Lesson 353 - Junior
Memory Verse
IKỌ IBUOT: “Edieke Abasi adade ye nnyin, anie edikeme ndibiọñọ nnyin?” (Ñwed Mbon Rome 8:31).Notes
Ubiom-ikpe Ke Idiọk-ñkpọ
Paul ama etiñ ke ofuri esit esie ete, “Ubiom-ikpe iduhe aba inọ mmọ emi edude ke Christ Jesus.” Jesus ama anam enye ọbọhọ ke uwem idiọk-ñkpọ, onyuñ akabare edi Ete-ufọk esie.
Ubiom-ikpe edi ñkpọ emi ọnọde owo idiọk-esit, anam okop but mme enyene ubiom-ikpe ke idiọk-ñkpọ emi enye akanamde mme ke idiọk ikọ emi eketiñde, ukem nte obubit enyọñ ke usen emi ofum ofumde ebe ke ikpa-enyọñ onyuñ ofuk utiñ, ntre ke obubit enyọñ ubiom-ikpe emen ukpọñ odip ọkpọñ iso Abasi ke ini owo anamde idiọk-ñkpọ. Iso Abasi inenke ye enye; ubọñ Abasi iyamake iduk ke esit ukpọñ oro. Edi ubiom-ikpe ofuk ukpọñ oro nte ọkpọsọñ ntuhube. Ñko iso owo esiwak ndiyarare ubiom-ikpe emi odude ke esit esie.
Edi ke ini owo oro oyomde Abasi onyuñ ọbọde erifen ke mme idiọk-ñkpọ, onyuñ ekpede mbio emi enye ekeduede ubọk ete efen enọ imọ, kpukpru ubiom-ikpe ewọrọ ke esit esie ndien enye ọbọhọ ubiom-ikpe. Ndien enye ekeme nditiñ ete ke ubiom-ikpe iduhe aba.
Ini kiet Paul ama enyene akamba ubiom-ikpe ke esit esie. Satan ekedi ete ufọk esie, ndien Paul ama akpañ utọn ọnọ ete ufọk oro, ñko. Ke ini andidiọk ọkọdọhọde Paul ete ọtuhọre ikọt Abasi, ọbọp mmọ onyuñ esin mmọ ke ufọk-ñkpọkọbi, enye ama anam ntre. Edi ukpuhọre ama odu ke uwem Paul ke usen oro enye okokutde Jesus ke usuñ Damascus. Uñwana emi okofukde enye akayama didie! ñko ekim emi okofukde enye ke ini enye akakade ke usuñ Damascus ọkọtuñọ didie! Ubiom-ikpe emi Paul okokopde okokpon didie ke ini enye ọfiọkde ete ke imọ ikofiomo Jesus Eyen Nazareth ukem nte ikọt Esie! Enye ama atua-mkpọfiọk ata eti-eti; enye ama ebeñe Jesus ete efen ọnọ imọ. Ke Paul ama ọkọbọ erinyaña ema esio kpukpru ubiom-ikpe ke esit esie efep. Ikpọk-eto ama ọwọrọ ke enyin esie, enye okut usuñ ndien Paul ọtọñọ ini kiet ndinam utom nnọ Jesus Christ, emi edide obufa Ete-ufọk esie.
Ete-Ufọk Iba
“Baba owo kiet ikemeke ndisaña utom mme ete iba.” (Matthew 6:24). Owo kiet kiet anam utom ọnọ Christ, midighe Satan. Edi mmem-mmem ndikpuhọ mme ete-ufọk, ndien oro edi se Paul akanamde.
Afo obup, “Nkeme didie ndinyene Christ nte Ete-Ufọk mi?” Okure ke ndibọñ akam ke ofuri esit nnọ Abasi, ebeñe Enye ete efen ke mme idiọk-ñkpọ fo, onyuñ etiñ ọnọ enye ete ke iyenam ñkpọ inọ Enye. Nnyin ikot ke Ikọ Esie ite, “owo eke etienede Mi ndibinke enye nduọk” (John 6:37). Ke ini iyip Jesus ofukde ukpọñ fo, efen kpukpru mme idiọk-ñkpọ fo ndien afo okop inemesit onyuñ ọbọhọ. Esio ubiom-ikpe ke esit efep ndien afo enyene odudu ndikan idiọk-ñkpọ. Eritọñọ obufa uwem! Obufa esit! Ndinam ñkpọ nnọ obufa Ete-ufọk! “Mmọdo sia ema ekeda mbuọtidem enam ikpe etebe nnyin, nnyin imenyene emem ye Abasi oto ke Ọbọñ nnyin Jesus Christ” (Ñwed Mbon Rome 5:1).
