Lesson 362 - Junior
Memory Verse
IKỌ IBUOT: “Koro nte emireñ-emireñ otode ke edem usiaha-utin ọwọrọ ayama osim edem usop-utin, ntre ke eridi Eyen Owo eyedi” (Matthew 24:27).Notes
Ke Obot Olivet
Ekedi ke ukem Obot Olive mme Olivet emi Jesus ọkọdọkde oduk Heaven ke Enye okodu ye mbet Esie usen kiet. Mmọ edọhọ Jesus, “Sian nnyin” … nso idinyuñ idi idiọñọ eridi Fo, ye eke akpatre ini eyo emi?” Ndien Jesus etiñ abaña ekọñ, akañ ye unyek-isọñ emi editienede ererimbot mbemiso erifiak ndi Esie. Enye etiñ ñko abaña mme prophet nsu mme ọkwọrọ-ikọ emi edibiañade mme owo ye idiọk-ñkpọ ye afanikọñ emi edidude ke ererimbot. Enye ọkọdọhọ, “Eyenyuñ ekwọrọ Gospel Ubọñ Abasi emi ke ofuri ekondo nte ntiense enọ kpukpru mme idut, ndien adañoro ke utit eyedi.”
Ekem usen kiet ke ini Jesus osuk odude ye mbet Esie ini kiet efen ke Obot Olive, ndo-ndo oro ntọñ enyọñ emen Enye oduk Heaven. Owo iba emi esinede mfia ọfọñidem ekedọhọ “Jesus emi, emi emende Enye ekpọñ mbufo eduk ke heaven, eyedi kpa ido emi mbufo ekutde Enye ọnyọñde oduk ke heaven,” (Utom Mme Apostle 1:11).
Mme Andinim Ye Mmọ Emi Minimke Ke Akpanikọ
Okposuk ñkpọ nte isua 2000 ema ekebe tọñọ ke utibe usen oro, mme owo edu emi esuk ekpemede, ebetde enyuñ eyomde Jesus afiak edi. Mfin, ata eyen Abasi idọhọke “Sian nnyin, nso idinyuñ idi idiọñọ eridi Fo?” edi enye ọduñọre Edisana Ikọ Abasi oyom mme idiọñọ oro, ndien nte enye esede ererimbot enye okut ini kiet ete ke mme idiọñọ oro ema esu. Kpukpru emi ewọrọ nso? Ọwọrọ ete ke Jesus ekeme ndidi ini ekededi!
Ekuyak nnyin idu ye mbon nsahi emi edọhọde ete: “Eridi eke Enye ọkọñwọñọde ete iyedi enye? koro tọñọ nte mme ete ekede idap, kpukpru ñkpọ etie kpasuk nte eketiede toto ke eritọñọ ererimbot” (2 Peter 3:4). Eñwọñọ emi odu ke Ikọ Abasi, ndien nnyin imonim ke akpanikọ ite nnyin iyedu uwem ikut Jesus edide.
Iwọrọke ite koro ñkpọ mitibeke ke idikemeke nditibe. Ke ini Noah ọkọbọpde ubom mbemiso ukwọ, mme owo ikonimke ke akpanikọ ete ke ukwọ eyedu. Mmọ ekesasak Noah ke mme usen oro ukem nte mmọ enamde ye mme ọkwọrọ-ikọ edinen ido mfin. Edi ke ndo-ndo oro, “ukwọ edi edimen mmọ kpukpru efep” (Matthew 24:39).
“Kpasuk ntre ke eridi Eyen Owo eyedi” (Matthew 24:39). Ndo-ndo oro! Ye mmọ emi mibeñeke idem ndikut Enye. “Nte ekpọ” ye mmọ emi mibeñeke idem! (Luke 21:35). “Nte inọ” ye enye emi mikpemeke! (1 Ñwed Thessalonica 5:2). “nte emireñ-mireñ,” emi anamde owo edighe! (Matthew 24:27). “Ke ufọt okoneyo,” ke ini kpukpru ebiet edide ekim! (Matthew 25:6).
