Lesson 354 - Junior
Memory Verse
IKỌ IBUOT: “Okposuk edi nte Enye ekedide enyene-ñkpọ, ke ntak mbufo Enye akabare edi ubuene” (2 Ñwed Corinth 8:9).Notes
Paul, Owo-Ñkpọkọbi
Koro Paul ama esin ifik ndikwọrọ mbaña Jesus, ema esin enye ke ufọk-ñkpọkọbi ke Rome, ke Italy. Enye ikedighe aba akparawa, ndien ama ọdọñ enye ndidu ye ikọt Abasi ke mme ufọk-Abasi emi enye ọkọtọñọde. Adaña didie ke enye akpama ndibọhọ ini kiet efen.
Nte ededi, enye ikekopke mmemidem. Koro enye ama onim ke akpanikọ ete ke eyeto ke akam nditọ Abasi esọp ndisio enye. Nte enye osuk odude do, enye ama ewet mme ñwed nsọñ-idem ọnọ esọk ikọt Abasi, ndien mme ñwed oro Abasi ọkọnọde edi mbak Edisana Ikọ Abasi, oro edi Ñwed Abasi.
Mme ukwak ufọk-ñkpọkọbi, mme ebuka, ye mbon ukpeme ikemeke ndibiọñọ Spirit ata eyen Abasi. “Mme ete nnyin, emi ekesinde ke ebuka ke ñkim-ñkim ufọk-ñkpọkọbi, ekesuk enyene esit ye ekikere emi mikenyeneke ubiom-ikpe.” Owo Abasi kiet emi ekesinde ke ufọk-ñkpọkọbi ama ọdọhọ ete ke mme ebuka esie, ekeda gold efuk. Owo-ñkpọkọbi efen ke ntak Ọbọñ ama ọdọhọ ete ke mme itiat ufọk-ñkpọkọbi eketie nte rubies.
Owo Emi Akabarede Esit
Nte Paul etiede, ye eto-ñwed ke ubọk, akwa esit ima esie ọwọrọ okotuk mbio efen. Nnyin idiọñọke mme owo ifañ ekebọ erinyaña oto ke ukwọrọ-ikọ Paul, edi kiet ke otu mmọ emi Paul akadade ọsọk Jesus ekedi akparawa emi ekekerede Onesimus. Akparawa emi, asaña-utom Philemon ke Colossae, ama anana inemesit, onyuñ efehe ọkpọñ ete-ufọk esie aka Rome. Nte ofin emi ekefehede-fehe, ekeme ndidi ke ekenyi-nyik Onesimus esin ke otu mbon-ekọñ Rome enyuñ enọ enye ndikpeme Paul. Ke usuñ ekededi, enye ama okop nte Paul etiñde abaña Jesus, ama onyuñ akabare edi owo Abasi.
Ñko mfin emi mme ekpeme ufọk-ñkpọkọbi ye mbon-ñkpọkọbi ekop ebaña Jesus ke ini mme anam utom ke iñwañ-utom Abasi ekade ke mme ufọk-ñkpọkọbi nditiñ nnọ mbio efen se Abasi anamde ọnọ mmọ, enyuñ enọ ñwed ikọ Abasi. Ata ediwak ema ekop ubiom-ikpe ke esit ke abaña idiọk-ñkpọ enyuñ ebọ ata edinyaña oto ke ntak utom emi.
Ke emi Onesimus ama ọkọbọ erinyaña, enye ekeme ndidi owo uñwam ọnọ Paul. Idaresit odu didie ke mme ini oro ebonode ọtọ kiet ke mboho nditọ Abasi! Se nte mmọ ekesibọñde akam enyuñ ekwọ mme itoro enọ Abasi!
