Lesson 358 - Junior
Memory Verse
IKỌ IBUOT: “Sededi eke mbufo enamde, enam ke ofuri esit, nte ñkpọ eke enamde enọ Ọbọñ, minamke inọ owo” (Ñwed Mbon Colossae 3:23).Notes
Ndima Abasi
“Ma Jehovah Abasi fo ke ofuri esit fo, ye ke ofuri ukpọñ fo, ye ke ofuri ekikere fo. Emi edi akamba ye ebe-iso item” (Matthew 22:37, 38).
Odu ediwak owo ke ererimbot emi midighe nditọ Abasi edi ekere ete ke akpana mme imọ ima Abasi. Mmọ enyuñ etiñ ete ke mme imọ imanam ntre. Owo kiet amana ye udọñ ke esit ndinyene se ekponode, ye ndima owo emi enyenede odudu akan enye. Mmọ oro midiọñọke ibaña ata Abasi esiwak ndikpono ndem.
Edi ke ediwak idaha, mme owo emi ebede ke uwak ido ye edinam ndikpono Abasi. Idaha edikpono Abasi mmọ idian ke edu uwem mmọ ye owo ke usen ke usen. Jesus ama etiñ ete ke ana nnyin ima Jehovah Abasi ke ofuri esit nnyin, koro emi edide akamba ye ebe-iso ibet. Edi oro ikedighe ñkukure ibet.
Ndima Mbọhiduñ Fo
Jesus ama adian ñkpọ ke akpa ibet: “Udiana onyuñ ebiet enye, ete, Ma mbọhiduñ fo nte idem fo” (Matthew 22:39). Mme owo ekeme ndidọhọ ete ke mme imọ imama Abasi, nnyin inyuñ ikemeke nditiñ ñwut nte ke mmọ inamke ntre. Edi nnyin imekeme nditiñ ata usọp-usọp, mme owo ama mbọhiduñ esie mme imaha. Mbọhiduñ ekeme ndidi owo emi nnyin idukde nduk. Ini kiet ọfiọk-ibet ama obup Jesus ete “Anie edi mbọhiduñ mi naña?” Jesus ama ọnọ enye mbuk Eti Owo Samaria. Owo kiet ọkọduọ ke otu mbon ñwo, enyuñ emia enye eti eti. Nte enye osuk anade ke mben usuñ, oku asaña ebe. Akana nte enye edi isuñ-utom Abasi mi ke isọñ. Akpana nte enye atua owo emi akadade unan mbọm nte Jesus akpanamde. Edi oku ekere idaha esie akan ndiñwam owo emi okoyomde unwam. Levi emi akafiakde edibe edi enye emi ekenyenede ebuana ke utom edikpono Abasi ke Itie-ukpono. Kiet ke utom emi enye akpanamde ekpedi ndise mbon udọñọ ye mmọ emi ñkpọ anamde. Ke ntre akpakana nte enye añwam owo oro, ekpededi enye mikenyeneke ima inọ enye. Edi enye ñko asaña ebe “Ke ñkan eken.”
Ibighike, Owo Samaria asaña edi, emi akananam mitiñke ite ke imọ imenyene utọ ido ukpono Abasi emi oku ye Levi ekenyenede, edi enye enyene ima ke esit ọnọ owo emi okodude ke afanikọñ onyuñ añwam enye.
Ke Jesus ama ọkọnọ mbuk emi ama, Enye obup Ọfiọk-ibet ete: “Anie edi mbọhiduñ owo emi ọkọduọde ke otu mbon ñwo?” (Luke 10:36). Owo ekededi ekeme ndibọrọ mbume oro. Ke utọ usuñ emi, owo ekededi emi oyomde uñwam oto nnyin edi mbọhiduñ nnyin.
Nnyin imekeme ndikot mbio ufọk nnyin, mbọhiduñ nnyin. Ayak esisit ndidi kpukpru eka ekop ete ke nditọ mmọ efọn edu ke ufọk mme ufan mmọ ekan nte edide ke ufọk mmọ. Ndusuk ini nditọñwọñ esikere ete ke inaha ifọn ido, ñko ikere ibaña nditọ eka mme imọ iban ye iren. Edi edieke nnyin inyenede ima Jesus ke esit nnyin, nnyin iyema kpukpru owo.