Mme “idiọñọ” ewak eti-eti emi ekpepde nnyin ete ke eridi Jesus kekpere. Nditọ Abasi emi ekedude uwem ke ererimbot mbemiso mme usen Christ ema etiñ mme ñkpọ emi ediwọrọde osu ke mme akpatre usen emi. Mme idiọñọ emi Jesus eketiñde ọnọ mbet Esie, oro edi, ekọñ, unyek-isọñ, afanikọñ ema ewọrọ esu. Ediwak ñkpri mkparawa iren ye iban mfin ekeme nditi nte mmọ ekọmde eyen eka eren mme ete mmọ emi ekekade ekọñ ete saña suñ. Nnyin imokop ibaña unyek-isọñ emi ebiatde ñkpọ ekese ke eyo nnyin emi, ye ukut ye afanikọñ emi ediwak owo ke ererimbot ebiomde.
Mme Asaña Isañ
Nte emesikut ke ini asañade isañ aka idut ete nte afo asañade ekpere ebiet emi afo akakade, ediwak idiọñọ edu emi enamde fi ọfiọk ete osuk esisit afo ndisim do? Ndusuk idiọñọ etiñ ebaña ndusuk ufọk-isen mme ufọk-udia ke idut oro: mme idiọñọ efen etiñ ebaña ibat itiat emi enyenede ndida nsim idut oro; ñko mme idiọñọ efen enọ uniọñ ini nte edidade isim ebiet oro.
Mfin emi nnyin ke isaña isañ. Kpukpru nnyin idu ke usuñ Nsinsi-ini, ndien eneñere ewut usuñ uwem. Asaña-isañ owo Abasi enyene ñwed ndise ererimbot, ñwed usuñ isañ, ñwed nda usuñ ndien enye ototim ọduñọre ñwed ndise esie edide Ñwed Abasi. Ndien nte enye asañade aka ke usuñ uwem enye okut adaha mme idiọñọ. Enye ese ke ñwed ndise esie. Ke akpanikọ, enye okut ete ke enim idiọñọ ke ebiet oro ke ñwed ndise esie ndien ke ebiet oro ke usuñ idiọñọ odu. Enye aka iso asaña, ibighike enye okut idiọñọ efen ko nsan-nsan ndien ke asañade ekpere nte ekpekotde, enye ọfiọk ete emi ñko etiñ ọnọ enye abaña ñkpọ emi enye okotde ke Ñwed Abasi.
Eyak nnyin ke ekikere esit nnyin, iwat isuhọre ññwaña usuñ ke esuk Oregon. Ke iso-iso akamba ukpat-ñkpọ ye ubom-isọñ emi eyọhọde ye ikpọ mbio eto ke eka ufọk usọi eto. Nte ekpep-kpep, itie ñwed oro edemere ke esit nnyin ete ke usen utim-ñkpọ Esie, “mmọ oro, kpa ke iso nnyin ikut mme ubom-isọñ etuakde eda ke ññwaña-usuñ ndien nte ituakde ida ikut ite moto iba ema edituaha. Ñko nnyin iti ite ke “ñwed usuñ isañ” ọdọhọ ete “Mme chariot edama ke efak, eyọhọ itọk-itọk ke añwa.” Nnyin ibiere ite, emi edi usen utim-ñkpọ Esie.
Nnyin imokop ite mme awat-ubom-isọñ eñwọñwọñ mkpọsọñ mmin, “idiọñọ” efen nte ke emi edi ini oro ndiwut ete eridi Jesus ke isọñ ekpere. Nnyin imokop esui mme awat ubom-isọñ ye idat idat idaresit mmọ ñko osuk edi idiọñọ akpatre mme usen” (2 Ñwed Timothy 3:1-5).
