriñwine mme oruk ñkpọ eke etiede ntre” (Ñwed Mbon Ephesus 5:27). Enye edi “edisana eyen-añwan” (2 Ñwed Corinth 11:2), “enọ enye ndisine ediye linen eke asanade onyuñ esemde” (Eriyarare 19:8). Edinam-asana kpa edisana esit, edi enọ emi enye ọbọde oto Iyip Enye emi ọkọduọkde uwem Esie ke abaña enye. Enye enyene ndinana ndo ke kpukpru usuñ ñkpuhọre ye mbon ererimbot nnyuñ nsaña ke edisana ido kpukpru usen uwem esie. Enye enyene nditiñ enyin didie nsaña man edi kiet ke otu mmọ oro “Abasi okokotde onyuñ emekde, emi enyuñ edide mme anam akpanikọ” (Eriyarare 17:14). Kpa ye oro etop ikot ana ọnọ “owo eke amade” ndidi Ñwan-ndọ Christ.

Edinam Akpanikọ

Yak ikere ibaña mmọ emi edide Iban-ndọ nte enyene-ido añwan emi etiñde ebaña ke Mme Ñke 31:10-31. Utọ esie iwakke ndidu, ekọm-urua esie akan pearl anyan usuñ. Nso inam enye etie ntre? “Esit ebe esie ọbuọt idem ye enye.” Edieke enye (ebe) ebighide ndidi ke isua kiet, edieke ebighide ndidi ke isua duop, enye ñwan idikpaha mba, idinyuñ ikopke mmem-idem, idinyuñ idukke nduk ye mbon ererimbot, me ndinam mme usuk ido ererimbot. Idighe ntre! Esit esie adiana ye eke Christ, ndien Enye ekeme ndinim ñwan-ndọ Esie ke akpanikọ. Ido edisine ñkpọ ererimbot emi idukke enye enyin, anam owo ikemeke ndikut enye ye ñkpọ emi edade eyet ke mkpọk-inua, me ndiyara idet-unam, me ndisine ñkpọ eke midotke. Yak mme owo ekot enye enyene akani ido añwan; esit esie osuk ọwuhọ ke Enye.

Edifube Ñkpọ Ererimbot

James ama okut ediwak owo emi ererimbot ama ekedep esit mmọ, ndien enye ama ofiori ete: “Mbufo iban ñka-owo, nte mbufo ifiọkke ite, eridi ufan ye ererimbot edi eridi usua ye Abasi? mmọdo owo ekededi eke oyomde ndidi ufan ye ererimbot anam idem usua ye Abasi” (James 4:4). Ufọk Abasi eyo emi esin efibe ye ererimbot, edi mmọ idighe iban-ndọ Christ.

Ekedi ñkpọ mfuhọ ke ini ekọñ, ndikut nte ediwak iren owo ekekpọñde iban ndọ mmọ emi mmọ emade eka anyan ebiet man ekeñwana ekọñ enọ idut mmọ; ndien nte kiet osiode ikpat, owo efen ediduk edep esit añwan esie, ndien enye akabare ọsuhọ ikpọñ ke mfuhọ. Ediwak owo ke enanam ukem emi ye Eyen Abasi. Mmọ emi ekpenamde akpanikọ enọ Christ ema eyak ererimbot ebe oduk onyuñ edep esit mmọ. Mmọ enam ukem se mbon ererimbot enamde ndinem idem mmọ esit. Mmọ eka mme itie mbre ke okoneyo, eka itie ubre nsa ye itie ñkpọ ererimbot eken. Mbon eken eyak mbubehe mmọ ekan mmọ ubọk ndien eduk ebuhọ ke mfina uwem emi, ndien eyak ima Christ ọfiọnọre ọkpọñ esit mmọ. Jesus ọfiọk utọ esit eke Enye ekemede ndinim ke akpanikọ, ndien Enye kononim ñwan-ndọ Esie ke akpanikọ.

