Lesson 363 - Junior
Memory Verse
IKỌ IBUOT: “Ekpeme ndien: koro mbufo mifiọkke usen eke Ọbọñ mbufo edide” (Matthew 24:42).Notes
Nte Inọ Ke Okoneyo
“Edi efiọk emi, ete, edieke enyene-ufọk ọkpọfiọkde ini eke inọ edide, enye ekpekpeme” (Matthew 24:43). Edi inọ idinọhọ etop ke ini enye ekade ndiyip ñkpọ, edi edieke owo ọfiọkde ete ke owo ke edi ndidomo ndibuñ nduk ufọk esie okoneyo usen kiet, enye enyene ndikot bodisi edidibe ekpere man ekpemum inọ oro. Ndinam ntem odot. Ndien kpa nte inọ ekemede ndidi ke ini ekededi, nnyin ikpenyene ndikọbi usuñ nnyin inyuñ isaña ke item nte akpanade inam. Owo ekpenyene ndifiọk nte ke inyene ndidu ke mbeñidem ke abaña se enye ọfiọkde ete eyetibe ke ini iso.
Jesus eketiñ ete ke ini ididide itiene Ñwan-ndọ Imọ, Imọ ididi nte inọ ke okoneyo. Kpukpru Ikọ emi Jesus etiñde edi akpanikọ, kpukpru eyesu. Ntre edieke nnyin inyenede ibuot, nnyin iyedu ke mbeñidem ibet ini oro Jesus edidide ndikot ikọt Esie nsio ke ererimbot emi.
Ekeme ndidi ke usen-ubọk ke ini utin asiahade ke ererimbot ñkañ nnyin, ndien nnyin emi ikebeñede idem ndisobo ye Jesus iyetọñọ obufa usen ke mme Heaven ke enyọñ. Ke ñkañ ererimbot efen, eyedi okoneyo, ini ekade ndiduk idap. Edidi ini mme owo edọhọde ete “esiere-o” ndien ini kiet mmọ eyedemere ke ubọñ edidi Jesus, ndien eyedọhọ ye mme ndisana owo emi mmọ edisobode do ete “emesiere-o.” Ke ererimbot ñkañ eken, mme owo eyetetie eyom ndidia udia uwemeyo mmọ, ndien mmọ emi ekekpañde utọñ enọ ikot Jesus eyekpọñ udia mmọ edọk eka udia-ndọ Eyen-erọñ ye Jesus ke mme Heaven. Usen kiet nnyin iyekop mme ikọ emi, “Ekem ini ndọ Eyen-erọñ, Ñwan Esie otim idem ebeñe Enye” (Eriyarare 19:7). Nso utọ usen ke edidi! Edi nnyin inyene ndidu ke mbeñidem mbaña usen oro.
Ndibeñe Idem
Ndibeñe idem ọwọrọ nso? Ndusuk eyedọhọ: “Jesus ama anyaña mi osio ke mme idiọk-ñkpọ mi. Mmọfiọk nte ke ema efen kpukpru idiọk-ñkpọ mi. Mmeti ini emi Jesus ekeyetde mi onyuñ anamde mi nsana. Nso utọ ubọñ ọkọyọhọ uwem mi ke ini Jesus onimde mi baptism Edisana Spirit!” Mmọ oro edi mme utibe enọ, ndien edieke nnyin ikade iso ndibọñ akam, inyuñ ikot ñwed Abasi, inyuñ idu uwem nte Ñwed Abasi ekpepde nnyin ke adaña ini ima ikọbọ mme ñkpọ emi, nnyin iyedu ke mbeñidem ke ini Jesus edidide.
Nte afo ke amama kpukpru owo nte emi akamade ke akpa ini emi Jesus anyañade fi? Nte emeti nte mmọ emi afo akasuade akpa ekenyenede fi ukpuhọre ke ini Jesus odukde esit fo? Nte emeti adaña nte afo okoyomde mmọ efen ekop ukem idara edinyaña-ukpọñ emi afo okokopde? Ama esibọñ akam ye nsin ifik man mmọ efen ekpebọ erinyaña, onyuñ anam se ekekeme ndinem mmọ esit ke abaña mme ñkpọ nsinsi ini. Nte ke enyenyene udọñ oro?
