Lesson 364 - Junior
Memory Verse
IKỌ IBUOT: “Koro eyen amanade ọnọ nnyin, enọ nnyin eyen-eren” (Isaiah 9:6).Notes
Messiah Emi Ekeñwọñọde
Ke ini Christ akamanade ke Bethlehem, ediwak mme eñwọñọ Abasi ema ewọrọ esu. Eñwọñọ Andinyaña ama odu tọñọde ke ini akpa eren ye ñwan. Ke Adam ye Eve ema ekenam idiọk-ñkpọ, Abasi ama ọdọhọ urukikọt ete: “Nyenyuñ nsin usua ke ufọt fo ye ñwan, ye ke ufọt ubon fo ye ubon esie: enye eyenuak fi ibuot, afo eyenyuñ anuak enye nditiñ-ikpat” (Genesis 3:15).
Oro edi akpa eñwọñọ ke abaña Messiah, (Enye emi Ekeyetde Aran Enim), Andinyaña emi ekenyenede ndinyaña mme owo nsio ke mme idiọk-ñkpọ mmọ (Matthew 1:21).
Ke akade iso, Abasi ama ọnọ Abraham Eñwọñọ: “Oto fi kpukpru oruk ererimbot eyekut mfọn” (Genesis 12:3), emi ọkọwọrọde osu ke Jesus Christ. Ke kpukpru mme isua emi eketienede ema esiti mme Jew ebaña ediomi Abasi ye Abraham. Mme anditiñ ntiñ-nnim ikọ ema etiñ ediwak ini enọ mmọ ebaña Messiah mmọ emi edidide. Isaiah ama etiñ akan mme anditiñ ntiñ-nnim ikọ eken abaña eridi Christ.
Anditiñ Ntiñ-nnim Ikọ
Isaiah ekedi anditiñ ntiñ-nnim ikọ ke Judah. Enye ọkọkwọrọ-ikọ ke ukem ini emi Amos ye Hosea ekekwọrọde. Enye ekedi anditiñ ntiñ-nnim ikọ Abasi emi akanamde akpanikọ ọtọñọde ke ini Uzziah tutu osim ini Hezekiah (Isaiah 1:1). Mbuk eset etiñ enọ nnyin ete ke ekewot Isaiah ke abaña mme ñkpọ emi enye eketiñde abaña Abasi.
Nditiñ ntiñ-nnim ikọ ọwọrọ nditiñ me ndikwọrọ mbaña se iditibede ke ini iso.
Abasi ama owut mme anditiñ ntiñ-nnim ikọ Esie mme ñkpọ eke edidide onyuñ edemede mmọ nditiñ nnyuñ ñwet se Abasi edinamde ọwọrọ osu. Ke Ñwed Abasi nnyin imokot ediwak ntiñ-nnim ikọ ye mme ini emi mmọ ekesude.
Emana Christ
Eyak nnyin ikere ibaña ubak mme ntiñ-nnim ikọ Isaiah ke abaña Christ. Isaiah ekewet mme ikọ Abasi onim: “Mmọdo Ọbọñ ke idem esie ọnọde mbufo idiọñọ: sese, eyen-ọwọñ añwan oyomo, onyuñ aman eyen-eren, onyuñ osio enyin IMMANUEL.” Emi ekedi idiọñọ ndiwut nte eyen oro ekedi Messiah emi ekeñwọñọde. Emi nditibe edidi ata utibe-ñkpọ koro oro ikemeke ndida itie ntre. Jesus ekedi Eyen Abasi, ndien owo ekpekere ete emana Esie edidi utibe ye nyọ-nyọ, ọkpuhọre ye emana eyen efen ekededi. Nte ntiñ-nnim ikọ emi etiede ntem eyesu? Ama osu. Ke abaña emana Jesus, nnyin ikot ite angel ọkọdọhọ Mary, edisana eyen-ọwọñ añwan ete ke enye edidi eka eyen-eren emi enye edikotde “JESUS” (Luke 1:27, 31).
