Lesson 361 - Junior
Memory Verse
IKỌ IBUOT: “Edieke nnyin isañade ke uñwana, kpa nte Enye odude ke uñwana, nnyin imoduk nduk ye kiet eken, ndien iyip Jesus Eyen Esie eyet nnyin isana ke kpukpru mme idiọk-ñkpọ” (1 Ñwed John 1:7).Notes
Mbet Emi Jesus Akamade
Ekediọñọ John, owo mbet nte “mbet emi Jesus amade” ke ini Jesus okodude ke isọñ. Enye ama abiat ekese ini ye Jesus; enye Peter ye James ema ekop inemesit ke ndidu ñkpere Jesus, ekan mme Mbet eken.
Ke ini John ama ekewet Eti-mbuk esie okure, enye ọdọhọ ete: “Ewet mmọ emi, man mbufo enim ke akpanikọ ete Jesus edi Christ, Eyen Abasi; man, ke erinim ke akpanikọ, mbufo ekpenyene uwem ke enyiñ Esie” (John 20:31). John ama onim ke akpanikọ ete ke Jesus ekedi edisana Eyen Abasi, ọyọhọ Owo Iba ke mbuot Abasi Ita Ke Kiet. Enye ekewet ete: “IKỌ onyuñ edi Abasi … Ndien IKỌ akabare edi obukidem onyuñ oduñ ye nnyin” (John 1:1, 14). Oro ekedi Jesus.
Ke ama okodu ye Jesus ke isua ita ye ubak, akpañ utọñ ọnọ ikọ Esie, okut mme utibe-ñkpọ emi Enye akanamde, ndien okut nte ewotde Enye ke Krọs, Enye onyuñ afiak odu uwem ke obukidem, John ama onim ke akpanikọ ete ke Jesus edi Christ. Enye ama ayak ofuri ini ye ukeme esie ọnọ man ayarare akpanikọ emi ọnọ mbio efen.
Ke John ama akakabare edi akani eren, ke ama okonyuñ anam utom ke esit akpanikọ ọnọ Abasi ye owo ke ediwak isua, Abasi ama edemere enye man ewet mme ñwed, emi ewetde mmọ esin ke Ñwed Abasi enim enọ nnyin. Ñtọñọ-ikọ esie ekedi ukem-ukem ye ekikere emi enye ekewetde ke akpa ñwed esie: ete, ke Jesus okodu ke eritọñọ ye Abasi, ndien ke ama edi ke ererimbot man oduñ ye owo.
Nditim Mfiọk
John eketiñ abaña mme ñkpọ emi enye ọkọfiọkde abaña. Ke mme ñwed esie emi, enye etiñ ikọ emi, “ifiọk ite” awak akan ñkpọ nte ikọ edip ye duop. Enye ama otim ọfiọk kpukpru se enye eketiñde. Enye ama odomo ọfiọk ete ke Jesus anyaña owo osio ke idiọk-ñkpọ onyuñ ọnọ owo ukeme ndikan idiọk-ñkpọ, ndien enye okoyom ererimbot efiọk akpanikọ emi.
John ama ọnọ ntak inañ emi akanamde enye ewet mme ñwed oro: oro ekedi man adian idara ọnọ mme andinim ke akpanikọ; ndinọ mmọ ntọt ete ekpeme idem mbak idiọk-ñkpọ; ndinọ mmọ ntọt mbaña nsu-nsu mme andikpep; ndinyuñ nnam mbuọtidem mmọ ọsọñ ke Christ, onyuñ anam mmọ enyene idorenyin nsinsi uwem adaña nte mmọ esuk ekade iso ndisaña ye Abasi ke uñwana Ikọ Esie, emi edide Ñwed Abasi.
Ọyọhọ Idara
“Man idaresit nnyin ọyọhọ.” Ata inemesit iduhe ke ererimbot ke esiode ifiọk erinyana ukpọñ efep. Sia Jesus edide Eyen Abasi, Enye ọnọ ikọt Esie odudu ndidu uwem eke akande idiọk-ñkpọ. Enye edi uñwana ererimbot, ndien edieke nnyin isañade ye Enye, ana nte isaña ke uñwana.