Jesus ama ọbọñ akam abaña mbet Esie ete: “Da akpanikọ Fo dianare mmọ nim nọ Idem Fo: Ikọ Fo edi akpanikọ”; ndien Enye aka iso etiñ ete, “man mmọ kpukpru ekpekam edi kiet, nte Afo, Ete odude Mi ke idem, Ami nnyuñ ndude ke Afo” (John 17:17, 20c, 21). Nte afo emeti nte okokopde emem ke ini Jesus anamde fi asana? Afo ukoyomke ndinọ mfaña. Afo ama okop inem edidiana kiet ke mbuọtidem emi otode edinam-asana. Nte ke osuk enyenyene inem oro?
Ke ini ekenimde fi uduọk-mmọñ Edisana Spirit ye ikañ, afo ama okop nte esikde ekpere Ọbọñ tutu enye etie nte ọmọñọ ọkpọñ ererimbot ini kiet aka Heaven. Eketie fi nte emi Heaven ekpedide ikpat kiet. Nte enye ke ekpekpere ntre? Jesus ama etiñ ete ke Iberedem, kpa Edisana Spirit, eyedi editiñ ñkpọ abaña Imọ. Enye eyetiñ ọnọ nnyin abaña idara emi ebetde nnyin ke Heaven. Edisana Spirit edi man editiñ ñkpọ ọnọ nnyin abaña ebiet-iduñ Esie.
Didie ke aka iso enem fi mfin ke ini okopde abaña ebiet emi Jesus akade nditim nnọ fi? Nte ke aka iso nditiñ kpa nte emi etiñde abaña ufọk enye emi afo oduñde mi?
Nte nnyin ke iduñ kpukpru usen ye ekikere ite ke nnyin idi Ñwan-ndọ Christ, ndien ke inyene ndidot? Nte imotim ikpeme man okudu ñkpọ ndomokiet ke uwem nnyin emi akpayatde Jesus esit edieke akpanade Enye okot nnyin aka Ndọ mfin? Owo ekeme ndidu eti uwem, enyene ọkpọsọñ udọñ ndinam mmọ efen enim mme Mbet-nti-ido, edi, kpa ye oro inyeneke ima Jesus ke esit esie kpa nte emi enye ekenyenede ke ini ekenyañade enye akpa.
Ndiduọk Akpa Ima Oro
Ke ini John, owo Mbet okodude ke Isuo Patmos, ke ñkukut, ema ewut enye nnen-nen nte mme Ufọk-Abasi ke Asia eketiede. Emi edi se Jesus eketiñde ọnọ enye abaña Ufọk-Abasi emi okodude ke Ephesus: “Mmọfiọk mme utom fo, ye ọkpọsọñ eñwan ye ime fo; mmonyuñ mfiọk nte ukemeke ndibiom mme idiọk owo, okonyuñ odomo mmọ emi ekotde idem mme apostle, ndien midighe, okonyuñ ayarade ọfiọk ete mmọ edi mme osu-nsu; omonyuñ enyene ime, okonyuñ obiom ukut ke abaña enyiñ Mi, unyuñ ukabakere ukpa mba. Edi mmenyene se ndade mbiom fi, emi ọkọkpọñde akpa ima fo. Mmọdo ti itie emi ọkọduọde ọkpọñ, nyuñ kabare esit, nyuñ nam se akanamde ke akpa” (Eriyarare 2:2-5).
Mmọ emi ema etim ebọ erinyaña. Jesus ọkọdọhọ ete, “Ti itie emi ọkọduọde” Mmọ ini kiet ko ema enyene ima Abasi ke esit mmọ, edi ema efiak edem. Ema esin ifik enam ñkpọ enọ Jesus, mmọ ekesuk enanam. Mmọ ema enyene ime, enyene ekan ediwak mmọ emi ekotde idem mmọ mme anditiene-Christ. Mmọ ema esin ifik esua idiọk-ñkpọ enọ mmọ efen. Mmọ ekekere ete ke se ikanamde, ikanam inọ Jesus. Edi mmọ ema eduọk akpa ima oro, ke ntre mmọ ikodotke ndidi Ñwan-ndọ Christ.
