Lesson 357 - Junior
Memory Verse
IKỌ IBUOT: “Esua se idiọkde; eyire se ifọnde” (Ñwed Mbon Rome 12:9).Notes
Edisana
Jesus ọkọbọñ akam abaña mbet ye kpukpru mmọ eke editienede Enye. Enye ebeñe nte mmọ ekpedide kiet, ediana kiet ye eken ye Abasi nde. Enye ebeñe ete enam mmọ esana. Edinam asana ọwọrọ ndikabare ndi edisana, ediyet nsio ke idiọk-ñkpọ. Eda edinam asana edomo ye eriwuberede oduñ eto. Erinyaña etie ukem ukem nte emi esibede eto eduọk edi etak eto oro ekeme nditibe onyuñ ọtọñọ ntak ọkọri. Ke edinam asana ke ewuberede mme oduñ efep.
Jesus ama ọbọñ akam nte mbet Esie ekpenamde akpanikọ, mmọ ñko ekpenyuñ esọñọ eda ye Abasi ke ererimbot emi idomo ye ukut edude. (Kot ke John 17:15-21).
Edinam-asana anam owo Abasi otim ọsọñọ ke erikan idiọk-ñkpọ. Edi “uduak Abasi, ete mbufo ekpekabare esana” (1 Ñwed Thessalonica 4:3). Ikọt Christ eyom ndidu uwem nte ekemde ye uduak Abasi, ntre ke mmọ eyak uwem mmọ enọ Abasi enyuñ ebọñ akam tutu Abasi eyet mmọ esana. Mme ñkpọ efen edu emi owo Abasi ekemede ndinam man oto do enye anam akpanikọ ọnọ Abasi, ke ndinam uduak Esie, ye ke ndinam utom nnọ Enye. Owo Abasi ananam utom ke ukpono Abasi esie, ododomo kpukpru ini ndikabare mbiet Ete ufọk esie.
Uwut-Ñkpọ
Ke ini Paul ewetde ọnọ esọk ufọk Abasi ke Rome, enye etiñ abaña mme ñkpọ emi ekpeñwamde mmọ ndidi nti mme anditiene-Christ. Mme ñkpọ emi edi se ekemede ndikot mme utom mme anditiene-Christ. Mmọ edi uwut-ñkpọ ke edu uwem anditiene-Christ. Ke ini owo enyenede ima Abasi ke esit esie enye eyekut nte ke ndidu uwem emi asanade edi eti ifet. Enye oyom ndidu uwem nnyuñ nem Abasi esit, ndien ke erinam ntem, enye ọfiọk ete ke imọ imodu ke mbeñidem inọ Heaven.
Ndusuk nditọ-ñwọñ ekop ete ndibuana ke ndusuk mbre, mme ndika ndusuk ebiet, mme ndibre mbre ye ndusuk nditọ-ọwọñ eken, esiwak ndinam mmọ eduk ke mfina. Nte ikpefọnde ndidianade ñkpọñ mme ñkpọ oro ye mme mmọ oro eke edade mfina edi? Ntem ke edi ye owo Abasi: ke ndiwọñọre ñkpọñ idiọk-ñkpọ, ye ndibọñ akam nnyuñ ndu uwem nnọ Abasi, eñwam enye ndibọhọ mfina.
Odu-uwem Uwa
Paul ekpe ye Ikọt Abasi ndiyak uwem mmọ nnọ Abasi, ndinyuñ nda ikpọhidem mmọ nte “odu-uwem uwa” nnọ Abasi. Ke eset mme owo ekekpono Abasi oto ediwot mme unam nda nam uwa, edi mfin emi Abasi oyom nnyin ikpono inyuñ itoro Enye ke edidu uwem nnọ Enye. Isaiah, anditiñ ntiñ-nnim ikọ ọkọdọhọ ete: “Koro obio ekpo midikọmke fi, mkpa midinyuñ itoroke fi: … odu-uwem, idem odu-uwem eyekọm fi, kpa nte ami nnamde mfin” (Isaiah 38:18, 19).
Uwa edi ñkpọ oro eke enọde, esana eyak ofuri-ofuri, enyuñ eyak kpukpru enọ Abasi. Owo ndida ikpọhidem ye uwem esie nte “odu-uwem uwa” nnọ Abasi edi ndiyak uwem esie ofuri-ofuri nnọ Abasi ye uduak Esie. Abasi iyomke odu-uwem uwa ikpọñ-ikpọñ edi oyom enye emi asanade, emi ama ọkọbọhọ ke idiọk-ñkpọ.
