Lesson 365 - Junior
Memory Verse
IKỌ IBUOT: “Emenere enyin ese iñwañ ete ñkpọ adat ke esit ama, ekem ini ukpeñe” (John 4:35).Notes
Jesus amama nditọwọñ,
Enye ‘kpeme mmọ kpukpru,
Obubit ndat-ndat ye afia,
Edi ñkpọ uto Esie
Jesus amama kpukpru nditọwọñ.
Ekeme ndidi nnyin emi isikade ukpep-ñkpọ ke kpukpru Usen Ọbọñ ifiọkke ite ata ediwak nditọ edu ke ediwak itie ke ererimbot emi mifiọkke ñkpọ ibaña Jesus. Mmọ inyeneke ebiet ukpep-ñkpọ Usen-Ọbọñ emi ekpekade. Owo akanam itiñke inọ mmọ ete Jesus akakpa man afak mme idiọk owo, ndien oyom mmọ edu ye Enye ke Heaven. Mmọ ke etie ke ekim ebet uñwana Eti-mbuk ndisiaha nnọ mmọ. Ata ediwak mmọ eyekpaña enyuñ etak. Nnyin idikeme didie ndida ke iso Abasi, ndien ikpe ibiomke nnyin edieke mitiñke inọ mmọ ibaña Jesus!
Ndo-ndo oro Jesus okoyomde ndidọk ke Heaven, enye ama obok mbet Esie ọtọ kiet onyuñ asian mmọ se utom mmọ edidide. “Mbufo eka ekenam kpukpru mme idut edi mbet Mi, enim mmọ baptism esin ke enyiñ Ete ye Eyen ye Edisana Spirit: enyuñ ekpep mmọ enam kpukpru ñkpọ eke ñketemede mbufo: ndien sese, Ami ndudu ye mbufo kpukpru ini, tutu osim utit ererimbot” (Matthew 28:19, 20).
Ediwak mme ọkwọrọ-ikọ Abasi eka mme esen idut ndisian mmọ oro mikenyeneke ifiọk ibaña Jesus, enyuñ ekabare mme ñwed etop Eti-mbuk esin ke ediwak usem esuan ke mme idut ererimbot; kpa ye oro ekere ete ke mbahare iba ke itie ita ke otu owo ke ofuri ererimbot ikopke mbuk ibaña Jesus. Nte nnyin imañwana ke ofuri ukeme nnyin ndinam ewuhọ emi Jesus ọkọnọde ke ini Enye eketiñde ete, “Mbufo eka ke ofuri ererimbot”?
Odudu Ndida Nnam Utom
Ke ini Jesus ọkọnọde mme anditiene Enye uyo ete ebet ke Jerusalem tutu ebọ Uduọk-mmọñ Edisana Spirit, Enye ama etiñ ete ke mmọ eyebọ odudu ndidi mme ntiense Esie “tutu osim utit ererimbot” (Utom Mme Apostle 1:8). Se mmọ ekenyenede ndibọ eyenọ mmọ odudu nditiñ mbuk ke abaña Jesus enọ ediwak owo emi ekeyomde usuñ ekpọñ Jerusalem.
Ukọbọ
Mme utibe mboho ema eda itie ke Usen Pentecost ama ekebe, ke ini mbet esie owo 120 ekebọde uduọk-mmọñ Edisana Spirit. Peter ama akabare edi akwa ọkwọrọ-ikọ Abasi ini kiet, ndien owo 3000 ema ekabare esit ke usen kiet. Mbet ema edat esit ke edim Edisana Spirit Abasi, ñko ediwak, nditọ Abasi ema ekop inemesit ndisuhọ ke Jerusalem man eka iso ebọ edidiọñ. Edi se Jesus ọkọdọhọde ekedi.
