Lesson 355 - Junior
Memory Verse
IKỌ IBUOT: “Ntem ke mbuọtidem, ye idori-enyin, ye ima esuk edu, mmọ mbita; edi andikpon-ñkan ke otu mmọ edi ima” (1 Ñwed Corinth 13:13).Notes
Ima
“Abasi edi ima; ndien owo emi oduñde ke ima ododuñ ke Abasi, Abasi onyuñ ododuñ enye ke idem.” Mbon Abasi enyene ima Abasi ke esit mmọ koro Abasi odude ye mmọ. Ke ini mme owo ebọde erinyaña ukpọñ, efen mme idiọk-ñkpọ mmọ ndien Abasi esin ima Esie ke esit mmọ. Ke ini enamde mmọ esana, esit mmọ asana ndien mmọ enyene ima Abasi emi okponde akan. Mmọ emi enyenede erinyaña ukpọñ ikpọñ enyene ata ima owo Abasi, koro Abasi onimde emi ọnọ udeme Esie.
Ima emi Abasi esinde ke esit ikọt Esie ekot enye, ima owo Abasi ye ima nditọ-ete. Etọñọ ntak ekot enye ete “Mfọn-ido”; edi oro ọtuñọ akan ndinọ ubuene ñkpọ. Mfọn-ido emi, mme ima, edi udọñ ndiyom uforo, idọñesit, ye inemesit mbon efen. Ekeme ndikut emi ke mme edinam nnyin ye ekikere nnyin ke abaña mbon efen.
Ufọn Emi Odude Ke Ima
Ndima mbon Abasi edi idiọñọ kiet emi ayarade owut ete nnyin idi eke Esie. Jesus ọkọdọhọ ete: “Mbufo ema ema kiet eken, kpukpru owo eyeda oro efiọk ete mbufo edi mbet Mi” (John 13:35). Ke se Peter ewetde nnyin ikot, “Akan kpukpru ñkpọ, enyene ufiop-ufiop ima ke otu idem mbufo” (1 Peter 4:8). Akan kpukpru ñkpọ! Ebem iso etiñ ebaña ima nte nti edu emi edọñọde ke “Mfri Spirit” (Ñwed Mbon Galatia 5:22). Ekot ima “andikpon-ñkan ñkpọ ke ererimbot.”
Eto Udomo-ñkpọ
Paul ama ewet ọnọ mbon Corinth abaña ima owo Abasi, emi enye okotde” mfọn-ido.” Itie ñwed emi ke Ñwed Abasi edi ibuot ñwed ima. Enye edi eto udomo-ñkpọ emi ikemede ndida ndomo uwem owo Abasi nnyin. Nte nnyin ikpepde ukpep-ñkpọ emi, Yak ida uwem nnyin idomo ke eto udomo-ñkpọ man Abasi owut nnyin nte ikpenamde ọfọn inyuñ idi nti nditọ Abasi inọ Ọbọñ. Kpukpru nditọ Abasi enyene nti edu emi koro ima Abasi odude ke esit mmọ, me mmọ eduñ ke mmọñ, me mmọ edi mme anie, me edi mkparawa me ñkani owo, idighe ubiọñọ inọ mmọ.
Ima Iduhe
Paul owut ukpuhọre ke ufọt ima ye mme ñkpọ efen emi ekemede ndidi nti. Ediwak owo enyene udọñ nditiñ usem mbon efen; edi kpukpru owo ekeme ndifiọk usem ima, emi ewutde ke inua imam, ye mbọm, ye ke mme edinam mfọn-ido eken.
Ediwak owo eyema nditiñ ikọ ke edu eke owutde ete mmọ ekeme ndidọn ikọ. Moses ama okut unana ukeme esie ndidọn ikọ. Ke ini Abasi okokotde enye ndida Nditọ Israel usuñ ñwọrọ ke Egypt, Moses ama ọdọhọ ete, “Ami ndighe owo udọn-ikọ, … koro ami ndobide inua, nnyuñ ndobide edeme” (Exodus 4:10). Edi Abasi ama ọdọhọ ete ke Imọ iyekpep Moses se edidọhọde. Nditiñ ikọ ke edu eke eyede edi se emade, edi oro idighe ata akpan ñkpọ. Paul ada udọn-ikọ eke minyeneke ima odomo ye ukpọk “nyomo nte akpañkpañ, ye uyo nte ekpri ñkanika” (2 Ñwed Corinth 13:1).
Paul ọdọhọ ete ke imọ ididighe ñkpọ baba kiet edieke miyeneke ima, edieke imọ ikpekemede nditiñ ntiñ-nnim ikọ nnyuñ ntiñ mbaña mme ñkpọ ini iso; edieke ikpefiọkde mme ntọtuñọ ndibe ñkpọ Abasi; edieke inyenede ifiọk ye ukpep-ñkpọ emi otode mme ñwed ye mme andikpep; edieke ikpenyenede mbuọtidem ndiwubere obot. Se ikponde ikan kpukpru emi edi ima Abasi emi ke esit ikọt Esie.