Ke edikem ini, Jesus ama amana ọnọ Mary (Matthew 2:1, 11). “Edi ofuri ñkpọ emi ọkọwọrọ man osu nte Jehovah akadade inua prophet ọdọhọ” (Matthew 1:22).
Sia utibe emana Jesus Christ emi miñwañake mme owo anam mmọ iyomke ndinim ke akpanikọ. Edi Ñwed Abasi edi akpanikọ, ndien mmọ emi emade Ọbọñ enim se Enye etiñde ke akpanikọ. Jesus ekedi edisana okonyuñ edi ñkukure Owo emi ekemede ndinam ntiñ-nnim ikọ emi osu. Jesus ikedighe ikpikpu owo. Enye ekedi eyen Abasi.
Mme Enyiñ Esie
Jesus ekedi ata utibe Owo anam ekekotde Enye ediwak enyiñ. Anditiñ ntiñ-nnim ikọ ama etiñ ete ke Enyin Esie eyedi Immanuel, emi ọwọrọde ete “Abasi odu ye Nnyin” Angel ama ọdọhọ ete “Afo eyenyuñ osio Enye enyiñ Jesus, koro edi Enye eyenyaña ikọt Esie osio ke mme idiọk-ñkpọ mmọ” (Matthew 1:21). Jesus ama enyene mme enyiñ efen ñko. Isaiah, anditiñ ntiñ-nnim ikọ ọkọdọhọ ete “Esio enye enyiñ Utibe, Ọnọ-item, Ọkpọsọñ Abasi, Nsinsi ‘Ete, Ọbọñ Emem.” Ke mme ikwọ ye ukwọrọ-ikọ mfin nnyin imawak ndikot Jesus kiet ke otu mme enyiñ emi. Enyiñ kiet kpọt ikemeke ndinam añwaña utọ owo eke Jesus edide. Ada ediwak mmọ editiñ mbaña akwa odudu Esie. Jesus ama adian mme enyiñ efen. Enye ama ọdọhọ ete “Ami ndi eti ekpeme-erọñ (John 10:11); “Ami ndi usuñ, ye akpanikọ ye uwem (John 14;6); ñko “Ami ndi inua-otop (John 10:9). Ndusuk afo emekeme ndidian mmọ efen ke otu emi ema ekesasiak mi. Owo ema abat mme enyiñ emi ebede ikie ke Ñwed Abasi eke edade ekot Jesus.
Obio-Ubọñ Esie
Isaiah ama ebebem iso etiñ abaña Obio-ubọñ Jesus ye ukara Esie. Mfin, ke esit nnyin, Enye edi Edidem ye Andikara uwem nnyin. Usen ke edi emi Jesus edidade itie Esie nte Andikara kpukpru ñkpọ, “EDIDEM NDIDEM YE ỌBỌÑ MBỌÑ” (Eriyarare 19:16). Obio-ubọñ Christ iditreke. Enye eyekara ke nsinsi (Mme Hebrew 1:8; Eriyarare 11:15).
Obio-ubọñ Esie edi eke emem ye edinen ikpe. Jeremiah, Anditiñ ntiñ-nnim ikọ ama etiñ abaña Obio-ubọñ Christ ñko Jeremiah ọkọdọhọ ete “Edidem kiet eyeda ubọñ, onyuñ okut unen, onyuñ anam edinen ikpe ke isọñ” (Jeremiah 23: 5).