Ekeme ndidi mbet ikọfiọkke ite ini ama ekem ndika, edi ke ini mme Pharisee ema eketọñọ ndimum mme owo nsin ke ufọk ñkpọkọbi, ndusuk ewot mmọ ke ntak mmọ ndinim Jesus ke akpanikọ, mmọ ema ekpọñ Jerusalem esuana eduk ke ediwak mme obio. “Ndien mmọ ewọñọ ekekwọrọ ikọ ke kpukpru ebiet, Ọbọñ onyuñ anam utom ye mmọ, onyuñ ada mme idiọñọ eke esañade ye erikwọrọ ọsọñọ ikọ mmọ” (Mark 16:20). Jesus ama etiñ ete Imọ iyeka ye mmọ, ndien Enye ama anam ntre.
Ikot Ndika Europe
Ke Paul, owo mbet ama akakabare esit, enye ama anam isañ ukwọrọ-ikọ utim ikata. Ke ebiet ekededi enye akakade, enye ama etiñ ọnọ mme owo abaña Jesus. Ke okoneyo kiet ke Troas, enye okut ñkukut, owo Macedonia kiet ke ada ebeñe enye ete, “Be di ke Macedonia, dinyaña nnyin” (Utom Mme Apostle 16:9). Paul ama ọfiọk ini kiet ete ke ikot emi oto Abasi, ndien enye ye nsaña utom esie ikabiatke ini ndibe ñka Macedonia. Emi ekedi eritọñọ utom ukwọrọ-ikọ Abasi ke Europe.
Ediwak owo ema ebọ erinyaña oto ke ukwọrọ-ikọ mbet, edi idighe kpukpru owo ekenyime ukpep-ñkpọ mmọ. Ndusuk owo ema eyat esit tutu esin Paul ye Silas ke ufọk-ñkpọkọbi, edi oro ikọbiọñọke mmọ ndikwọrọ ikọ Abasi. Abasi ọkọdọñ mmọ ekwọrọ ikọ enọ mmọ emi mikọfiọkke ñkpọ ibaña Jesus, ndien mmọ ema enam se ekekeme nditiñ Eti Mbuk, ikereke ibaña ufen oro mmọ ekenyenede ndibọ.
Edikañ Idem
Ediwa idem edi Spirit ata ọkwọrọ-ikọ Abasi. Enye edi owo emi ebeñede idem ndibiom ukut ke ntak Jesus edieke anade edi ntre. Enye iyomke utip ererimbot. “Ke ndikokut owo emi ọbọde erinyaña asakde imam, edi se iwutde ete ke ñwa-idem ọkwọrọ-ikọ ikọwọrọke ikpikpu. Enye ebeñe idem ndikpọñ ufọk ye kpukpru ñkpọ inemesit eke edude, mme ufan ye oruk, man aka ke ebiet eke Abasi ọdọñde enye ete aka.
Man owo edi ọkwọrọ-ikọ eke odorode Jesus udori, enye enyene ndibọ erinyaña ukpọñ (efen ke mme idiọk-ñkpọ esie); enyuñ eyet enye asana (enam esit asana) oto ke mfọn edinam-asana. Enye ñko oyom Uduọk-mmọñ Edisana Spirit ukem nte mbet ekeyomde ke usen Pentecost mbemiso mmọ etọñọ ndidi mme ọkwọrọ-ikọ Abasi.
Ke akande oro, enye enyene ndinyene ima ye mbọm nnọ mme ukpọñ mme anditak. Ediwak mme ọkwọrọ-ikọ esitiñ ete ke owo ikemeke ndida ata ima emi owo enyenede ọnọ eke mmọ owo nsine ke idem nte ekura.
Owo ekeme ndidomo ndinam ñwut ete ke imọ imenyene mbọm inọ otu eke imọ isede ibaña, edi mme owo oro eyefiọk mme enye anam ntem ke ofuri esit esie, sia enye amade mmimọ ye ukpọñ mmimọ, mme edi ke ntak efen.