Ediwak owo enyene ido ndinọ owo ñkpọ. Mmọ enọ mme ubuene ye mmọ eke enanade. Mmọ eken enam akpanikọ enyuñ ewa idem tutu enọ uwem mmọ. Edi ke ima Abasi miduhe, mme ñkpọ emi idoroke udori baba kiet eke ebighide. Mme enọ emi Paul eketiñde abaña mi edi se ifọnde eti-eti, edi mmọ ikemke. Owo enyene ndinyene ima Abasi.
Ime Ye Mfọn-ido
“Ima enyenyene anyan ime.” Ima Abasi eyenọ owo ime. Job ama enyene ime koro enye ekedide owo Abasi. Ke ini nditọ Job ye inyene esie mikeduhe aba enye ama ọdọhọ ete: “Jehovah ọkọnọ, Jehovah onyuñ ọbọ; ekọm enyiñ Jehovah” (Job 1:21). Nte Job akade iso ndibọ ufen, enye ama ayak idem esie esin ke uduak Abasi. Enye ọdọhọ ete: “Koro enye ọfiọkde usuñ eke odude ye ami: enye odomo mi: nyewọrọ mbiet gold. Ukot mi omum ikpat esie, mmekpeme usuñ esie, nnyuñ ñwahake” (Job 23:10, 11). Nte afo emenyene ime ke ini etiede nte ñkpọ itimke ifọn? Ndusuk afo enyene ndinyene ima Abasi ke esit fo man ọnọ fi ime, midighe, afo enyene ndikọri ke ime ye ke ima Abasi.
“Ima … ọfọn-ido.” Ke se Paul ewetde ọnọ mbon Ephesus nnyin ikot, “Efọn ido ye kiet eken” (Ñwed Mbon Ephesus 4:32). Joseph edi eti uwut-ñkpọ owo emi okowutde mfọn-ido kpa ye mmọ oro ekenamde enye idiọk. Nditọ-ete Joseph ema esua enye, enyuñ enyam enye enọ mme anyam-urua emi ekedade enye eka ke Egypt; edi ke ini akañ, Joseph onim nditọ-eka esie uwem ke ndinọ mmọ udia. Enye ama ọdọhọ mmọ ete, “Mmọdo mbufo ekufeghe ndik: ami nyebọk mbufo ye nsek-nditọ mbufo. Enye onyuñ ọdọñ mmọ esit, onyuñ ọdọhọ mfọn-mfọn ye mmọ” (Genesis 50:21). Afo owut mme anie mfọn ido? Ndi ye mmọ oro efọnde ido ye afo ikpọñ?
Ndisuhọre Idem
Ima Abasi ñko onyuñ anam owo enem esit ke se enye enyenede akan ndifube ufup. Edọhọ nnyin ete “enem esit” ke mme ñkpọ eke inyenede (Mme Hebrew 13:5). Nnyin ikot, “uteñe Abasi edi akwa udori, ke ini asañade ye esit eke okutde ete se inyenede ekem” (1 Ñwed Timothy 6:6). Mmọ eke esinde esit ke ñkpọ owo eyat esit ebaña nti ñkpọ eke mbio efen enyenede. Owo itiñke baba eti ñkpọ kiet ibaña ufup. Mme mbuk mmọdo ke Ñwed Abasi emi etiñde ñkpọ abaña mme mmọ oro ekenyenede ufup, ndien kpukpru mbuk oro edi ñkpọ mfuhọ. Cain ama owot eyen-eka esie ke ntak ufup. Mme owo emi ekenamde esin Daniel ke obube mme ekpe ekenam oro ke ntak ufup. Mme andidori Christ ikọ ekeyak Enye enọ ekọñ ke eto, ke ntak ufup.
Ima anam owo ọsuhọre idem, akan ndimenere idem. Ke Ikọ Abasi, ekpep nnyin ndisuhọre idem. Kot baña ndisuhọre idem ke Mme Ñke 22:4; James 4:10; 1Peter 5:5, 6. Kiet ke otu mme ñkpọ emi Abasi oyomde oto nnyin edi “ndisuk idem nsaña” ye Enye (Micah 6:8).
Iyomke Ufọn Esiemọ Ikpọñ
“Ima … inamke ido eke midotke.” Nte edi eti ido nditiñ ikọ mme ndibọp iso ke ini etrede ndinọ nnyin se ikebeñede ? Edieke ñkpọ misañake nte mmọ eyomde, ndusuk nditọwọñ esinyene idiọk edu uwem enyuñ enam mmọ efen edu ke mfina tutu mmọ ebọ se mmọ ekeyomde. Edi utọ nditọ oro inyeneke ima Abasi ke esit mmọ.
“Iyomke ufọn esiemọ.” Ima anana ibuk ke usuñ eke enye miyomke idem ñkpọ eke edide esiemọ. Se ukpuhọre mi ye spirit eke ererimbot, emi anamde mme owo edomo ndinyene kpukpru se mmọ ekemede, me edi unen mmọ ndinyene, me onyuñ edi unen mmọ efen! Ata inemesit iduhe ke ndibọbọ, edi odu ke ndinọnọ. “Eti ikọ Ọbọñ Jesus, emi Enye ọdọhọde ete, ọfọn ndinọ akan ndibọ” (Utom Mme Apostle 20:35).