Obio-ubọñ Christ eyekpuhọre ye eke owo “Enye eyeda ikpe ọwọrọ ọnọ akpanikọ. Esit ididuọhọ enye, idem idinyuñ ikpaha enye, tutu enye onim ikpe ke ererimbot” (Isaiah 42:3, 4). Enye idikpehe ikpe itiene nte mme ñkpọ ebonode mme ekpetiede, edi ukara Esie edidi eke edinen ido ye akpanikọ. “Enye idikpehe ikpe nte esede ke enyin, idinyuñ ibiereke ikọ nte okopde ke utọñ: edi enyekpe ikpe mme ubuene esin ke edinen, onyuñ ebiere ikọ nte enende ọnọ suñ-suñ mbio isọñ (Isaiah 11:3, 4). Ikpe Esie eyedi edinen koro “Spirit Jehovah eyedoro enye ke idem” ọnọ Enye “spirit eti ibuot ye asian, spirit item ye odudu, spirit ifiọk ye uteñe Jehovah.”
Mbọm
Ema etiñ ebaña Christ ete ke Enye eyenyene esit mbọm: “Enye idibuñke esañ eke anuahade” Ke ini Jesus okodude ke isọñ, Enye ama enyene mbọm ọnọ mbon ukut. Enye ama ọkọk ediwak mbon udọñọ. Enye ama ọnọ mmọ emi ekeyomde Enye ndọñ esit ye uñwam. Mfin, ke ini mbon ukut emi ebiomde mbiomo eke odobide esemede ekot Enye ke akam, Enye ọnọ mmọ uñwam. Andiwet Psalm ama ọdọhọ ete: “Jehovah emekpere mmọ eke esit ọbuñọde mmọ; onyuñ anyaña mmọ eke esit ọduọde” (Psalm 34:18).
Ukut Esie
Isaiah ama onyuñ etiñ abaña Andinyaña emi edikutde ukut. Ediwak isua mbem iso ekọñ Christ ke Krọs. Isaiah ama etiñ mme ikọ emi nte ñkpọ eke ama akadada itie: “Enye akada unan abaña mme idiọk ido nnyin, anuaha abaña mme ukwañ-ñkpọ nnyin: ufen odoro enye ke idem man nnyin ikut emem; ndien inia esie ọkọk nnyin.” Jesus ama ọduọk iyip Esie man ọkwọhọre mme idiọk-ñkpọ mmọ eke ekabarede esit enyuñ enimde ke akpanikọ. Ke ndusuk ini uwem Jesus ikenyeneke inem. Ema esua enyuñ esin Enye ke ndek: “Mme Pharisee emi edide mme ama-inyene ekop kpukpru ikọ emi, enyuñ esak Enye nsahi” (Luke 16:14). Edi “Mbio obio esie esua enye, enyuñ edọñ mme isuñ utom etiene enye ke edem, ete, Nnyin iyomke owo emi akara nnyin” (Luke 19:14). Jesus ama ọdọhọ mbet Esie ete: “Edieke ererimbot esuade mbufo, mbufo emefiọk ete enye ama ebem iso asua Mi, ndien edisua mbufo” (John 15:18).
Ke Ntak Nnyin
Ema edọhọ Jesus ọkpọñ idut mme Gerasene (Mark 5:17) Ema esuene Enye, “Owo ukut onyuñ emehe ke mfuhọ.” Christ ama ọyọ kpukpru ñkpọ emi man nnyin inyene erinyaña ukpọñ ye nsinsi uwem. Enye ọkọbọ ufen ke ntak idiọk-ñkpọ nnyin. “Edinen owo ke ibuot mmọ emi minenke” (1 Peter 3:18).
“Etuk enye, enye onyuñ John ọsuhọre idem esie onim inyuñ itatke inua esiemọ” Jesus ikosukke uyo nte Enye ọkọbọde ufen ke abaña mmọ efen. Ndusuk owo eyom mbọm enyuñ eseme ke ini mmọ edade ufen ye but enọ idem mmọ. Jesus emi mikọfiọkke idiọk-ñkpọ ama akabare edi idiọk-ñkpọ ke ntak nnyin. Ema edori Jesus ikọ enyuñ ebup enye mbume edi Jesus ikañwanake ndiyom unen nnọ idem Esie, ediwak ini Enye iketiñke ikọ baba kiet (Matthew 26:63; 27:14; Luke 23:9).