Ọkwọrọ-ikọ enyene ndifiọk nte ke mme owo oro imọ ikwọrọde ikọ inọ edi irenowo, ye iban ye ñkpri nditọ emi Jesus akakpade ke ibuot mmọ. Jesus iyomke baba owo kiet ke ofuri ererimbot atak. Enye akayak uwem Esie man afak nnyin, ñko Enye oyom nnyin iyak uwem ke ndinam ñkpọ nnọ mmọ efen. Ediọñ nnyin man idi edidiọñ inọ mmọ efen. Nnyin inyene ndibeñe idem ndikut ukut ye mmọ oro idomode ukeme ndiñwam. Oro iwọrọke eyom ñkpọ eke okponde akaha eto nnyin.
Jesus ọkọkpọñ utibe ebekpo Esie emi kpukpru mme angel etuakde ibuot enọ Enye, edi edidu ata uwem nsuhọre idem mi ke isọñ, Enye ikoduñke ke mme ikpọ ufọk ndidem, mme ke ñsọñ urua ufọk mbon inyene, edi okoduñ ke ñkpri ufọk ye mme ọkọ iyak emi mme ọwọrọ iso owo ke ererimbot ekesede ke ndek. Enye ekedi uwut-ñkpọ ọnọ nnyin; onyuñ oyom nnyin ñko itiene enye.
Ediwak Usen
Ke ini mme ọkwọrọ-ikọ Abasi ekewọrọde eka isañ ukwọrọ-ikọ mmọ ke idut mme okpono-ndem, ñkpọ nte isua ikie emi ebede, me akande oro, mmọ ema ekut ediwak owo emi mikenyeneke usem eke ewetde-wet. Mmọ ikekemeke ndikot Edisana Ñwed Abasi ye mme ñwed ikọ Abasi eken. Mme ọkwọrọ-ikọ emi ekenyene ndisuhọ ke idut usem emi ndikpep usem mmọ, tutu ekeme ndida usem oro ntiñ ikọ ye mmọ. Ke oro okurede, mmọ ekenyene ndibọp mme ikọ ke usem emi tutu ekeme ndiwewet enye. Ñko enye ekenyene ndikabare ofuri Edisana Ñwed Abasi me ubak esie, nsin ke usem se ema ekewewet. Ke ediwak idaha, ekekabade mme ikọ ke Edisana Ñwed Abasi nte ekemde ye usem mme idut mme ọkwọrọ-ikọ Abasi ekedude. Nte uwut-ñkpọ, ikọ emi, ‘erọñ’ ke usem idut Iceland. Mbon idut oro ikpọfiọkke se ọwọrọde edieke ọdọhọde ete Jesus edi eyen-erọñ Abasi. Mme anditọñọ utom ndikabare ñwed ekesida ikọ emi “Akamba unam mmọñ” ekama. Ikpọ “unam mmọñ” emi ema ewak ke mmọñ ke idut Iceland, ñko mbon Obio ema ekeme ndifiọk edieke edade oro edomo ye “erọñ Abasi.” Ọkwọrọ-ikọ emi ekenyene ndikpep mme owo ndikot ikọ Abasi. Ikedighe utom eke enamde usọp-usọp, ama ada ediwak isua ọkpọsọñ erikpep ye akam ye uñwam Abasi ndinam usen edi se ewetde-wet ye ndinọ mbon idut oro ikọ Abasi ndikot. Mme ọkwọrọ-ikọ ekenam oro eto akwa ima emi mmọ ekenyenede ebaña mme ukpọñ owo, ñko mmọ ekeyom mmọ efiọk usuñ uwem nsinsi. Mme owo ke ata ediwak idut ye usem ekot ñwed Abasi mfin oto ke edinam akpanikọ mme akpa mme ọkwọrọ-ikọ Abasi. Nnyin imekeme ndinọ ñwed Abasi nnyin esọk mmọ man añwam mmọ ndidi ata nti mme anditiene-Christ koro mmọ eñwen ema ekpep mmọ ndikot ñwed.