Ikọ etiñ ọnọ nnyin ete ekpedi nnyin inyene mbuọtidem emi akpakpatde mme obot efep, edi inana ima Abasi ke esit nnyin, nnyin idighe ñkpọ baba kiet. Nnyin imekeme ndinọ idem nnyin nte uwa, inọ kpukpru okuk nnyin man eda ebọk mme ubuene, oro idinamke nnyin idi Ñwan-ndọ Christ. Nnyin inyene ndinyene ima Abasi ke esit nnyin inyuñ isuhọ enye do. “Akan kpukpru ñkpọ, enyene ufiop-ufiop ima ke otu idem mbufo; koro ima ofukde ekese idiọk-ñkpọ” (1 Peter 4:8).
Mme Ndisime Nditọ Iban Ndọ
Ke ñke mme asian iban ition ye ndisime iban ition, etiñ enọ nnyin ebaña otu mme okpono Abasi emi kpukpru mmọ ekebetde eridi Ọbọñ. Kpukpru mmọ ema ekere ete imodu ke mbeñidem, edi ition ke otu mmọ ekebiet mbon Ufọk-Abasi Ephesus. Mmọ ema eduọk “akpa ima” oro. Mmọ ema enam ñkpọ ukem nte ition eken. Ekenam ukem utom, edi esit mmọ ikedighe ukem. Ini kiet mmọ ema enyene ima Abasi, edi mmọ ema eyak ima oro odut ọwọrọ tutu utuenikañ mmọ akabare edi ukpọk. Idighe kpukpru mmọ emi eketọñọde nte nditọ Abasi edidu ke mbeñidem ke ini Jesus edidide. “Eyenyaña owo eke edimede ime tutu osim akpatre” (Matthew 10:22).
Ñwan-ndọ Christ
Didie ndien ke nnyin ikeme ndidu man aran okudut ọwọrọ ke usin-aran nnyin, ndien ayak nnyin ye utuenikañ nnyin ana ukpọk? Ke Mme Ñke 31, etiñ ebaña enyene-ido añwan, enye emi etiede nte Ñwan-ndọ Christ.
“Esit ebe esie ọbuọt idem ye enye” (Mme Ñke 31:11). Jesus edi Ebe. Nte Enye ekeme nditim mbuọt idem ke afo? Enye iduhe idahemi. Nte esit Esie afina oto nte afo odude uwem ke ini emi Enye miduhe mi? Kpukpru edinam nnyin ekpedi ye ekikere emi: Nte Jesus okpoyom mi nnam emi? Edieke edide owo ke ererimbot ke esese uwem mi, nte enye eyefiọk mi nte Ñwan-ndọ Christ? Nte ami mmedi kiet ye Enye ke edu uwem ye ke etop kpa nte ebe ye ñwan ekpedide? “Ñwan oro anam enye eti ñkpọ, idinamke idiọk kpukpru usen uwem esie.”
Mfọn Ido
“Enye ada ifiọk atat inua esie; ewuhọ ima onyuñ odoro enye ke edeme” (Ufañ 26). Ikafañ ke mme owo esifre ndifọn ido! “Ima enyenyene anyan ime, onyuñ ọfọn ido” (1 Ñwed Corinth 13:4). Ifọnke ido ye ufan ye mmọ emi ekperede enye ikpọñ-ikpọñ, inyuñ idighe ke mme saña-saña ini ikpọñ-ikpọñ. Mfọnido edi ibet ọnọ enye. Enye ọfọn ido inyuñ itiehe ikere ibaña. Enye ọfọfọn ido ye kpukpru owo, kpa ye idem mmọ emi mmimaha enye. Enye ekeme ñko ndibọñ akam mbaña mmọ eke esinde enye enyin. “Ima inamke inua, ikohokede idem, inamke ido eke midotke.”