“Emi edi ikpe oro, ete, uñwana ama edi ke ererimbot, edi owo emama ekim ekan uñwana; koro utom mmọ ọdiọkde” (John 3:19). Ke ini mme owo enamde se idiọkde mmọ esima ndifuk ndudue oro. Idem ekpri eyen ọfiọk ke ini enye anamde se mifọnke, ndien ke ediwak ini enye odomo ndinam eka esie okufiọk midighe ntre enye osu nsu.
Nnyin emi idide mme anditiene-Christ ana nte idu uwem man kpukpru se inamde ekeme ndida ñwọrọ ke uñwana. Edieke nnyin iyomde ndisaña ye Jesus, nnyin inyene ndidu uwem nte Enye okodude. “Owo eke ọdọhọde ete imọ iduñ ke Enye, akpasaña odu uwem kpa nte Enye akasañade” (1 John 2:6).
Idiọk-ñkpọ Iduhe
Ọyọhọ ñkpọ iba emi akanamde John ewet ñwed esie ekedi emi: “Ñkpri nditọ mi, mmewet ñkpọ emi nnọ mbufo, man mbufo ekunam idiọk-ñkpọ” (1 John 2:1).
Edi ọkpọsọñ ñkpọ idiọk owo ndifiọk ete ke owo ekeme ndidu ke ererimbot emi inamke idiọk-ñkpọ. Ekese mmọ emi edọhọde ete idi mme anditiene-Christ ekot se John ewetde, enyuñ edọhọ ete ke se John ewetde idighe ntre. Mmọ edọhọ ete ke idighe mmem-mmem ñkpọ owo ndidu uwem nte John ọdọhọde. Edi John ama odu; ndien edieke owo kiet ekekemede, mme owo eken ekeme, ke mfọn Abasi.
John ama etiñ ete “Edieke nnyin isañade ke uñwana, kpa nte Enye odude ke uñwana, nnyin imoduk nduk ye kiet eken, ndien iyip Jesus Eyen Esie eyet nnyin isana ke kpukpru mme idiọk-ñkpọ” (1 John 1:7). Ana nte enyaña nnyin esio ke idiọk-ñkpọ man nnyin isaña ke uñwana. Ndien ke ini isañade ke uñwana oro, Iyip Jesus eyet nnyin isana ke kpukpru mme idiọk-ñkpọ, emi edi edinam asana. Idem uduot idiọk-ñkpọ, ñkpọ emi esinukde nnyin ndinam idiọk-ñkpọ emi nnyin ikedade imana, eyet enye esio ke uwem nnyin.
Ndusuk owo eyekot itie emi: “Edieke nnyin idọhọde ite, nnyin inyeneke idiọk-ñkpọ, nnyin ibabiaña idem, akpanikọ inyuñ iduhe nnyin ke esit” (1 John 1:8), ndien enim ete ke oro ọnọ mmọ unen ndidọhọ ete ke kpukpru owo enam idiọk-ñkpọ. Edi ewet ufañ ñwed oro enọ mmọ emi mimanake obufa, edi ekere ete ke mme imọ idighe ndiọi owo. Mmọ ekere ete ke mme imọ imefọn ikem okposuk edi mmọ mibọhọ erinyaña. Mmọ ekere ete ke iyeka Heaven okposuk edi nte mmọ mikabakere esit. Oruk mme owo oro ebabiaña idem mmọ.
Ufañ ñwed emi etienede ke edem etiñ ete, “edieke nnyin iyararede mme idiọk-ñkpọ nnyin, Enye edi anam akpanikọ onyuñ enen, ete ifen mme idiọk-ñkpọ nnyin, inyuñ iyet nnyin isana ke kpukpru mme ukwañkpọ” (1 John 1:9). Kpukpru nnyin ima inam idiọk; ndien ana nte nnyin inyime ite ke idi mme idiọk owo. Ñkpọ efen emi inyenede ndinam edi ndikabare esit mkpọñ idiọk-ñkpọ. Ndien Jesus efen, nnyin inyuñ idu uwem unana idiọk-ñkpọ adaña ini nte nnyin isuk ikopde uyo inọ Ọbọñ.