Ntiñ-Enyin

Ñwan-ndọ Christ okpon akan edisana-eyen añwan, emi akamade idem ke edisana onyuñ esinede ediye ọfọñidem, emi awañde ubọk etie ke ido ifu ke enyọñ udori-ibuot ebet ini emi Ọbọñ esie edidide. Enye enyene ndinam, nte mme asian nditọ iban ekenamde, enyene nsuhọ aran ke ekpeme esie emi edide mbiet Edisana Spirit. Ke ini owo ọbọde Uduọk-mmọñ Edisana Spirit, Spirit Abasi ebe oduk ke uwem esie man oduñ do onyuñ ada ukpọñ oro usuñ, man ọnọ owo oro odudu ye uko ke utom Ọbọñ. Ntem ke ñwan-ndọ Christ “onyuñ ada ubọk anam mmọ ke ofuri ima esit” (Mme Ñke 31:13). Enye otim etiñ-enyin ke utom emi Abasi okokotde enye ete edinam.

Ke ñke emi abañade Talent, Jesus emen owut ufọn emi odude ke owo nditim nsin ifik nnyuñ nnam akpanikọ ke utom Esie. Abasi ọnọ ifet ndida nnam utom nte ukeme nnyin edide. Kpa ini oro Ete nnyin ke Enyọñ ọnọde nnyin talent, ñwan-ndọ, ke ima idibiatke ini ndida enye nnam utom. “Enye otim ese ido ufọk esiemọ, inyuñ idiaha udia ifu” (Mme Ñke 31:27). Ke akpa ifet utom esie eketie nte etre ke ufọk esie ikpọñ, edi ibighike, “enye anyan ubọk esie ọnọ mme ubuene” (Mme Ñke 31:20). Enye ayarade okut ufọk odori ke eto-ufiak-ndidi,” anam ọfọñ ọnọ nditọ, ọyuhọ mme inua ọbiọñ ye udia, onyuñ ekese eka emi ọdọñọde.

Nte ekutde utom ime ye eti-ido esie, enye okut nte eyomde uñwam esie uwak-uwak. Ndusuk ekeme ndikot enye ete edika ekese mme owo ke mme ufọk-ibọk, mme etiñ mbuk erinyaña ọnọ mme owo ke ufọk-ñkpọkọbi, mme ọnọ mmọ eke ema ekesop usuñ ke idiọk-ñkpọ ke mme ikpọ obio.

Uteñe Jehovah

Enye otim enyene ntọtuñọ ima ọnọ eti idaha Ọbọñ esie emi enye mikwe, ndien mme nti utom edinen ido esie emi edotde se etorode, etop ewọrọ ye uteñe emi edude ke esit esie. Enye oyom ekpono Akwa Enyiñ Ebe-Esie ke utom ekededi eke enye anamde ke ofuri eyo uwem esie.

Aran

“Enye ebiet ubom mbon urua; ada udia esie ke anyan ebiet edi.” Ke didie ke Ñwan-ndọ edifiọk ete ke imọ ikemeke ndibere ke ikpikpu ñkpọ ererimbot, edi ke ndibe-itie esie, ayak esit esie enyene ebuana ye Abasi ndien ọbọ ukeme ye mfọn ndida nnam uwak utom esie, ndien ada “udia” esie ke anyan ebiet edi. Uwem-edibọñ akam esie anam enye osuk aka iso ndinyene aran ke ekpeme esie ndien ke ntak oro “utuenikañ esie inimeke ke okoneyo.”

Unana Aran

Ufọn ndinim Aran eke Spirit edi se emende ewut ke mbuk mme asian ye ndisime nditọ-iban. Mme asian ema eduk ke idara usọrọ-ndọ, edi nso ikotibe ye mme ndisime? Ọkwọrọ-ikọ eyo eset kiet eketiñ ntem abaña mmọ ete, “ke akpanikọ ata ọkpọsọñ ekim unana-idorenyin ama abahare iban ition emi ekedude ke mfuhọ nte mmọ ekesuk edade ọtọ kiet ke enyin-usuñ ye mme utuen-ikañ emi mikasakke ke ubọk mmọ. Ñkanika ndọ ama akabare edi eke ini mkpa. Mmọ ikedighe mme asua ọdọ-ndọ, mmọ ekekere ete ke mme-imọ idi mme ufan esie. Mmọ eyak ini ebe ndien inyeneke se ekeyomde, ndien editre ndinam ubiọñ utom mmọ ama ebe se ekpeyọde.”