Utom oro itreke. Ke isua ke isua, mbufa usem ke eduk edi, ndien ekabade Edisana Ñwed Abasi esin ke ñkpọ nte usem idut 197. Idut tọsin kiet ye efut esuk enyene ñwed kiet ke Edisana Ñwed Abasi emi ekabarede esin ke usem mmọ. Kpa ye oro, imekere ite ñkpọ nte usem idut ewakde ekan 1700 iduhe ke ñwed Abasi.
Ndusuk mme ọkwọrọ-ikọ, ke mfihe esit mmọ ndisian mme okpono-ndem mbaña Jesus, eda “usan utiñ ikọ etiñ ikọ Abasi enọ mmọ. Ndusuk ke otu mmọ eyeka ke mme ebiet eke otimde oyom usuñ, emi owo miwetke usem mmọ, mme ebiet eke mmọ minyeneke Ñwed Abasi emi ekabarede ke usem idut oro, ndien ekut owo eke ekemede ndikop usem idut oro ye eke ọkwọrọ-ikọ esemde. Enye ndien eyekabare etop Eti-mbuk esin ke ukwak utiñ-ikọ, ndien eda mme ikọ oro esin ke usan utiñ ikọ enọ esọk mme owo eke mikopke ñkpọ ibaña Eti-mbuk emi ke usem mmọ. Mme ọkwọrọ-ikọ eken eda ukwak-ubre-ikwọ eke ekamade ke ubọk ebre etop Eti-mbuk erinyaña owo nsio ke idiọk-ñkpọ enọ mme anditak eke mikenyeneke ifiọk emi.
Usem Eke Spirit
Usuñ ekededi eke ekedade esian mme owo ebaña Jesus, ekedi Spirit Abasi ekenyene nditiñ ikọ ke esit owo mbemiso mme andikop ebọ erinyaña. Spirit iyomke akabare ikọ. Ọkwọrọ-ikọ ekeme ndibọñ akam ọtọ kiet ye okpono-ndem emi mifiọkke ndikot mme ndiwet, emi kiet mikemeke ndifiọk se eken etiñde, edi Spirit Abasi ekeme ndida esit mmọ mbiba ndian ọtọ kiet tutu mmọ mbiba ekop idara ye emem eke Jesus ọnọde ke ini Enye efende ọnọ anam idiọk eke atuade mkpọfiọk.
Utom Ukwọrọ-ikọ Ke Ufọk
Utom ukwọrọ-ikọ nnyin ekeme nditọñọ ke edem esa nnyin. Ekeme ndidi nte mbọhiduñ nnyin kebebet owo nditiñ ñkpọ nnọ enye mbaña Jesus. Nso iditibe edieke nnyin itrede nditiñ nnọ enye nte ke Jesus eyenyaña enye osio ke mme idiọk-ñkpọ esie, ndien enye atak ke hell? Nnyin ikpakam ibọñ akam ibeñe Abasi ite añwam nnyin ndikut owo eke itiñde ñkpọ inọ enye ibaña Jesus, inyuñ ida enye idi ke ufọk Abasi. Nte itọñọde utom usen, yak nnyin ibeñe Jesus ada nnyin osobo ye owo eke oyomde erinyaña onyuñ añwam nnyin ndisian se idide akpanikọ. Se ikande oro, edi nnyin ndidu uwem eke edinamde mmọ eñwen ekut ete ke nnyin idi nditọ Abasi. Nnyin idi uwut-ñkpọ obio-ubọñ Heaven. Nte edinam nnyin owut ete ke nnyin idi nditọ Obio-ubọñ Heaven?