Spirit ọkọdọhọ John, owo Mbet ewet; “Edieke owo ọdọhọde ete, Mmama Abasi, ndien enye asua eyen-ete esie, enye edi osu-nsu; koro owo emi mimaha eyen-ete esie emi enye okokutde ke enyin ikemeke ndima Abasi emi enye mikekwe” (1 John 4:20). Edieke nnyin ikpepde ke ufọk nnyin ndinọ kiet eken ukpono, idisọñke nnyin idem ndinọ mmọ emi edude ke añwa ukpono, nnyin ñko iyenim mbet obio nnyin eke enende. Edọhọ nnyin ete: “Enọ kpukpru owo se idide udeme mmọ: eda utomo enọ mmọ emi ekpebọde utomo; eda utip enọ mmọ emi ekpebọde utip; efehe mmọ emi edotde ndik: ekpono mmọ emi edotde ukpono” (Ñwed Mbon Rome 13:7). Idut nnyin me obio nnyin ye mme ikpọ obio ukara nnyin enyene mme mbet emi enamde ke ufọn mme andiduñ; man añwam ata ediwak owo ndiduñ ọtọ kiet ke ifure, ana nte enim mme mbet oro. “Kpukpru owo esuk idem enọ mme enyene-odudu emi ekarade; koro odudu iduhe ke mitoho Abasi; ndien mme enyene-odudu emi edude kemi, edi Abasi okonim mmọ” (Ñwed Mbon Rome 13:1).
Utom Mmọ Emi Edade Ke Utom
Mmọ emi nnyin inamde utom ọtọ kiet edi mbọhiduñ nnyin ñko. Ana nnyin inam ñkpọ ye mmọ ke usuñ eke anamde mmọ efiọk ete ke nnyin idi nditọ Abasi. Paul, owo Mbet ewet ọnọ Timothy ete: “Yak kpukpru mmọ emi esinede ke idak ufin ebat mme ete mmọ nte owo emi odotde ọyọhọ ukpono, mbak owo editiñ idiọk adian enyiñ Abasi ye ikọ Abasi eke ekpepde. Yak mmọ emi enyenede ete-ufọk eke onimde ke akpanikọ ekuse enye ke ndek oto koro enye edide eyen-ete. Edi mmọ ekam enam ñkpọ enọ enye ekan, koro enye emi adiade ufọn ubọk-utom mmọ edi owo mbuọtidem ye edima owo Abasi” (1 Ñwed Timothy 6:1, 2).
Nnyin ikpabatke idem nnyin ke ifin, edi edieke nnyin inamde utom inọ owo, nnyin inyene ndinam utom ofuri esit nnọ enye ke okuk emi enye ekpede nnyin.
Ndusuk ini ete-utom nnyin ekeme ndidi anana-ibuot ye owo nsọñ-ido nnyin ndinam utom nnọ enye. Oro ñko idighe ntak emi esinde nnyin ikpetre ndinam utom ofuri usen nnọ enye ke okuk usen emi ekpede. Peter ewet ete: “Nditọ ufọk, esukidem enọ mme ete ufọk mbufo ke ata ndik; idighe enọ mmọ emi efọnde ido enyuñ etiede suñ-suñ ikpọñ, edi enọ mmọ emi ekwañade ido ñko. Koro edi se inemde Abasi esit, edieke owo obiomde ndutuhọ onyuñ ọbọde ufen eke midotke kabaña edifiọk eke enye ọfiọkde Abasi” (1 Peter 2:18, 19). Nnyin iyebọ utip eke okponde akan ke Heaven ke abaña ñkpọ oro nnyin ibọde ufen mi, emi etiede nte nnyin ibọhọ baba utip, ekọm “sọsọñọ” inyuñ iduhe, akan nte ikpọbọde utip ke mme ñkpọ ererimbot emi.
Jesus ọdọhọ ete: “Ekpeme ekunam edinen ido mbufo ke iso owo, nte mmọ ekut: enamde ntre, mbufo inyeneke utip ke ubọk Ete mbufo emi odude ke Heaven” (Matthew 6:1). Ke kpukpru ñkpọ eke nnyin inamde, edieke inamde iyom itoro owo, nnyin imọbọ utip nnyin mi ke isọñ. Yak nnyin inam utom inọ Jesus ke ndop-uyo ndusuk ke ndibe, man nnyin inyene mme inyene ke Heaven.