“Mbuñwum Spirit edi ima, ye idaresit, ye emem, ye ime, ye mfọn-ido, ye eti ido ye edinam akpanikọ, ye ifure-ifure ido, ye mfara ke idem,” (Ñwed Mbon Galatia 5:22, 23). Onyuñ edi uduak Abasi nte ke nnyin ikpenyene ndiñwum kpukpru utọ mfri oro. Utọ mfri oro ewọrọ eto esit emi ọyọhọde ye ima Abasi.
Ndisaña Nte Odotde
Paul, owo mbet etiñ ọnọ nnyin ete: “Esaña nte odotde ikot emi ekekotde mbufo, ke kpukpru nsuk-idem ye ifure-ifure ido, ye anyan ime; eme ime ye kiet eken ke ima; esin ifik eda emem nte uruk ebọp idem edian ọtọ kiet ke Spirit” (Ñwed Mbon Ephesus 4:1-3).
Edieke idọhọhọde ite idi mme anditiene-Christ inyene ndiwut oro oto ke uwem eke nnyin idude. Ñkoñ-ñkan udọñ ke esit eyen Abasi edi enye ndidu ke mbeñidem ke ini Jesus edidide. Enye añwana kpukpru usen ndinam ñkpọ ọfọn akan man enye enyene kpukpru se idotde. Enye esima ndikot utọ mme ufañ ñwed emi: “Ekunyuñ eyat Edisana Spirit Abasi esit, emi edi ke Enye ke ema efik mbufo idiọñọ ebeñe usen erifak. Esioño kpukpru ndot-ndot ekikere, ye ifuresit, ye iyaresit, ye utọk ye isuñi efep ke otu mbufo” (Ñwed Mbon Ephesus 4:30, 31). Enye ke ebeñe Abasi añwam imọ ndinam uwem imọ ekem ye ikọ oro. Enye isehe inyuñ itiñke ibaña mme ido mmọ efen.
“Kuyom mme ndo ke usuñ isañ uwem
Ekpedi nte okutde mmọ
Ọfọn onyuñ odot ndisaña nte nnan
Kam fiọk se idide eti emi otode ke mmọ.”
“Nte mmọ emi Abasi ekemekde, emi Abasi akanamde mmọ esana onyuñ amade, eda ndien esit mbọm esine (mme esit emi okopde mbọm), ye mfọn-ido, ye nsuk-idem, ye ifure-ifure ido, ye ime” (Ñwed Mbon Colossae 3:12), oro edi mme uduot Ñwan-ndọ Christ.
Utom Ñwan-Ndọ
Spirit ye ñwan-ndọ edọhọ ete, Di” (Eriyarare 22:17). Oro edi mbubehe Ñwan-ndọ Christ. Enye ke etiene Spirit okot mme anam-idiọk ete ekabare esit. Enye ke ada “udia esie ke anyan ebiet” (Mme Ñke 31:14), ọbọk ukpọñ esie ye mme udia Heaven. Enye ikopke inem ke mme ñkpọ ererimbot ikan nte ediñwamde enye ndibet tutu Jesus, Ebe-ndọ esie edi.
Questions
MME MBUME- Nso ke nnyin ifiọk ibaña ini emi Jesus edidide?
- Nso itibe inọ nnyin ke ini etebede nnyin ikpe?
- Nso ke edinam-asana anam ọnọ nnyin?
- Jesus ọkọdọhọ ete ke Edisana Spirit editiñ nso ọnọ nnyin?
- Ntem ke mbuọtidem, ye idorenyin ye ima esuk edu; ewe okpon akan?
- Nso ke Jesus ọkọdọhọ ete ke akwaña ke ufọk-Abasi Ephesus?
- Nso ke owo-ifiọk oro eketiñ abaña mfọnido enyene-ido añwan?
- Nso idi mme mbuñwum Spirit?
- Nso idi mbubehe Ñwan-ndọ Christ?