Nso ñkpọ ikesin akwa ukpuhọre ke ufọt otu iba emi? Kpukpru mmọ ekebet ebe-ndọ; mmọ kpukpru ema edaha ke enyọñ ke ini ekopde mfiori enyuñ enam ikañ mmọ ayama man ekesobo ye enye. Ini oro ke ition ke otu mmọ ekeyarade efiọk ete ke mmimọ ima isin ndida aran nte edikemde. Aran edi mbiet Spirit Abasi. Mmọ ema etre ndisuk ñka iso ke ndinyene ebuana ye Abasi emi edide se inamde Spirit aka iso oduñ ke ukpọñ.

Editre Ndinam Ubiọñ-Utom

Mme ndisime nditọ iban ema enyene ubiom-ikpe ke spirit ke nditre ndinam ubiọñ-utom mmọ, ke ntre ema ebiọñọ mmọ ndibuana ke usọrọ-ndọ. Ufọk Abasi emi okodude ke Ephesus ama ọduọk akpa ima ndien se enye okoyomde ekedi edikabare esit. Mme utom, edinam ye ime esie ikenyeneke udori adaña nte enye ama ọkọkpọñ akpa ima oro. Owo emi ọkọbọde talent kiet ama okut nte efiakde ebọ eye, enyuñ esio enye eduọk ke ata ọkpọsọñ ekim koro enye ekesinde ndida talent oro nnam ñkpọ. “Nnyin idinam didie ibọhọ edieke nnyin isinde erinyaña eke okponde ntem?” (Mme Hebrew 2:3).

Ñkukut

Ndusuk owo eyema ndinam se edọhọde mmọ enam, edi etre ndikut se mmọ ekpenamde emi akanarede mmọ okuk. “Nte mbufo idọhọke ite, eyesuk ọfiọñ inañ ndien osim ini ukpeñe? Sese, mmọdọhọ mbufo nte, Emenere enyin ese iñwañ ete ñkpọ adat ke esit ama, ekem ini ukpeñe” (John 4:35). Ñwan-ndọ Christ okut akwa iñwañ utom Abasi ke otu uduot owo; idiọk-ñkpọ ye idiọk itie, udọñọ ye unana, edidu ke ufọk-ñkpọkọbi ye ndobo, edi se inade ibet enye. Mme edinam esie edi edinam mbọm, ndien mme utom esie edi utom ima, ndien “ewuhọ ima onyuñ odoro enye ke edeme.”

Utip

“Nditọ esie edaha ke enyọñ ekọm enye, ebe esie ñko onyuñ otoro enye.” Nso utip idinyene ubọñ ntem, ke ini Edidem edidọhọde enye ete, “Edi, mbufo emi Ete Mi ọdiọñde, edida ubọñ emi ekenimde enọ mbufo toto ke eritọñọ ererimbot” (Matthew 25:34). Ke utọ ini oro, uwak idomo emi ekeyọhọde ke uwem esie, eyebe ekpọñ enye, ndien ibọrọ esie eyedi, “Ọbọñ, ini ewe ke ikokut Fi etiede biọñ, ndien inọ Fi udia; mme nte itọñ asatde Fi, ndien inọ Fi mmọñ? Enye eyebọrọ ete, “Adaña nte mbufo ekenamde ñkpọ emi enọ kiet ke otu nditọ-ete Mi, kpa ata ñkpri emi, mbufo ekenam enọ Mi” (Matthew 25:40).

Questions

MME MBUME

1. Mme anie edi iban-ndọ Christ?
2. Tiñ ndusuk nti ido ñwan-ndọ?
3. Edisana eyen-añwan ọwọrọ didie ke ñkan spirit?
4. Nso ikanam ukpuhọre odu ke otu mme asian ye mme ndisime nditọ iban?
5. Nso ke aran ada onọ ke Ikọ Abasi?
6. Nso akpan ukpep-ñkpọ ke ikeme ndisio nda ke ñke emi abañade ndisana nditọ iban?
7. Nso idi talent?
8. Ekedeme talent etiene nso?
9. Nso ke Ọbọñ okoyom ndikut nto nditọ-ufọk esie ke eridi esie?