Afiak Etiene Ete-Ufọk Esie
Edi Paul ikanaha nte obuk-ibuk onyuñ omum Onesimus onim ye enye do ke anyan ini. Akana nte ọnọ enye afiak etiene ete-ufọk esie, Philemon. Edi nte enye eyedara Onesimus? Nte enye eyefiak ada enye esin ke itie esie nte eyen-ufọk? mme nte enye eyenyene idiọk-esit abaña enye sia ekefehede-fehe? Onesimus ikebiatke enyiñ esie ikpọñ, emi ọwọrọde “Udori,” edi ama anam se idiọkde ye ete-ufọk esie ñko. Akana nte Paul ewet ñwed ọnọ Onesimus esọk Philemon man kpukpru ñkpọ efọn.
Ñwed-Etop Paul
Ñwed emi Paul ewetde esọk Philemon, mme Ñwed Philemon, edi ñwed emi Paul ewetde ndibeñe Philemon nditọñọ ntak nda Onesimus nsin ke itie utom esie. Paul ama ọfiọk ete ke akwa esit ima Philemon eyedahado ọnọ eyen-ufọk oro emi ini kiet mikanamke akpanikọ. Ke ntat ubọk, enye eyedara Onesimus, idighe nte eyen-ufọk ikpọñ-ikpọñ man aka iso ke mme utom esie, edi nte eyen-ete ke Christ ye andiñwam ye anam-utom akpanikọ nnọ Ọbọñ ñko.
Edineñere Ukwañ-Usuñ
Onesimus ama onyime ndineñere kpukpru ndudue emi enye akanamde ye ete-ufọk esie. Kpukpru anam idiọk emi akabarede esit ke idiọk-ñkpọ esie onyuñ ọbọde erifen enyene udọñ ndineñere mme ndudue edem. Okposuk mididighe mmem-mmem ñkpọ ndinam kpukpru ini, edi enye aka ebine mmọ oro enye ekeduede onyuñ ebeñe edidahado; enye eyekpe okuk emi enye okoyipde mme ọkọbọde ke ñkari usuñ; enye eyeyarare mme nsu emi enye okosude, onyuñ eneñere kpukpru ñkpọ emi odude ke ukeme esie ndinam. “Idiọk owo ama ayak ñkpọ ubiọñ, ayak se enye adade ke ñwo, asaña ke mme ewuhọ uwem, minyuñ inamke mme ukwañ-ñkpọ; enye iditreke ndidu uwem, idikpaha kpa” (Ezekiel 33:15).
Onesimus ikanaha nte eneñere ukwañ-usuñ esie ke minyeneke uñwam, ndien afo mme ami idikemeke ndineñere ukwañ-usuñ ke nnyin minyeneke uñwam. Paul ekekpe ubọk ọnọ Onesimus, ndien Christ eyeda nte anditiñ ikọ mfin ke ibuot kpukpru mmọ emi enyenede ukwañ-usuñ ndineñere (Isaiah 9:6). Edieke nnyin ibeñede Enye ndida nnyin usuñ nnyuñ mkpeme nnyin, Enye eyeñwam nnyin ndifiọk eti usuñ emi ikemede ndineñere ukwañ-usuñ nnyin, ndien enye eyeñwam enye emi nnyin ikeduede ndifiọk nnyuñ ndahado.
Utip Mfọn-Ido
Ndusuk ini enam erinam mfọn-ido mme utom ima enọ owo kiet ke ntak owo efen. Nnyin imokot ke Ñwed Abasi ibaña ekpri eyen-eren emi akakabarede edi mbuñọ ke ini ekedide eyen isua ition. Ete eyen-eren emi, Jonathan, ekedi ata akpan ufan David. Ke akpanikọ, Jonathan ye David ema ema kiet eken ata eti-eti. Ke ini David ekedide edidem, enye ama ọdọñ ekeda akparawa mbuñọ emi edi onyuñ ọdọhọ enye okufehe ndik. Enye ama ọdọhọ ke iyefọn ido ye enye ke ntak Jonathan ete esie, iyenyuñ inọ enye mme ikpọ inyene, ndien ke kpukpru ini uwem esie enye eyedia ñkpọ ke okpokoro edidem. David ikefreke mfọn-ido Jonathan ye enye, ndien idaha emi enye enyene ifet ndifọn ido ye Mephibosheth, mbuñọ. (Kot 2 Samuel 4:4; 9:5-7).