Odudu
Didie ke afo ekeme ndidu mbọhọ idiọk-ñkpọ? “Ke ndikabare ndi obufa ke esit fo.” Paul etiñ ukem ikọ emi ke akam emi enye ọbọñde abaña ufọk Abasi ke Ephesus: akpakam ada Spirit Esie anam mbufo esọñọ idem enyene odudu ke ukpọñ; … man mbufo eyọhọ esim ofuri uyọhọ Abasi” (Ñwed Mbon Ephesus 3:15-19). Oto ke eribọñ akam kpukpru usen-ubọk mbemiso ufọk-ñwed, mbre ye utom, ye ke erikot Ñwed Abasi mme ndikpañ utọñ ke ini ekotde, nditọ ekeme ndinyene Ọbọñ ndidu ye mmọ, ntre Enye eyewut mmọ ndinam se ifọnde ndinyuñ ndu uwem nnọ Enye. Edikpep Ikọ Abasi ke Usen Ọbọñ ndinyuñ ñkpep mme ikọ ibuot eyeñwam ndidemere esit nnyin nnyuñ nsọñọ nnyin ke Ọbọñ.
Nte Anamde Ye Mmọ Eñwen
Anditiene Ọbọñ edi owo nsuhọridem ebem kaña iso ekere abaña mmọ eñwen onyuñ ekere abaña idem esie ke ukperedem. Emi eyewut ke edu uwem esie ke usen ke usen. Ekeme ndinọ fi ndimek ke otu apple iba, emi kiet okponde akan eken. Satan eyetiñ ke utọñ fo ete afo ekpenyene ndida enye oro okponde akan koro biọñ ọdọñde fi. Edi afo eyeti ete ke Jesus iyomke nnyin idi ibuk, ana nte ibem kaña iso ikere ibaña mmọ eñwen, ntre afo enyene, nte ido edide, ndikpọñ apple oro okponde akan nnọ eyenọwọñ enye eken. Oro edi usuñ kiet ndiwut ima “ndinyuñ ñkpono kiet eken,” idighe ndikere mbaña idem nnyin nkan nte akpanade edi.
Eti Mme Idiọk
“Esua se idiọkde; eyire se ifọnde.” Anditiene-Christ asasua onyuñ ofume mme ñkpọ eke edide idiọk. Enye amama onyuñ eyire mme ñkpọ emi efọnde. Ekpededi ke edibre mbre, eyenọwọñ emi amade Abasi eyedianare idem esie ọkpọñ mme ñkpọ eke ediọkde. Enye ikpanaha odomo ke ido mbre nte eyipde inọ mme nte ewotde owo. Enye inyeneke ndikpebe mmọ oro eke eñwọñde sika mme mmọ oro eyetde ñkpọ ke idem mmọ, okposuk edide mbiet sika mme ñkpọ uyet-inua ke ido mbre. Eyenọwọñ emi edide anditiene-Christ inaha ama idiọk-ñkpọ emi odude ke uwem mme mmọ oro eyipde enyuñ etukde mme owo. Satan enyene usun eke adade oduri mme owo ndikere nte ke idiọk-ñkpọ “isuk idiọkke ikagha,” ndien sun-suñ enye odomo mmọ ndinam ndibe-ndibe mme ñkpọ oro mifọnke. Paul ọdọhọ ete, “Esin idem ekere ndinam ido eke enyenede ukpono ke enyin kpukpru owo.” Okposuk nte mmọ eñwen miduhe uwem nte enemde Abasi esit, oro inọhọ nnyin unen ndinam ñkpọ kiet emi akpayatde Abasi esit.