Jesus ama onyime ndiyak idem Esie nnọ ke abaña mmọ efen. Ekeda kpukpru idiọk-ñkpọ nnyin edori Enye ke idem. Enye ọkọbọ ufen ke ntak nnyin. Edi nnyin inam nso inọ Enye? Ke ini emana Christ emi, eke nnyin inọde mmọ efen mme enọ, nte nnyin imayak uwem nnyin ye itoro nnyin inọ Enye nte mme enọ? Abasi ama ọnọ akakan enọ ke ini Enye akayakde Eyen Esie ọnọ. Oto ke Enye afo emekeme ndinyene nsinsi uwem. Afo emekeme ndinyene erinyaña ukpọñ. Nte afo emenyene enye mfin? Afo emekeme ndinyene oto ke ndibọñ akam, ndiyarade ndinyuñ ñkpọñ mme idiọk-ñkpọ fo ndinyuñ nnim mme eñwọñọ Esie.
Mkpa Jesus
Mme ntiñ-nnim ikọ Isaiah efen ema edu emi ekewọrọde esu ke ini mkpa Jesus. “Koro esibede enye efep ke isọñ mme odu-uwem: ke abaña mme idiọk ido ikọt mi ke enye ada ufen.” Mkpa Esie ekedi “ye mme idiọk owo,” oro edi ke ufọt mme inọ iba (Matthew 27:38) “ñko ye owo inyene” oro edi ke obufa udi Joseph (Matthew 27:59, 60).
Jesus Christ, Eyen Abasi ama anam ntiñ-nnim ikọ ọwọrọ osu ke ini Enye akamanade ke Bethlehem ke Judea. Enye ama anam ntiñ-nnim ikọ ọwọrọ osu ke akayakde uwem Esie ọnọ “onyuñ obiom mme idiọk ido ediwak owo.” Tutu osim emi Christ ke ananam ntiñ-nnim ikọ ọwọrọ osu koro Enye odu ke ubọk nnasia Abasi anam mkpe-ubọk ọnọ nnyin (Ñwed Mbon Rome 8:34). “Ke ntak emi Enye onyuñ ekeme ndinyaña mmọ emi esañade ke Enye ekpere Abasi ọyọhọ-ọyọhọ, sia Enye odude uwem ke nsinsi ndinam mkpe-ubọk nnọ mmọ” (Mme Hebrew 7:25).
Isaiah ekedi owo Abasi emi ekekperede Abasi onyuñ anamde ñkpọ Esie. Enye ama enyene utibe ifet ndibem iso ntiñ mbaña Christ, Eyen Abasi. Ke Ñwed Abasi, nnyin imokut ite ke ediwak ntiñ-nnim ikọ esie ema ewọrọ esu. Se isuhọde, eyewọrọ ñko esu ke akpanikọ kpa nte mmọ eken ekesude. Eyak nnyin ke akam ye ñkop-item, ibeñe idem nnyin ibet Obio-ubọñ Christ man nnyin ikpodu ye Enye do.
Eyak nnyin inam ntre mfin ke ndikpono Nsek-Eyen Bethlehem.
Questions
MME MBUME- Anie edi anditiñ ntiñ-nnim ikọ?
- Siak enyiñ ubak mme anditiñ ntiñ-nnim ikọ
- Ewe eketiñ abaña Christ akan?
- Nso idi ntak emi emana Christ ekedide utibe?
- Nso ekedi enyiñ eka Jesus?
- Nso ekedi ntak emi Jesus ọkọbọde ufen onyuñ akpa?
- Ewe ntiñ-nnim ikọ Isaiah ọkọwọrọ osu ke ini mkpa Jesus?
- Ewe ubak ntiñ-nnim ikọ Isaiah ke abaña Christ miwọrọke kaña isu?