Ndikan Andidiọk
John ọkọdọhọ ete ke imọ ikewet inọ mkparawa koro mmọ “ekekan andidiọk” (1 John 2:13). Ndidi andikan ọwọrọ ete ke amakan. Andidiọk edi Satan, ndien ke ini nnyin idide mme anditiene-Christ, nnyin iduọhọ ke idomo emi enye enimde nnyin ke iso. “Mma ñwewet nnọ mbufo, mkparawa, koro mbufo ekopde idem, ikọ Abasi onyuñ oduñde mbufo ke esit, mbufo ema enyuñ ekan andidiọk” (1 John 2:14). Mme andikan edu uwem emi akande idiọk-ñkpọ.
Ntak emi esinde ediwak owo edọhọ ete ke nnyin ikemeke ndidu uwem emi akande idiọk-ñkpọ edi koro mmọ emade ndusuk idiọk-ñkpọ enyuñ esuk eyoyom ndika iso nnam mmọ. Edieke owo eneñere oyom ndidu uwem unana idiọk-ñkpọ, Abasi eyenọ enye ukeme.
Ndima Ererimbot
“Ekuma ererimbot, ye se idude ke ererimbot, Edieke owo ekededi amade ererimbot, ima Ete iduhe enye ke esit’ (1 John 2:15). Ekeme ndidi se owo amade idighe idiọk-ñkpọ, edi edieke enye amade ñkpọ oro akan Abasi, enye inamke se ifọnde. Abasi oyom akpa itie ke uwem nnyin; ndien edieke nnyin ikerede ibaña mme ufọk, isọñ, okuk, odudu ye ukpono ikan nte ikerede ibaña Jesus, ima Ete iduhe ke esit nnyin. Mme ñkpọ ererimbot emi eyebe efep, ndien edieke nnyin minyeneke ima Abasi ke esit, ñkpọ idisuhọke inọ nnyin. Edi edieke nnyin inamde uduak Ete, nnyin “iyedu” ke nsinsi.
Nsu-nsu Mme Andikpep
Ọyọhọ ntak ita emi John ekewetde ekedi man ọnọ mme owo ntọt ke abaña nsu-nsu mme andikpep. Ufọk Abasi ọkọtọñọ obufa, ndien Satan ekedi ke usuñ kiet mme eken, ndibiat mbuọtidem mme owo, ukem nte enye osuk anamde mfin emi.
Usuñ kiet emi Satan adade etiene owo edi ndinam mme owo ekunim ete ke Jesus edi Eyen Abasi, ñko ke Enye okodu ke eritọñọ ye Abasi, ndien okonyuñ oto ke Enye enam mme ererimbot. Edi John ama onim emi ke akpanikọ ndien enye ọdọho ete ke owo ekededi eke minimke ke akpanikọ edi osu nsu, onyuñ edi asua-Christ. Kere baña kpukpru owo emi ekade ufọk Abasi edi ñkukure se mmọ enimde ke akpanikọ edi ke Jesus ekedi akamba andikpep ye anditiñ ntiñ-nnim ikọ, ke Enye ñko okonyuñ edi owo nte nnyin. Mme mmọ emi edi asua-Christ. Edieke ekpepde abaña nte ñkpọ ọkọwọrọde odu ke idem esie, onyuñ ọkpuhọrede uduot esie nsit-nsit tutu okosim idaha eke mmọ edude idahemi (evolution) ke ufọk ñwed, ti ete ke oro edi ekikere owo, ndien ke idighe akpanikọ. Mme nta-ifiọk ke ekaka iso ndinyene nsio-nsio ekikere mbaña nte ererimbot ye mme andiduñ enye ekesañade edu, edi Ikọ Abasi ikpuhọkere. Ti ete ke Ñwed Abasi etiñ abaña Jesus ete: “Oto ke Enye ekenam kpukpru ñkpọ; ndien mitoho ke Enye, inamke ñkpọ baba kiet eke ekenamde” (John 1:3).