Afanikọñ Emi Odude Ke Idiọk-ñkpọ
Satan edi ọkpọsọñ ete-ufọk ọnọ owo ndinam ñkpọ nnọ. Enye ọñwọñọ ndinọ inemesit, nsọñidem, inyene, ye uwem; edi utu ke oro, enye ọnọ abiaña, udọñọ, ubuene ye mkpa. Kusin idem ke idiọk-ñkpọ; kunam mbubru ye idiọk-ñkpọ. Kukere ete imekeme ndidia inem ñkpri idiọk-ñkpọ ye “inemesit mmọ emi minamke owo idiọk,” koro ibighike-bighi afo eyesin idem ke mme ikpọ idiọk-ñkpọ ye inemesit emi asañade ye ediwak afanikọñ emi ekemede ndida ukpọñ fo nsin ke nsinsi ndutuhọ. Dianare kpọñ idiọk-ñkpọ mfin emi. Edieke afo muwotke idiọk-ñkpọ, idiọk-ñkpọ eyewot fi.
Ke ndusuk itie ke esuk Britain ye Scotland, ndusuk ini owo emi asañade ke utatan eyesọp ndikut ete ke utatan oyom ndikabare nyeyire ndien mme idak ikpa-ukot esọñọ ewuhọ. Okposuk edi oro esuk ekeme nditie nte asat, edi nde ikpat owo ọyọhọ ye mmọñ. Owo ekeme ndisaña ke midiọñọke afanikọñ emi odude ke esit. Utatan eyesọsọp ofuk enye ukot. Enye afiak edem, edi ke kpukpru ikpat esie enye oduk ke utatan ntọtuñọ-ntọtuñọ akan. Ke okopde ndik enye okut ete ke imọ imọsuhọre iduk ke mmemmem ntan. Enye otop mbiomo esie onim, edi ke ata idiọk ini. Osuk esisit ntan ndisim ke edọñ esie, ndien ọdọk osim isin, osim esit, osim itọñ. Enye atua eseme, edi ibighike inua esie ọyọhọ ye ntan, ndien enye ikemeke ndisioro uyo aba, ndien ofuk enyin esie, ndien enye odu ke ekim idiọk mkpa. Ebiet didie afanikọñ idiọk-ñkpọ! Ndusuk ikemeke ndisọp nte mmem-mem ntan, edi ọsọñ odudu ntre. Ke akpa ifet nte “inem udia,” ndien ke esisit edifiak nsin idem, ibighike enye ọsọp ndikut idem esie nte ọduọde oduk ke ñkpọ-ndik emi adade oduk ke nsobo. Ubọk kiet odu emi ekemede ndiñwam ke utọ nnanenyin oro; kiet kpọt odu emi ekemede ndinyaña owo nsio ke mkpa. “Seme nọ mi ke usen ukut: nyebabare fi mbaba” (Psalm 50:15).
Enọ Utip Ufen
Ekedi akwa unyaña ọnọ Paul ndinyene obufa Ete-ufọk emi, Jesus Christ, ih obufa Ete, kpa Abasi ke Idemesie. Emi akanam Paul edi adia-akpa obio-ubọñ, okposuk edi nte inyene esie ke isọñ ekedide esisit. Paul ama ọfiọk ete edieke ibọde ufen ye Jesus mi, usen kiet iyeda ubọñ ye Enye. Enye ama ọfiọk ete, “Anyanya eti ido” (2 Timothy 4:8). Ke ana ebet imọ.