Ndusuk nnyin imenyene udọñ nte ikpekade esen idut man inọ uwem nnyin ndinam ñkpọ ndiñwam mmọ eñwen ebọ erinyaña, edi idighe mmem-mmem nnyin ndinam ntre. Nso ke nnyin ikeme ndinam? Nnyin inyene ndiñwam mmọ oro ekade ke akam, imekeme ndinọ mmọ uñwam ke okuk ye ke edimiñ ñwed Ikọ Abasi nsin ke usem idut efen. Ediwak nditọwọñ enyene saña-saña okuk eke mmọ enamde ke ndiñwam mme ọkwọrọ-ikọ Abasi. Mmọ enyene ima ebaña nditọwọñ eñwen ke idut efen koro Jesus amade mmọ, ndien eyom ndiñwam mmọ man ebọ erinyaña.
Nnyin inyene ndisin ọkpọsọñ ifik ke akam inyuñ inam akpanikọ. Abasi akpakam añwam nnyin ndiduọk mmọñ-eyet ke abaña mmọ eke etakde, inyuñ ikpe Abasi ubọk ndinọ owo ndiñwam mmọ mbemiso Jesus ọtọñọ ntak edi.
Yak ibọñ akam emi ibuk miduhe ntem ite, “Se mi mi. Ọbọñ dọñ mi.”
Akparawa kiet akanam utom ke ofuri odudu esie man anam mkparawa eken ekop inem ke utom ukwọrọ-ikọ Abasi. Enye ama ekekere ete utom imọ ke ufọk okpon akan nte ikpọkpọñde enye.
Edi, baba owo kiet ikemeke ndinyime ndiduk ke iñwañ utom ukwọrọ-ikọ ibọhọke ke okoneyo kiet enye ofiori, “Se mi mi, Ọbọñ, dọñ mi.’ Ndien mmọ eken ema ekpebe eti uwut-ñkpọ esie enyuñ enyime ndika ebiet ekededi Ọbọñ edidọhọde mmọ eka. Akparawa emi ama ọsọñọ ada ke nyakidem esie, ndien idahemi enye anam utom Abasi ke India, ke etiñ ọnọ mme anditak abaña Jesus.
Edibak Mbeñe-
Baba owo nnyin mi ikprike ikaha ikan ndiyak uwem ke ntak ukwọrọ-ikọ Abasi. Ke ima ikebem iso ibọ enọ mfọn ita, nnyin inyene ndika iso mbọñ akam, man Abasi añwam nnyin ndikpep ikọ Esie, onyuñ ọnọ nnyin ifiọk ndifiọk ñkpọ mbaña mmọ oro inyenede mbiomo ke esit ibaña. Nnyin imekeme ndikpep usem ye edu-uwem mmọ oro nnyin ifiọkde ke Abasi oyom nnyin ika do. Edi ke kpukpru idaha, nnyin inyene ndiyom nda-usuñ Abasi. Ediwak ñkpọ edu emi nnyin inyenede ndikpep nto Abasi oto ke ini ye mme ñkpọ oro isañade ibe. Abasi ekeme ndibeñe nnyin idem abaña utom Esie etiene nte nnyin iyakde idem nnyin inọ Enye ke se ededi Enye oyomde nnyin inam.
“Ebeñe ndien Enyene-idọk ete, Enye osio mme anam-utom ọdọñ edi ke idọk Esie” (Matthew 9:38).
Questions
MME MBUME- Jesus ọkọdọñ mbet Esie eka ewe idut?
- Nso ikedi ntak emi Jesus ọkọdọhọde mbet Esie ete ebet ke Jerusalem?
- Nso ikanam mbet ekpọñ-Jerusalem?
- Nso etop okoto Macedonia etiene Paul?
- Siak ndusuk nti edu-uwem ọkwọrọ-ikọ Abasi.
- Nso ekọm-urua ke Jesus ọkọnọ ke ibuot nnyin?
- Ke nso usuñ ke ekesinam mme okpono-ndem enyene Edisana Ñwed Abasi?
- Utom ukwọrọ-ikọ nnyin enyene nditọñọ ke mmọñ?
- Didie ke ikeme ndinam utom ukwọrọ-ikọ ke ufọk?