Eti Ke Itie Idiọk
Utu ke ndida idiọk nsio usiene idiọk, anditiene-Christ ada eti edinam akan idiọk ubọk. Enye ọfọfọn ido ye mme mmọ emi ediọkde ido ye enye. Enye inyeneke spirit usio usiene. Enye ekpekpeme ifet esie ndinam eti ñkpọ nnọ mme mmọ oro enamde enye idiọk. Ke Ñwed Mme Ñke nnyin imokot eñwọñọ emi enyenede mmọ emi efọnde ido ye mmọ eke enamde mmọ idiọk. “Edieke biọñ ọdọñde usua fo, nọ enye udia adia; edieke itọñ onyuñ asatde, nọ enye mmọñ ọñwọñ: koro afo eyebok enye mbubek ikañ ke ibuot: ndien Jehovah eyenọ fi usiene” (Mme Ñke 25:21, 22). Nte oro ọwọrọ ete ana nnyin ifọn ido ye mmọ emi esakde nnyin nsahi? Ih, ọwọrọ ntre. “Ediọñ mmọ emi enamde mbufo isin-enyin.”
Ñkọri
Nnyin ndidu uwem nnọ Abasi edi uwa emi odotde ndinọ Enye. Abasi iyomke ñkpọ ito ikọt Esie ikan se mmọ ekemede ndinam. Abasi iyomke ñkpọ ito ikọt Esie ikpọñ edi Enye enyene ñko mme uñwam ọnọ mmọ. Ke uñwam emi Enye ọnọde ikọt Esie ekọrọ ima Abasi, mfọn, mbuọtidem, idorenyin, odudu ye ime. Mme ñkpọ emi enyene nnyin, ndien ibọ mmọ ito ke akam ye ke ikọ Abasi, oro edi Ñwed Abasi. Owo ikemeke ndisim idaha emi Abasi oyomde ke uñwam Abasi miduhe.
Ke akpa ini emi owo ọbọde erinyaña enye enyene mme mfọn owo Abasi emi ke ekpri udomo. Abasi oyom nnyin ikọri ke mme ñkpọ emi. Ke 2 Peter 1:5-11 esọñọ nnyin idem ndikọri nnyuñ ndian ke udomo eke nnyin inyenede, man nnyin ikukpu Abasi. Peter ama ewet ọnọ nnyin ete “etie ke mfọn, ye ke ifiọk Ọbọñ ye Andinyaña nnyin Jesus Christ ekọri ñkọri” man nnyin ididuọ ikpọñ nsọñọ-nda ye mbuọtidem (2 Peter 3:18).
Ke ini eyen-ọwọñ mikọrike iwọrọ uniọñ minyuñ inyeneke udobi, nnyin idiọñọ ite ke mfina odu: enye ikopke nsọñidem nte akpanade edi; eyen oro eyekpa ibọhọke enye ọbọ uñwam. Ntem ke edi ye owo Abasi. Ñkpọ afina edieke enye mikọrike. Enye iduhe ke nsọñidem ke spirit. Utọ itie emi eyeda ọkọsuñọ ke mkpa ibọhọke enye eseme okot Abasi oyom uñwam.
Anditiene-Christ odu uwem ọnọ Ọbọñ kpukpru usen. Nditiene Ọbọñ ke Usen-Ọbọñ ikpọñ-ikpọñ me ndinyuñ nam eti ñkpọ ke ini ke ini ikemke. Ke ukpep-ñkpọ emi otode ke mme ñwed emi Paul ye Peter ewetde, nnyin imekpep ibaña mme nti ñkpọ emi owo Abasi anade nte anam. Owo inamke mme ñkpọ emi man enye ekpedi owo Abasi. Enye anam mmọ koro enye edide owo Abasi. Kpukpru ini enye okokut ntak ndinem Abasi esit ye ndinyuñ nnam uduak Esie. Ndien Ọbọñ ye ofuri ererimbot eyediọñọ, oto ke uwem esie, ete ke enye edi anditiene-Christ.
Questions
MME MBUME- Anie ekewet Ñwed Mbon Rome?
- Ekewet enye enọ anie?
- Didie ke owo ekeme ndidi odu-uwem uwa nnọ Abasi?
- Nso iñwam owo ndinam akpanikọ nnyuñ mbuọtidem ye Abasi?
- Nso ke owo ekeme ndinam ke usen ke usen man enye okop odudu ke spirit?
- Didie ke owo ekeme ndifiọk edieke owo edide anditiene-Christ?
- Didie ke anditiene-Christ okut mme ñkpọ eke edide idiọk?
- Didie ke anditiene-Christ anam ye mmọ emi ediọkde ye enye?
- Nso ke edinam-asana anam ke uwem owo?
- Nso ke ndikọri ke mfọn ọwọrọ?