Nte Anam Ọnọ Ọbọñ
Ediwak ini edi ọkpọsọñ ñkpọ ọnọ owo emi enamde utom ọnọ owo eñwen ndikut nte ke imọ inam utom oro nte inam inọ Ọbọñ. Ke ini Paul ekewetde ọnọ mbon Ephesus, enye ọdọhọ ete: “Esuk ibuot enọ mmọ emi edide mme ete-ufọk mbufo ke obukidem, ke uteñe ye nyekidem ye ofuri esit, nte enam enọ Christ … eda erinyime esit enam utom, nte ñkpọ eke mbufo minamke inọ owo, edi enamde enọ Ọbọñ” (Ñwed Mbon Ephesus 6:5-7). Abasi ke ese kpukpru se nnyin inamde. Enye okut mme mkpọsọn ebiet oro nnyin isañade ibe ke esit, onyuñ ọñwọñọ ete ke Imọ idikpọñke inyuñ ifre nnyin; ñko ke Imọ iyenọ nnyin utip ke nti utom nnyin edieke nnyin inamde nte inam inọ Enye.
Ke ini Paul ewetde ọnọ mbon Galatia enye ọdọhọ ete: “Eyak ikukpa mba ke erinam eti ñkpọ; koro ke edikem ini nnyin iyedọk mbuñwum, edieke nnyin miyakke idem emem nnyin.” Onyuñ adian ñko: “Eyak nnyin ifọn ido ye kpukpru owo akpan-akpan ye mmọ emi etode ke ufọk mme andinim ke akpanikọ” (Ñwed Mbon Galatia 6:9, 10).
Ediwak owo ekere ete koro mmọ enamde utom enọ owo ufọk Abasi mmọ, mmọ ikpanaha enam ọkpọsọñ utom enọ enye ukem-ukem nte mmọ enamde enọ esen owo. Edi, nnyin kpukpru ini inyene ndiwut ido akpanikọ ke usuñ unam mbubehe nnyin. Paul, owo mbet, ekpe Nditọ Abasi ubọk ete: “Ekutek ke ifik mbufo” (Ñwed Mbon Rome 12:11). Nnyin iyedu ye mme ufan nnyin ibighi edieke nnyin inọde mmọ unen mmọ, nnyin ñko iyebọ edidiọñ Abasi ke uwem nnyin.
Abasi ñko enyene ikọ ọnọ mme andikpe owo utom “Mme ete-ufọk enọ ifin mbufo se inende inyuñ ikemde; sia efiọkde ete mme imọ ñko imenyene Ete-ufọk ke Heaven” (Ñwed Mbon Colossae 4:1). Ukwañ ete-ufọk eyebọ ufen ke idiọk edinam esie ke ini ubiere ikpe. (James 5:1-6).
Akakan Mbet
Ke ini Jesus ọkọnọde nnyin se ekotde Akakan Mbet, Enye ọdọhọ ete: “Ntre sededi mbufo eyomde owo enam ye mbufo, enam kpa ntre ye mmọ” (Matthew 7:12). Enye etiñ abaña “owo”, emi otuk kpukpru owo, iren, iban ye nditọwọñ, kpukpru owo ke kpukpru mme idut, nditọ Abasi ye mme idiọk owo.
Etiñ ete ke ekpekwọhọre kpukpru mfina ererimbot efep ke usen kiet, edieke kpukpru owo ekpetọñọde ke usen ubọk kiet ndidu uwem nte Akakan Mbet etemede. Udọñ-itọñ odudu ididuhe aba, ndituk kiet eken man enyene udori iduhe aba. Mbon inyene iditukke ubuene; ete-ufọk idinọhọ anam-utom esie utom eke okponde akan, anam-utom eyenam utom ete-ufọk esie nte ekemde enye, onyuñ anam akan ke ukeme odude. Nditọ eka iren ye eka iban idiñwanake aba; mme ebe ye iban eyenam ñkpọ enọ kiet eken ke ima ye ukpono. Edidianare ye edisio ke ndọ ididuhe aba, nditọ eke esuade iduhe aba. Nte oro ididighe ererimbot eke enende? Oro edi utọ ererimbot eke Jesus oyomde nnyin iduñ ke esit. Enye edi ntak emi Enye ọnọde nnyin mme mbet emi man ida idu uwem.
Questions
MME MBUME- Ewe edi akamba ye ebe-iso ibet?
- Ewe edi udiana, emi ebietde akpa?
- Nnọ mbuk Eti Owo Samaria.
- Nso ikedi ntak emi Owo Samaria ekedide eti mbọhiduñ?
- Abasi okot didie owo emi ọdọhọde ete imọ imama Abasi edi mimaha mbọhiduñ mme eyen-eka esie?
- Didie ke nnyin inyene ndidu uwem ye mmọ emi ekpede nnyin utom?
- Tiñ Akakan Mbet.
- Tiñ wut nte ererimbot ekpetiede edieke kpukpru owo ekpedude uwem nte Akakan Mbet etemede.