Obufa Esit
“Ima … isọpke iyaresit.” Ediwak edomo ke ikpikpu ndimum esit mmọ ñkama! Ke ini esit ayatde mmọ, mmọ etiñ enyuñ enam ñkpọ eke mmọ efuhọde ebaña ke ini akade iso. Ndisọp iyaresit ada owo okosim ifiop-esit, ufup ye edisio usiene. Ke ini owo ayatde esit, sededi emi enye etiñde me anamde idighe eti. Ñkpọ iduhe ndinam man emum iyaresit enim, edi ekeme ndinam ebiet emi mfina ọtọñọde, emi edide esit ọfọn. Ima Abasi ọnọ eti uduot oro, emi misisọpke iyaresit.
“Ima … ikamake udu.” Owo Abasi iduake idiọk, inyuñ ikereke udu. Enye inyeneke eyighe ibaña mmọ efen, ke ndiyom ndudue ke uwem mmọ. Ñwed Mbon Philippi 4:8 ọnọ mme nti ñkpọ emi ekpekerede ebaña: ñkpọ eke edide akpanikọ, enyenede ukpono, enende, edide edisana, eke odotde ete enam, ọwọrọde eti etop: “edieke itoro onyuñ odude, ekere ñkpo oro.”
Ebighi Ke Nsinsi
“Ima idibehe ifep ke nsinsi.” Enye edi se idude ke nsinsi. Mme ñkpọ efen eyekpu, ebe efep, enyuñ enọ mme mbufa ñkpọ ifet. Mbuọtidem, idorenyin, ye ima edu ke emi, edi ke Heaven idiyomke mbuọtidem ye idorenyin, Ima ikpọñ edidu. Ke abaña ñkpọ mbita emi Paul ọdọhọ ete, “Andikpon ñkan ke otu mmọ edi ima.” Mbuọtidem ye idorenyin edi ata akpan ñkpọ ye se eyomde ke uwem owo Abasi. Ke mbuọtidem miduhe, owo ikemeke ndinem Abasi esit (Mme Hebrew 11:6). Mbuọtidem edi erikan eke akande ererimbot (1 John 5:4). Edọhọ nnyin ete, “esọñọ eñwana kabaña ikọ mbuọtidem, emi ema ekeyak ini kiet ko esin nti ikọt Abasi ke ubọk” (Ñwed Jude 3). Idorenyin edi ubak ñkpọ ekọñ owo Abasi, oro edi – “iyara idori-enyin erinyaña nte ndun ibuot” (1 Ñwed Thessalonica 5:8). Idorenyin edi “ukwak ubom ukpọñ nnyin, eke midikpuhu nnyin, edi ọsọñọde omum isọñ” (Mme Hebrew 6:19). Mbuọtidem edi edu edinam nnyin ye Abasi. Idorenyin edi eke nnyin. Edi andikpon ñkan mmọ emi, edi ima. Ima edi ima Abasi emi anamde nnyin ima mbọhiduñ nnyin.
Nte afo ekpepde ukpep-ñkpọ emi onyuñ odomode uwem owo Abasi fo ye eto udomo-ñkpọ, nte afo emekere ndinam ọfọn akan nte akanamde? Ti ete ke owo Abasi enyene ndisuk ñka-ka iso ñkọri, ke ndinam mme mfọn Abasi esie ọdọdiọñ awak akan. Peter ete ke nnyin inyene ndisin ifik nnyuñ ndian mme nti edu uwem emi: Mbuọtidem, eti ido, ifiọk, edifara ke idem, ime, uteñe Abasi, iman, ye ima. Ke ndikọri ke ido owo Abasi nnyin iyekeme ndiñwum mfri spirit inyuñ inam “ikot eke ekekotde mbufo ye erimek eke emekde mbufo ọsọñọ ada,” inyuñ idu ye Jesus ke nsinsi obio-ubọñ Esie. Edi edieke nnyin inanade mme ñkpọ emi, nsinsi uwem eyekpu nnyin. (Kot 2 Peter 1:5-11).
Questions
MME MBUME- Nso idi enyiñ efen eke ekotde ima?
- Owo asaña didie enyene ima?
- Didie ke ima Abasi edi akpan-ñkpọ?
- Didie ke ekeme ndifiọk owo eke enyenede ima Abasi?
- Kot ke 1 John 4:19 ntak emi nnyin imade Abasi.
- Didie ke mme owo ekeme ndifiọk ete ke nnyin idi mme anditiene Jesus?
- Jesus ekekpep nnyin ete ikuma mbọhiduñ nnyin ikpọñ, edi yak ima mme anie ñko?
- Nso itibe edieke owo Abasi mikọrike?
- Etiñ enọ nnyin ete ke ima okpon akan nso ñkpọ iba efen emi edude, ke akpatre ufañ ñwed ke ukpep-ñkpọ nnyin?