Mme Idiọñọ Efen
Nte iyeduñọre ise mme iyekut mme “idiọñọ efen? Nnyin imokut ke 2 Ñwed Timothy 3:2 ite: “ke ukperedem ini” mkparawa iren ye iban eyesọñ ibuot ye ete ye eka. Akananam nte emetie ekere ete ke ini imọ isọñde ibuot, ke imọ inam ukem se Ñwed Abasi etiñde abaña se ediwak nditọwọñ edinamde ke ekperede ini erifiak ndi Jesus? Ọfọn, ndien edi ata akpan ñkpọ utọ nditọ oro ndinyene erinyaña ini kiet nnyuñ mbeñe ete ye eka mmọ ndifen nnọ mmọ ke nsọñibuot mmọ ndinyuñ nnam ọyọhọ mbeñeidem mbaña eridi Ọbọñ. Nte afo ukọmke Abasi ke emi Enye ekpemede uwem fo? Nte afo ukọmke ete ye eka fo ye mme ufan fo ke mfọnido mmọ ye afo ye ke ediwak nti ñkpọ emi afo enyenede ke uwem emi? Edieke ananade esit ekọm, afo odu ke otu ediwak mmọ emi enamde “idọñọ” efen osu ete ke mme ukperedem usen edi emi.
Ekese mme owo akananam inukke ibuot mmọ ndibọñ akam ke itie udia nnyuñ ñkọm Abasi ke udia emi Enye ọnọde mmọ. “Edi fiọk emi ete, ke ukperedem ini … mme owo eyedi … enana esit ekọm” (2 Ñwed Timothy 3:2). Ndusuk nditọ Abasi eda ediwak ñkpọ ntre-ntre enyuñ efre ete “Kpukpru eti erinọ ye kpukpu enọ eke efọnde ema oto ke enyọñ, eto ke ubọk Ete mme uñwana esuhọre edi” (James 1:17).
Nte afo edi eyenọwọñ eren, mme ñwan, owo Abasi emi akade ufọk ñwed ke obio? Ndusuk afo emesikut nte nditọwọñ emi minyeneke erinyaña ediọkde ido ye afo enyuñ esak fi koro afo mutieneke mmọ uka ufọk mbre, unek, mbre ball ye kpukpru mme itie mbre nditọ ererimbot. Afo usineke mme ñwọrọ-nda ido edisine ñkpọ emi ndiọi owo esinede unyuñ ubanake idem fo ye mme ñkpọ uto ye kpukpru edifọfiọñọ. Mmọ ekeme ndidianare mkpọñ fi koro afo enyenede isio uwem. “Idiọñọ” efen edi emi, koro Ikọ Abasi ọdọhọ ete ke ukperedem ini mme owo eyesua “se ifọnde.” Edi usen ke edi emi Abasi edisakde nsobo mme idiọk owo emi mikabakere esit ikpọñ idiọk-ñkpọ mmọ.
Isañ emi ekeme ndisọp ntre, ndien ukem nte asaña isañ okutde ediwak mme idiọñọ emi owutde ke obio oro ekpere, ntre ke owo Abasi okut ediwak idiọñọ emi etiñde enọ enye ete ke Obio Abasi odu kpa ke iso.
Ata Akpan Ñkpọ
Edieke afo mubeñeke idem unọ usọp-usọp erifiak ndi Jesus, kusio baba esisit ini unim utre ndibeñe idem. Yom Abasi ke ofuri esit fo; nnyuñ kut idaresit emi otode Enye ikpọñ. Ndien afo asaña ke usuñ Heaven. Ke ini ema ekenyaña fi, afo enyene ndiyom nnyuñ mbọ edinam-asana ye akwa uduọk-mmọñ Edisana Spirit ye ikañ.
“Mme idiọñọ” edisọp ndi Jesus ke etọt ke usen ke usen emi ọwọrọde ete utit usuñ odu ke iso?
Questions
MME MBUME- Nso mbume ke mbet ekebup Jesus ke Obot Olivet?
- Nso ibọrọ ke Jesus ọkọnọ?
- Siak enyiñ ewet-ñwed kiet ke Akani Ediomi emi eketiñde ñko abaña mme idiọñọ ukperedem ini.
- Nso ke enye eketiñ abaña ini iso?
- Nnyin isaña didie ifiọk ite mme ñkpọ emi ewọrọ esu?
- Nso ke nnyin inyene ndinam man idu ke mbeñe-idem ndisobo ye Jesus ke ini Enye edidide?
- Ntak emi edide akpan ñkpọ ndibeñe idem nnyuñ ndu ke mbeñidem?
- Nso ke mbon nsahi edọhọ?
- Nso iditibe ye mmọ emi edikpọñde ke isọñ?
- Nso ididi utip mme mmọ emi ebeñede idem?