Ke Ntak Owo Efen
Paul ama adian ikpehe ñwed efen ke ñwed esie ebeñe ufan esie ndidara Onesimus ke ofuri esit nte emi Philemon akpadarade Paul. Nte Onesimus ama akama ete-ufọk esie isọñ ke ñkpọ ekededi? Nte enye ama anam Philemon idiọk? Edieke edide ntre, “Bat oro nọ mi,” Paul ọdọhọ, “Nyesio nnọ fi.”
Ke ini eyenọwọñ edide etiene Abasi, ọwọñọrede ọkpọñ idiọk-ñkpọ onyuñ oyomde edidahado nnọ ke idiọk-ñkpọ esie, Jesus ebe oduk onyuñ ọdọhọ ete, “Ete, da enye nte idem mi. Ami ñkọduọk Iyip mi nnyuñ mkpa man efen enọ enye.” Anam idiọk-ñkpọ edue Abasi, edi ke ini enye akabarede esit, Abasi efen enye ke ntak Jesus.
Edifiak Nnyọñ Ufọk
Anyan isañ unyọñ emi ekefekde Onesimus ndifiak ñka Colossae ama edisim utit ke ini enye ọnyọñde etiene Philemon. Didie ke enye ekebiet idiọk-udọ emi ọkọnyọñde ye ukot emi ọyọhọde ye unan onyuñ ọkpọtde, ọfọñ esie ekedi ntaha, okuk esie ama okure edi eti Ete emi ekesede ke ata anyan usuñ ama adahado ọnọ enye ke kpukpru.
Ke ubọk esie Onesimus ama akama ñwed emi Paul ekewetde, ebeñe mbọm ye erifen. Nnyin emi ema ekenyaña mfin imekeme ndiwọñọre enyin ke edem nse usen oro ikefiakde itiene Abasi, ndien ke ubọk nnyin ikama ñwed-erifen, emi edade nsọñ-urua Iyip Jesus ewet esọñọ. “Enye onyuñ obiom mme idiọk ido ediwak owo, eyenyuñ anam mkpe-ubọk ọnọ mme anam-idiọk” (Isaiah 53:12).
Emefen
Onesimus ekenem esit didie idahemi! Enye ọkọkọm Paul didie emi ekekpede Philemon, ete-ufọk esie ubọk! Nso utọ isọn ima ye inemesit ke enye akakama Paul ye Philemon! Edi se enye akamade Jesus okpon didie ke ntak edisana esit, anana-ndudue ñwed, ye ñtọñọ obufa uwem! Okpon didie se nnyin ikamade Abasi ye Christ emi ekekpede isọn nnyin, obiom idiọk-ñkpọ nnyin onyuñ ada nnyin esin ke ubon Abasi! “Mmọdo ndien mbufo idighe aba isen ye oduduñ, edi edi mbio-obio kiet ye ikọt Abasi, enyuñ edi mbon ufọk Abasi” (Ñwed Mbon Ephesus 2:19).
“Jesus ekekpe,
Kpukpru ọnọ mi;
Idiọk-ñkpọ mi akawak,
Anam nsana nte snow.”
Questions
MME MBUME- Mmọñ ke Paul okodu ke ini ewetde ñwed emi?
- Anie ke ekenọ ñwed esọk, okonyuñ ebe ke ubọk anie?
- Nso utọ idaha ke Onesimus akada ke ufọk Philemon?
- Nso ekpedi obufa itie-utom esie?
- Nso ke Ñwed Abasi ekpep abaña edineñere ukwañ-usuñ
- Nso ke Paul eketiñ ke ñwed oro emi anamde nnyin idiọñọ ke enye ama enyene idorenyin ete ke eyesio imọ ke ufọk-ñkpọkọbi?
- Nso ke Paul eketiñ ke abaña mme isọn Onesimus?
- Anie ke Onesimus akakama isọn akwa ekọm?
- Anie ke nnyin ikama isọn ima ye utom erinyime esit?
- Didie ke nnyin ikeme ndiwut ima eke inyenede inọ Jesus?