Edieke nnyin ibọde esisit ufen ke ntak Christ, oro edi nso? Paul ama ọdọhọ ete, oro idighe se edade edomo ye ubọñ emi edidide. Ke ini afo okutde ete ke uwem anditiene-Christ ọwọrọ owo ndisin ediwak inemesit ererimbot emi, kere kpa se Paul eketiñde: “Koro erikere ñkpọ obukidem ọwọrọ mkpa” (Ñwed Mbon Rome 8:6). Ke ini afo ekerede ete ndusuk mbio ererimbot ke enyene ediwak inemesit ke uwem ekan fi emi edide anditiene-Christ, kere baña Paul emi ọkọdọhọde ete: “Edieke mbufo edude uwem nte obukidem etemede, mbufo enyene ndikpa” kere baña utit. Kere baña usen emi ñkoñ-koñ ye usuk-usuk, enyene ñkpọ ye ubuene, kpukpru edidade ke iso edinen ebierikpe. Ndien nso edidi udori ọnọ mmọ emi edude uwem enọ suk se idude ke emi?”
“Edi,” afo ọdọhọ ete “Ke mma mbiere ndisuk idem nsin ọsọñ esisit nnyuñ mbọñ akam ñkan, ami ñkut idomo ñkan nte ke ini ñkasañade nnana ekikere” oro ekeme ndidi akpanikọ edi afo ñko emenyene ediwak mfọn emi ekemede ndisaña mbe ke mme idomo. Paul ama ekpep ọfiọk ete idomo mme udomo ekpedi se ededi, “Kpukpru ñkpọ esaña ọtọ kiet enam ufọn enọ mmọ emi emade Abasi” (Ñwed Mbon Rome 8:28). Ke ntre edieke satan añwanade ndidomo fi ke ndinim ubiọñọ ke usuñ fo, dọhọ ete: “Mfiọkke ntak emi oruk ñkpọ emi, otibede ọnọ mi, edi mọfiọk nte mmama Ọbọñ ke ofuri esit mi, ndien Enye ama mi, ndien Enye ikpeyakke oruk ñkpọ emi otibe ke midighe ke ntak ufọn mi.”
Ima Christ
Paul etre ukpep-ñkpọ emi ke ndibup mbume nnyuñ nnọ ibọrọ. “Anie edidianare nnyin ke ima Christ?” Afanikọñ, unana udia, mme edisine ñkpọ, ñkpọ-ndik, ekọñ, mkpa, uwem, mme angel, mme odudu, anyan ebiet, mme owo, baba kiet ke otu emi ikemeke ndidianare nnyin ke ima Christ, akanam ima Esie ikpuhọ.
Nte oro ọwọrọ ete owo ama ọbọ erinyaña ini kiet enye ikemeke ndifiak edem aba nnyuñ ntak? Baba, iwọrọke ntre. Edi akpanikọ ete ke ima Christ akanam ikpuhọkede, oro edi ke owo ekperede Enye eti-eti ke ndikpeme nnyuñ ñkot Ikọ Abasi kpukpru ini nnyuñ mbọñ akam eti-eti midighe ntre ima emi owo amade Enye ekeme ndibit. Edieke edide ntre odu ke idiọk itie, koro nte enye asañade aka oyom usuñ ọkpọñ Abasi, enye ke asaña ekpere ererimbot, ndien idighe aba eyen Ete. Ini kiet efen ubiom-ikpe ọyọhọ uwem esie. Nte afo ọmọbọhọ ubiom-ikpe?
Questions
MME MBUME- Ikọ-ntiense anie ke ewet ke Ñwed Mbon Rome 8?
- Ọwọrọ nso ndisaña ke obukidem? Me ndisaña ke Spirit?
- Nnyin isaña didie ifiọk ite ke nnyin idi nditọ Abasi?
- Ndidianare mkpọñ ima Abasi ọwọrọ didie?
5 “Edieke Abasi adade ye nnyin, anie edikeme ndibiọñọ nnyiñ?”
- Kpukpru ñkpọ esaña ọtọ kiet enam ufọn enọ mme anie?
- Eda didie ukut emi mme anditiene-Christ ekutde ke emi edomo ke ini iso?
- Edikere ñkpọ obukidem me ñkpọ Spirit ọwọrọ didie?