Spirit Akpanikọ
Jesus ama ọdọhọ ete ke imọ ima inyọñ ika ke Heaven, ke iyedọñ Iberedem, kpa Spirit akpanikọ. “Edi ke adañemi Enye oro edidide, kpa Spirit akpanikọ, Enye eyeda mbufo oduk ke ofuri akpanikọ” (John 16:13). John eketiñ abaña Spirit akpanikọ nte “Enye emi edide Edisana”; ñko “Spirit emi Christ ama añwaña mbufo ke idem” mmọdo “ke esit mbufo oduñ, … onyuñ edide akpanikọ, midighe nsu, ndien nte Enye ekekpepde mbufo, mbufo esuk eduñ ke Enye” (1 John 2:20, 27).
Imokut mi ite ke John ọkọkwọrọ abaña enọ mfọn Abasi ita eke spirit, nte enye ekewetde mme ñwed esie: erifen mme idiọk-ñkpọ, emi edide utebe-ikpe; ediyet esit asana, emi edide edinam-asana; ye uduọk-mmọñ Edisana Spirit, emi edide “Spirit emi Christ ama añwaña mbufo ke idem”.
Se John Etiñde Abaña Anditiene-Christ
“Ndima, nnyin idi nditọ Abasi ke emi; ndien iyarakere kaña iwut se nnyin ididide. Edi nnyin ifiọk ite, edieke Enye ediwọrọde owut idem nnyin iyebiet Enye, koro nnyin iyekut Enye nte Enye edide” (1 John 3:2). Edieke nnyin idide “nditọ” Abasi, nnyin iyenyene ido Ete nnyin. “Baba owo kiet eke Abasi okobonde inamke idiọk-ñkpọ” (1 John 3:9).
Ukpuhọre odu ke ufọt nditọ Abasi ye nditọ Satan. Nnyin imesikut uwem mmọ emi edọhọde ete idi nditọ Abasi, ndien usuk idaha nnyin ikere mme mmọ ekpuhọre ye ererimbot. “Eda emi eyarare efiọk nditọ Abasi ye nditọ Satan; baba owo kiet eke minamke edinen ido idighe eke Abasi, ndien edi ntre ye owo emi mimaha eyen-ete esie” (1 John 3:10).
Nte omokut ete edi ata akpan ñkpọ ọnọ fi, ndima eyen-ete fo? Ikọ Abasi etiñ ọnọ nnyin ete, “Owo eke asuade eyen-ete esie edi obom” (1 John 3:15). Ndien baba owot owo emi mikabakere esit idikaha Heaven. Edi ido nnyin ayarare owut nte nnyin imade eyen-ete nnyin. “Ñkpri nditọ mi, eyak nnyin ikuma ke ikọ-inua ye ke edeme, edi eyak nnyin ima ke erinanam ye ke akpanikọ” (1 John 3:18).
Edieke nnyin idude uwem nte Abasi oyomde, Enye eyekop onyuñ ọbọrọ akam nnyin. “Ndima, edieke esit nnyin mibiomke nnyin, nnyin imenyene uko ye Abasi; iyenyuñ ibọ se ededi eke ibeñede ke ubọk Esie, sia nnyin inimde mbet Esie, inyuñ inamde se inemde Enye esit” (1 John 3:21, 22). Ndien ke ini nnyin inimde mbet Esie, Spirit Abasi eyedi ntiense ye spirit nnyin ete ke nnyin idi nditọ Abasi.
Questions
MME MBUME- Nso oruk enyiñ ke ekesikot John, owo-mbet?
- Nso idi ntak emi enye ekewetde Ñwed Eti-mbuk John?
- Nso idi akpan ñkpọ emi John ewetde ke Ñwed Esie?
- Nọ ntak ita emi akanamde John ewet mme ñwed emi.
- Nso idi ntak emi mme owo emade ekim ekan uñwana?
- Didie ke nnyin mme anditiene-Christ ikpesaña ke ererimbot emi?
- Nso ke Jesus edinam ọnọ nnyin edieke iyararede mme idiọk-ñkpọ nnyin?
- Nso ke John eketiñ abaña mmọ emi emade ererimbot?
- John okokot didie mmọ emi minimke ite Jesus edi Eyen Abasi?
- Nso ke John eketiñ abaña nnyin adian eyen-ete?